Ձեր վստահելի աղբյուրը

Հայաստանի արտաքին գործերի նախկին նախարար Վարդան Օսկանյանի որդու՝ Արա Օսկանյանի ձերբակալման մեջ նրա փաստաբան Տիգրան Աթանեսյանը քաղաքական ենթատեքստ չի տեսել, ինչպես պնդում են սոցիալական ցանցերի օգտատերերը։

«Ազնվությամբ, ես որևէ քաղաքական ենթատեքստ չեմ տեսել իմ պաշտպանյալի ձերբակալության հարցում։ Դա շատ սովորական դեպք է, նման դեպքեր ոստիկանության բաժիններում արձանագրվում են գրեթե ամեն օր։ Քննչական մարմինները մի քիչ երևի շտապել են ձերբակալության հարցում», -Panorama.am-ի թղթակցի հետ զրույցում ասաց Տիգրան Աթանեսյանը։

Այսօր ժամը 18։00-ին լրանում է ձերբակալության 72-ժամյա ժամկետը, որից հետո միայն կորոշվի կալանավորվելո՞ւ է Արա Օսկանյանը, թե՞ ոչ։ Հարցին, թե ինչ է կարծում փաստաբանը բանը կհասնի՞ կալանքին, Աթանեսյանը պատասխանեց. «Ես հույս ունեմ, որ վարույթն իրականացնող մարմինը այդ խոհեմությունը ունի, որովհետև անգամ եթե դեպքը եղած էլ լինի, ապա խոսքը գնում է միջին ծանրության հանցանքի մասին»։

Նրա խոսքով, խոսքը ոչ թե առևանգման մասին է, այլ ազատությունից ապօրինի զրկելու մասին, ինչը ծանր հանցանք չէ։

«Եղել են պարտք-պահանջային հարաբերություններ այն էլ ոչ Արա Օսկանյանի մասով», -նկատեց փաստաբանը՝ ընդգծելով, որ մնացյալը նախաքննական գաղտնիք է և իրավունք չունի մանրամասներ ներկայացնել։

Նշենք, որ ավելի վաղ Քննչական կոմիտեն տեղեկացրել էր, որ 2017թ. փետրվարի 17-ին ոստիկանությունից ստացվել են քաղաքացու հաղորդման հիման վրա նախապատրաստված նյութերն առ այն, որ 2017թ. փետրվարի 16-ին իր ընկեր Հ.Սիրադարյանը, և նրա հորաքրոջ որդին` Ա.Օսկանյանը, իրենից պահանջել են վերադարձնել պարտքի գումարը, որի ընթացքում իր կամքին հակառակ իրեն պահել են ավտոմեքենայի մեջ և թույլ չեն տվել դրանից դուրս գալ` առողջության համար վտանգավոր բռնություն գործադրելու սպառնալիքներ հնչեցնելով:

Ըստ աղբյուրի, նկատի ունենալով, որ նյութերը պարունակում են ՀՀ քրեական օրենսգրքի 133-րդ հոդվածի 2-րդ մասի 1-ին և 2-րդ կետերով նախատեսված հանցագործության հատկանիշներ` փետրվարի 17-ին ՀՀ քննչական կոմիտեի Կոտայքի մարզային քննչական վարչության Աբովյանի քննչական բաժնում հարուցվել է քրեական գործ: Քննությամբ ձեռք բերված նախնական տվյալներով փետրվարի 16-ին` ժամը 17:00-ի սահմաններում Երևան քաղաքի Լենինգրադյան փողոցի «Ռոբերտո» խանութ-սրահի հարակից հատվածից Ն.Բերբերյանին նստեցրել են ավտոմեքենայի մեջ, գնացել Աբովյան քաղաք և նրա կամքին հակառակ և իր առողջության համար վտանգավոր բռնություն գործադրելու սպառնալիքներ հնչեցնելով՝ ապօրինաբար զրկել ազատ տեղաշարժվելու իրավունքից և պահանջել  վերադարձնել 1.500.000 ՀՀ դրամ պարտքը:

Փետրվարի 17-ին  Ա.Օսկանյանը և Հ.Սիրադարյանը ձերբակալվել են՝ ՀՀ քրեական օրենսգրքի ՀՀ քրեական օրենսգրքի 133-րդ հոդվածի 2-րդ մասի 1-ին և 2-րդ կետերով նախատեսված հանցավոր արաք կատարելու կասկածանքով: