Գալուստ Սահակյան. «Իմ տեղն այնպիսին է, որ մշտապես կա»
Ցանկացած քաղաքական ուժ՝ փոքրից մինչև մեծ, երբ որ մասնակցում է ընտրություններին, առաջինն ասում է, որ մեծամասնությունը մենք ենք կազմելու: Այդպես էլ ես եմ ասում: Եթե փոքրերն ասում են, մեծերը կասեն ու կասեն,-Ազգային ժողովում լրագրողների հետ զրույցում ասաց ԱԺ նախագահ Գալուստ Սահակյանը՝ պատասխանելով հարցին, թե ինչպե՞ս եք գնահատում ՀՀԿ շանսերն առաջիկա խորհրդարանական ընտրություններում:
Նա նշեց, որ իրենք այսօր մտածում եմ ոչ միայն առաջին փուլ անցնելու մասին, նաև գիտակցում են, որ ընտրությունները պետք է անցնեն այնպես, ինչպես հասարակությունն է ուզում. «Կարևորագույն խնդիրն այսօր մեզ համար հենց դա է, որպեսզի օրինական ընտրություններ լինեն»:
Հարցին, թե արդյո՞ք գոհ եք ընտրական ցուցակում ձեր տեղից (ՀՀԿ համամասնական ցուցակում՝ 11-րդ համար), Գ. Սահակյանն ասաց. «Նույնիսկ եթե ցուցակում էլ չլինեմ, իմ տեղն այնպիսին է, որ մշտապես կա: Այնպես որ, ես ոչ թե սովորական քաղաքական գործիչ եմ, հիմնադիրն եմ կուսակցության, կուսակցության մեջ այդպես էլ ընդունվում եմ հիմա: Խնդիրը հետևյալը չէ, որ անպայման պետք է պատգամավոր դառնամ, ամենաբարձր տեղում լինեմ: Իմ խնդիրը հետևյալն է՝ այնպես մնալ, ինչպես եկել եմ, կարողանամ մինչև վերջ հասցնել այն աշխատանքը, որ դրված է իմ առջև»:
Պատասխանելով հարցին, թե որտե՞ղ եք ձեզ պատկերացնում ընտրություններից հետո, ԱԺ նախագահն ասաց. «Մտածում եք կլինե՞մ ընտրություներից հետ Ազգային ժողովի նախագահ, թե՞ ոչ: Բնական է շատ կուզենայի, որ լինեի: Նույնիսկ եթե չլինեմ, համենայնդեպս, ով էլ լինի, անպայմանորեն իմ համաձայնությունն էլ կլինի»:
Խոսելով վերջին շրջանում տարածված լուրերի մասին, թե Գ. Սահակյանի հարսը՝ Երևանի թիվ 38 մանկապարտեզի տնօրեն Սեդա Հակոբյանը, ընտրողների հավաքագրմամբ է զբաղված, հրահանգել է աշխատողներին մարզերում բնակվող իրենց հարազատներին վերագրանցել թիվ 2 ընտրատարածքում, որտեղ տարածքային ընտրակարգով առաջադրվել է ամուսինը՝ Արման Սահակյանը, ԱԺ նախագահն ասաց. «Ոչ, իմ հարսը եթե ուզենա էլ, չի կարող բերել: Ո՞ւմ բերի, որևէ տեղ գրանցի:
Նախ և առաջ դա օրենքը թույլ է տալիս: Վերջին հաշվով ընտրություն է, եթե մարդ ուզում է որևէ մեկին ընտրի, գալիս գրանցվում է իր բարեկամի տանը, որն օրենքը թույլ է տալիս: Ոչ մեկին չի պարտադրվում»:
Դիտարկմանը՝ չե՞ք բացառում, որ ձեր հարսն ինչ-որ ագիտացիա արել է, նա պատասխանեց. «Շատ խոսում եք՝ ուզում եմ վիրավորվել, բայց նաև չեմ ուզում վիրավորվել: Իմ հարսը բավականին բարեհոգի աղջիկ է, շատ լավ աշխատող, ճանաչված է շրջապատի համար: Նույնիսկ եթե ցանկանա էլ մարդ գրանցել, կարծում եմ՝ իր գործը չի կարող լինել: Եթե մենք մտածենք մարդիկ պետք է բերենք, գրանցել տանք, Գալուստ Սահակյանը մարդ կբերի, կգրանցի, բայց ոչ հարսը»:
Լրահոս
Տեսանյութեր
«Ձեր սիրելի Ալիևը «Նոլդու Փաշինյան» երգը միացրած Արցախով պտտվում է». Բագրատ Սրբազանը՝ իշխանությանը