Արմինե Հովհաննիսյան. ԱԺ-ում ռոտացիոն սկզբունքով թարմություն մտցնելը պակաս կարևոր չէ սերնդափոխությունից. «Առավոտ»
«Առավոտ» օրաթերթը զրուցել է Երևանի Նաիրի Զարյանի անվան թիվ 130 դպրոցի տնօրեն Արմինե Հովհաննիսյանի հետ, ով ՀՀԿ-ի կողմից ռեյտինգային ընտրակարգով առաջադրվել է Երևանի թիվ 2՝ Արաբկիր, Աջափնյակ, Դավթաշեն վարչական շրջաններն ընդգրկող ընտրատարածքում:
-Տիկին Հովհաննիսյան, Դուք Հայաստանի ամենաբարձր վարկանիշն ունեցող դպրոցներից մեկի տնօրենն ենք, ինչո՞ւ որոշեցիք առաջադրվել պատգամավորության թեկնածու:
-Պատգամավոր դառնալն ինձ համար երբեք ինքնանպատակ չի եղել: Անհանդուրժող եմ մարդկանց հանդեպ, ովքեր ԱԺ-ում զուտ ֆիզիկական ներկայություն են ապահովում: Ինձ համար անընդունելի է, որ մարդիկ, անկախ կուսակցական պատկանելիությունից, զբաղված են «աթոռ մաշեցնելով» և չեն արդարացնում իրենց խորհրդարան գործուղած քաղաքացիների սպասելիքները: Խորհրդարանում սերնդափոխություն է անհրաժեշտ, սակայն պակաս կարևոր չէ նաև ռոտացիան թիմի ներսում, երբ փորձառու պատգամավորներն իրենց տեղը զիջում են բավական մեծ կենսափորձ ունեցող, ամեն մեկն իր ոլորտի գիտակ իրենց գործընկերներին, ովքեր ասելիք ու անելիք ունեն խորհրդարանում: Չէ՞ որ երիտասարդի մտքի ճկունությունն ու մեծի փորձառությունը պետք է համադրել, այլ որ թե հակադրել: Ուստի, կարծում եմ, որ խորհրդարանական կառավարման պարագայում ԱԺ-ում պետք է լինեն միայն նրանք, ովքեր տեսլական, ծրագիր ու երկիրն ավելի լավը դարձնելու երազանք ունեն: Թեկնածությունս առաջադրելու որոշումը պայմանավորված է ինձ մոտ նշածս երեք բաղադրիչների առկայությամբ:
-Քարոզարշավի ընթացքում ի՞նչ ծրագիր եք պատրաստվում ներկայացնել հանրությանը:
-Իմ ծրագրերը, բնականաբար, վերաբերում են կրթության, սոցիալական ապահովության ոլորտներին: Ես իմ մանկավարժական գործունեությունը սկսել եմ շարքային ուսուցչի կարգավիճակում, այնուհետ դարձել եմ փոխտնօրեն, ապա՝ տնօրեն: Ինձ քաջ ծանոթ են հանրակրթության ոլորտի բացթողումներն ու խնդիրները: Մենք լուրջ անելիք ունենք, հատկապես, մարզերում և սահմանամերձ շրջանակներում, որտեղ մասնագետների թվի պակաս կա: Մեծ անելիքներ ունենք նաև բարձրագույն ուսումնական հաստատություններում: Պետք է գործնական քայլերով մեր հասարակության մոտ ամրապնդել այն դիրքորոշումը, որ 21-րդ դարում միայն դիպլոմի առկայությունը բավարար չէ աշխատանք գնելու համար: Աննախադեպ մրցակցության մեր ժամանակներում միակ «շահավետ» ներդրումը կրթությունն է, և պետությունը պետք է անի առավելագույնը աշխարհի մասշտաբով մրցունակ մասնագետներ պատրաստելու համար: Երիտասարդները պետք է վստահ լինեն, որ գիտելիքն ու լավ կրթությունը կյանքում հաջողության հասնելու միակ գրվականն են, իսկ ծանոթ-բարեկամով աշխատանքի տեղավորվելու արատավոր ավանդույթը պետք է ի սպառ վերանա մեր երկրից: Խիստ կարևորում եմ բուհական կրթությունից հետո նորավարտ մասնագետների վերապատրաստման և գործնական աշխատանքին պատրաստելու հաստատությունների հիմնումը: Գործատուների ճնշող մեծամասնությունն այսօր պահանջում է աշխատանքային փորձով մասնագետների, ինչի հետևանքով նորավարտները մրցակցությունից դուրս են հայտվում: Իսկ հետբուհական վերապատրաստման կենտրոնները խնդրի լուծման հիմնավոր երաշխիք կարող են դառնալ: Շատ չմանրամասնելով իմ ծրագրային դրույթները, նշեմ, որ իմ խորին համոզմամբ՝ մեկ-երկու տարվա ընթացքում կարելի է շոշափելի արդյունքի հասնել կրթության որակի բարձրացման հարցում: Իմ կարծիքով՝ սա է առաջընթացի ուղին: Մեր երկրի ապագան կիրթ և քաղաքականապես հասուն քաղաքացունն է, ով մերժում է «կեղծ մարգարեներին», ընտրակաշառք բաժանողներին ու նախընտրական խոստումներ շռայլող կիսագրագետներին՝ իր ապագան վստահելով քաղաքական ճանապարհ անցած ու ասելիք ունեցող ուժերին և անհատներին:
-Ձեր ընտրատարածքում մի շարք մեծահարուստներ են առաջադրվել, արդեն մամուլը գրում է, որ խոշոր չափի ընտրակաշառքի խոստումներ կան, Դուք ի՞նչ եք առաջարկելու ընտրողին:
-Ընտրակաշառք բաժանելու ոչ հնարավորություն ունեմ, ոչ՝ ցանկություն: Դա դեմ է իմ սկզբունքներին: Արդեն ասացի, որ իմ կողմից առաջարկվելիքը բացառապես գաղափարական հարթության վրա է: Քաղաքացիներին ներկայացնելու եմ իմ և Հանրապետական կուսակցության ծրագրային դրույթները, տարբեր ոլորտներում իրականացվող բարեփոխումները: Բացատրելու եմ, որ ընտրակաշառքը հարցի լուծում չէ, դա ծուղակ է, որի դիմաց ընտրողը հետագայում բավականին «բարձր գին է» վճարում: Ինչ վերաբերում է Ձեր նշած հրապարակումներին. ես հույս ունեմ, որ մեր ընտրատարածքում առաջադրված մյուս՝ թե՛ իշխանական, թե՛ ընդդիմադիր թեկնածուներն իրենց քարոզչությունը կիրականացնեն օրենքով սահմանված կարգով՝ չխախտելով բարեկրթության և առողջ ընտրապայքարի տրամաբանությունը: Հանրապետության նախագահի մակարդակով, այդ թվում՝ Բրյուսելում, հայտարարվել է, որ այս ընտրությունները պետք է աննախադեպ լինեն՝ թափանցիկ և ժողովրդավարության տառին համապատասխան: Հուսով եմ՝ որևէ մեկը չի հանդգնի շեղվելու սահմանված նշաձողից:
Հարցազրույցն ամբողջությամբ՝ թերթի այսօրվա համարում:
Լրահոս
Տեսանյութեր
«Ձեր սիրելի Ալիևը «Նոլդու Փաշինյան» երգը միացրած Արցախով պտտվում է». Բագրատ Սրբազանը՝ իշխանությանը