Պրոֆեսոր. Սերնդափոխության բացակայությունն ավելի լուրջ խնդիր է, քան ընտրությունները
Ընտրություններին ընդառաջ տնտեսագետ, պրոֆեսոր Թաթուլ Մանասերյանը կարևորում է ոչ թե խոստումները, որն արդեն սկսել են տալ ընտրություններին մասնակցելու հայտ ներկայացրած քաղաքական ուժերը, այլ հետևողական ու պրոֆեսիոնալ աշխատանք կուտակված խնդիրների լուծման համար:
«Մենք ունեցել ենք բացթողումներ, որոնք իրար վրա շարվելով, դարձել են մեկ օրում հանգուցալուծման համար ոչ դյուրին հարց: Ցանկացած քաղաքական ուժից, կլինի իշխող, թե ընդդիմադիր, պահանջվելու է պրոֆեսիոնալ կերպով խորամուխ լինել խնդիրների մեջ ու դրանք լուծել փուլ առ փուլ»,-Panorama.am-ի հետ զրույցում ասաց տնտեսագետը:
Թաթուլ Մանասերյանը դժվարանում է նշել մի ոլորտ, որը զուրկ է խնդիրներիներց:
«Ի հարգանս բոլոր խոստումների հեղինակների, ուզում եմ մի կարևոր համոզմունք հայտնել:
Ամենակարևորը համարում եմ կառավարության հետ աշխատել կարողանալը: Եթե կուզեք՝ աշխատեցնել կառավարությանը: Մինչ իշխանափոխության կոչերը, պետք է կարողանանք ձևավորել մշակույթ, կառավարությանը որպես հարկատուներ պարտադրենք աշխատել հասարակության ու սպառողների համար»,-ասաց Մանասերյանը:
Նրա խոսքով, եթե դա տեղի չի ունենում, ապա համոզիչ չէ որևէ խոստում ու իշխանափոխություն:
«Չեմ կարծում, որ կարող ենք մեկը մյուսին փոխարինող կառավարություններով խնդիր լուծել: Կառավարությունը, կարծում եմ, կարիք ունի օբյեկտիվ գնահատականի, պրոֆեսիոնալ օգնության, լավ իմաստով հասարակության ճնշումը զգալու, եթե իհարկե դա գունազարդված կամ սևացրած քննադատություն չէ»,-ասաց տնտեսագետը:
Պրոֆեսորն այսօր նման ճնշում չի տեսնում. «Հայերիս մոտ դա բացակայում է: Շա նուրբ հարց է: Պայմանավորված է հարյուրամյակներ պետականության բացակայությամբ ու այլ գործոներով: Եթե մեզնից կախվածը յուրաքանչյուրս անենք, ապա չեմ կարծում, որ խնդիրները նույն ծավալով ու խորությամբ կմնան»:
Նա կարևորում է քաղաքացիական հանրության մասնագիտացված հատվածի՝ իրավաբանների, տնտեսագետների, սպառողների միությունների ակտիվությունն է ու վերահսկողությունը, ինչպես նաև՝ մրցույթներով կադրերի ընտրութունը:
«Ես շատ կուզեի, որ մրցույթի ինստիտուտը չարհամարվեր: Մրցույթը պետք է գլխավորեն հասարակության մեջ չարատավորված մարդիկ, ովքեր շատ զգույշ են իրենց հեղինակության համար: Իսկ այդպիսի մարդիկ բարեբախտաբար դեռևս կան: Նրանց օգնությամբ կարելի է շատ լուրջ մրցույթներ կազմակերպել»,-ասաց տնտեսագետը:
Դասախոս Մանասերյանը նշեց, որ հարցը կարևոր է ոչ միայն տնտեսության, քաղաքականության առումով, այլև նպաստելու է երիտասարդների արտահոսքը կանխելուն:
«Բացարձակ ապատիա կա բոլորի հանդեպ՝ և իշխող կարգերի, և խոստումներ բաշխողների: Ոչ ոքի չեն հավատում, ես որպես պրոֆեսոր ամեն օր եմ շփվում երիտասարդների հետ՝ գիտակից զանգվածի, ուսյալ, կրթյալ մարդկանց հետ: Բացարձակապես որևէ մեկին չեն ուզում հավատալ, եթե իհարկե իրենք կուսակցականացված չեն: Այս մարդկանց պետք է համոզմունք: Ի վերջո, ումո՞վ պետք է փոխարինվեն այսօրվա գործիչները տասը տարի հետո: Իսկ սերնդափոխություն որևէ տեղ, որևէ ոլորտում չի իրականացվում:
Կա ավագ սերունդը, միջին սերունդը բացակայում է, երիտասարդները, որ պետք է գան, կայանում են, նախընտրում են Հայաստանից դուրս գալ: Մենք ունենք որակյալ ավագ սերունդ, ունենք փոփոխական միջին սերունդ, որը ըստ հրամանի, գումարի, պաշտոնի կարող է երեկվա համոզմունքները փոխել, և չկա երիտասարդություն, որ վաղը պետք է փոխարինի: Սա ավելի լուրջ խնդիր է, քան ընտրություններն ու քաղաքական ծրագրերը: Սրա մասին է պետք մտածել»:
Լրահոս
Տեսանյութեր
«Ձեր սիրելի Ալիևը «Նոլդու Փաշինյան» երգը միացրած Արցախով պտտվում է». Բագրատ Սրբազանը՝ իշխանությանը