Ձեր վստահելի աղբյուրը

«Մեր կուսակցության համար այստեղ քարոզարշավի ներկայանալն ունի բացառիկ նշանակություն, խորհուրդ: Դա Գարեգին Նժդեհի  խորհուրդն է: Այսօր այստեղ ժամանելով՝ առաջինն այցել եմ Գարեգին Նժդեհի հուշահամալիր, հանդիպել երիտասարդ կապանցիների հետ»,- նախընտրական քարոզարշավի շրջանակում Կապանում քաղաքացիների հետ հանդիպմանն ասաց ՀՀ պաշտպանության նախարար,  ՀՀԿ համապետական ընտրական ցուցակը գլխավորող Վիգեն Սարգսյանը:

Նրա կարծիքով, Նժդեհի իմաստությունն ու խորհուրդն է բազմաթիվ խնդիրների պատասխանը:

«ՀՀԿ-ն այն քաղաքական ուժն է, որ բացի քարոզչական ծրագրից, նախընտրական ծրագրից, ձեզ է ներկայանում գաղափարախոսությամբ: Այսօր շատ է  խոսվում ազգային գաղափարի, ազգային գաղափարախոսության մասին: Շատերը հարցնում են՝ երբ պետք է ստեղծենք մեր ազգային գաղափարախոսությունը: Մեր պատասխանը մեկն է. մենք այն ժողովուրդն ենք, որը, դարերի խորքից գալով, կուտակել է այդ իմաստությունը միջնադարից, Նարեկացուց մինչև մեր օրեր, մինչև հենց այստեղ հերոս դարձած ու մեր ժողովրդին առաջնորդած մեծ Գարեգին Նժդեհը:

Կարծում եմ՝ գալով այստեղ, մենք կարիք ունենք և ձեզ փոխանցելու մեր տեսլականը, և ձեզանից քաղելու այն ոգին, այն տրամադրությունը, որ մեզ պետք է տանի  դեպի նոր հաղթանակներ»,- ասաց Վ. Սարգսյանը:

Նա վստահեցրեց, որ բանակը, Զինված ուժերը ՀՀԿ ուշադրության առանցքում և կենտրոնում են. «Շատ լավ գիտակցում ենք, որ մեր առաջընթացը հնարավոր է միայն անվտանգության, ամուր անվտանգության պայմաններում: Թեև այսօր ունենք հակառակորդ, որի գործողությունները դժվար է կանխատեսել,  քանի որ անկանխատեսելի է իր քաղաքականությամբ անգամ իր իսկ երկրի ներսում, մենք պետք է ունենանք Զինված ուժեր,  որոնք պատրաստ են արձագանքելու այդ մարտահրավերներին»:

Վ. Սարգսյանի խոսքով, ՀՀԿ-ն գալիս է ծրագրով, որը չի խոստանում հաջորդ օրը բոլոր խնդիրների լուծում:

«Մենք ձեզ խոսք չենք տալիս, որ մեր ընտրվելու պարագայում անմիջապես հնարավոր կլինի լուծել բոլոր սոցիալական խնդիրները,  բայց վստահաբար ասում ենք, որ այն ծրագիրը, որը ներկայացրել ենք ձեր դատին, թեև թվում է  շատ հավակնոտ, շատ հեռանկարային, իրականում  շատ իրատեսական է: Այն թիմը, որը այսօր ներկայանում է ձեզ, այն թիմը, որ այսօր ձևավորված է Հայաստանի գործադիր մարմնում, այն թեկնածուների  ցուցակը, որով մենք գնում ենք համապետական ընտրությունների, առհավատչյան է այն հաջողության, որը մեզ պետք է բերի այդ հաղթանակներն ապագայում»,- ասաց Վիգեն Սարգսյանը:

Նա ասաց, որ խոսելով «Ազգ-բանակի» մասին, նկատի ունեն հենց այն հերոսությունը, որը հայ ժողովուրդը դրսևորում է երկրի պաշտպանության գործում, դրսևորել է նախկինում, դրսևորում է այսօր:

«Մենք շարունակելու ենք այնպես անել, որ մեր տղաների ծառայությունն առաջնագծում լինի հնարավորինս անվտանգ, շարունակելու ենք անել այնպես, որ հայ զինվորը կարողանա իր պարտքը տալով երկրին, միաժամանակ տուն վերադառնա հարստացած  գիտելիքներով, փորձով, ամրացած մարմնով և ոգով, բանակը կարողանա ոչ միայն ստանա մեր հասարակության աջակցությունը, սատարումը, այլ նաև վերադարձնի մեր հասարակությանը, վերադարձնի լավ կրթության հնարավորություններով, ռազմաաարդյունաբերական, ռազմագիտական, բազմաթիվ այն ոլորտներում, որտեղ բանակը կարող է լինել առաջատար մեր երկրի զարգացման, ամրացման, կայացման համար»,- նշեց նա:

Շարունակելով իր խոսքը՝ Վ. Սարգսյանն ասաց. «Խնդրելով ձեր քվեն՝ վստահեցնում ենք ձեզ, որ հինգ տարի հետո նայելով ձեր աչքերին, ի վիճակի ենք լինելու ասել, որ կատարել ենք այն խոստումները, որոնք այսօր տալիս ենք ձեզ:

Մեջբերեմ Գարեգին Նժդեհի խոսքը՝ «Բավարար չէ դնել պայծառ նպատակներ, անհրաժեշտ է իմաստուն ընտրություն կատարել այդ նպատակին հասնելու ճանապարհին»:

Այսօր մենք ձեզ խնդրում ենք իմաստուն ընտրություն կատարել Ազգային ժողովի առաջիկա ընտրություններին, և ձեր քվեն տալ փորձված և ամուր հիմքերի վրա կանգնած Հանրապետական կուսակցության թիմին»: 

Հանդիպմանը ներկա էր ՀՀ արդարադատության նախարար, ՀՀԿ համապետական ընտրացուցակի 3-րդ հորիզոնականը զբաղեցնող պատգամավորության թեկնածու Արփինե Հովհաննիսյանը: Նա իր խոսքում ասաց.  «Պատահական չէ, որ Սյունիքում ինձ զբաղեցնում է մի միտք. երազանքներին հասնելու համար շատ բան պետք չէ: Եկեք միասին հավատով, կամքով և վստահությամբ շարժվենք դեպի մեր երազած երկիրը, դեպի առաջընթաց ապրող, անվտանգ և, իհարկե, արդար Հայաստանը»:

Ա. Հովհաննիսյանը նշեց, որ Կապանը կարող է տեղեկատվական տեխնոլոգիաների ոլորտում ամենակարևոր քաղաքներից դառնալ: «Այստեղ արդեն գործում է «Մոբայլ» լուծումների կենտրոնը, իսկ մի քանի ամիս անց կսկսի գործել նաև տեղեկատվական տեխնոլոգիաների երկամյա կրթության ուսումնական կենտրոնը: Սա շատ լավ հիմք է, որպեսզի Կապանում բացվի տեղեկատվական տեխնոլոգիաների կենտրոնը, ինչը կնշանակի՝ և աշխատատեղ, և  զարգացում այս ոլորտում»,- ասաց նա:

Ա. Հովհաննիսյանը նաև թվարկեց առողջապահության, ճանապարհաշինարարության և այլ ոլորտներում իրականացնող ծրագրերը: 

Նա ասաց, որ այս տարի կիրականացվի Սյունիք-Գորիս- Որոտան-Կապան-Մեղրի ճանապարհահատվածի հիմնանորոգման աշխատանքներ, կտեղադրվեն արգելապատնեշներ:
«Ծրագրերի ցանկը կարող եմ շատ շարունակել, բայց վստահ եղեք մի բանում,  որ այդ ցանկի յուրաքանչյուր կտորի մասով մենք ունենք հստակ պատկերացումներ և քայլերի հաջորդականություն»,- հավելեց Ա. Հովհաննիսյանը: