ՍԱՊԾ պետ. Սննդամթերքի անվտանգության ապահովումը մեկ օրվա աշխատանք չէ
«Պահանջատեր եղեք»: Սպառողի իրավունքի միջազգային օրվա առթիվ հայաստանցիներին խորհուրդ է տալիս Սննդամթերքի անվտագության պետական ծառայության պետ Իշխան Կարապետյանը:
Պաշտոնավարման երեք ամիսների ընթացքում նա հասցրել է ախտորոշել ոլորտի խնդիրները:
«Այո, բավականին խնդիրներ ունենք, որոնք կապված են թե սննդի շղթայի օպերատորների գործունեության հետ, թե սպառողների պահանջատիրության հետ: Երկու դաշտում էլ բավականին մեծ աշխատանք կա կատարելու»,-Panorama.am-ի հետ զրույցում ասաց Իշխան Կարապետյանը:
Ծառայության ղեկավարի խոսքով, մի կողմից իրենք խնդիր ունեն արտադրողներին, արտադրությունն ու նրանց կողմից թողարկվող արտադրանքի որակական հատկանիշներն ու չափանիշները միջազգային չափանիշներին համապատասխանեցնելու, մյուս կողմից էլ խնդիր կա սպառողներին իրազեկելու, պետական վերահսկողությունն ավելի արդյունավետ դարձնելու:
ՍԱՊԾ պետին սննդամթերքի անվտանգության առկա մակարդակը չի բավարարում:
«Մենք ձգտում ենք լավագույնին, իրականացնում են բոլոր հնարավոր քայլերը, որպեսզի սպառողը մտնելով իրացման ցանցեր ստանա և որակյալ ծառայություն, և ունենա որակյալ արտադրանք: Սա մեկ օրվա աշխատանք չէ, պահանջում է հետևողականություն»,-ասաց նա:
Կարապետյանը թվարկում է անցած մոտ 100 օրվա ընթացքում արածները. «Նախաձեռնեցինք ու ստեղծեցինք ծառայությանը կից հասարակական խորհուրդ, որտեղ ներգրավված են տարբեր ՀԿ-ների, գիտական հաստատությունների աշխատակիցներ, որոնց հետ քննարկում ենք ծառայության կողմից այս կամ այն ոլորտում իրականացվելիք աշխատանքը, ձևավորում ենք երկխոսություն: Սա մեզ հնարավորություն է տալիս սպառողների հետ համաձայնեցված որոշումներ ընդունել օպերատիվ կերպով»:
Հաջորդ քայլը ծառայությունում գործող թեժ գծի (010 20 60 40) գործունեության մասով նոր մեխանիզմների ներդրումն է, ինչը, ըստ Կարապետյանի, հնարավորություն է տվել ավելի արագ արձագանքել ահազանգերին:
«Միայն վերջին 3-4 ամսվա ընթացքում 60-70 տոկոսով ավելացել են զանգերը նախորդ տարվա նույն ժամանակահատվածի համեմատ: Սպառողները հիմնականում ահազանգում են ապրանքի մակնշման թերությունների, իրենց իրավունքների խախտումների վերաբերյալ»:
ՍԱՊԾ պետը նշեց, որ բարելավել են սահմանային հսկողությունը, սննդամթերք ներկրողներն ու արտահանողները «Մեկ կանգառ, մեկ պատուհան»-ի շնորհիվ կարող են ստանալ բոլոր ծառայությունները՝ ներկայացնել իրենց բողոքները, կատարել բեռների ձևակերպում, ստանալ բուսասանիտարական ու անասանբուժական հսկողության ենթակա ապրանքների սերտիֆիկատը:
«Այս ամենն այժմ հնարավոր է իրականացնել մեկ վայրում: Սա հնարավարություն է տվել նվազեցնել սպառող-ՍԱՊԾ աշխատակից, տնտեսվարող-ՍԱՊԾ շփումը»,-ասաց Կարապետյանը:
Ծառայության ղեկավարը հավատացնում է, խստացվել է վերահսկողությունը հացի, մսի շուկաներում, խոշոր իրացման ցանցերում:
«Շատ շուտով կյանքի կկոչվեն տրանսպորտային միջոցների պարտադիր սանիտարական անձնագրերի տրամադրման գորոծողությունները: Դա հնարավորություն կտա մեզ հետևել, որ մեր երկրում սննդամթերքը տեղափոխվի օրենքով սահմանված պահանջներին համապատասխան: Կարևորում եմ պարտադիր սպանդանոցային մորթին անցնելու վերաբերյալ կառավարության որոշման ընդունումը»,-ասաց նա:
Հիշեցնենք, որ ՍԱՊԾ պետն այսօր մասնակցում էր իր ղեկավարած կառույցի և «Օքսֆամ» միջազային կազմակերպության կողմից կազմակերպված «Սննդամթերքի անվտանգությունը՝ սպառողի իրավունք» խորագրով ֆորումին: Այն կազմակերպվել էր սպառողի իրավունքի միջազգային օրվա առթիվ:
Հարակից հրապարակումներ`
- Վալերի Կորեշկով. Քննարկում ենք մանկնշումն ավելի ակնառու ու ընթեռնելի դարձնելու վերաբերյալ առաջարկները
- Վարչապետ. Սպառողական շուկայի զարգացումը բխում է թե´ պետական, թե´ հասարակական հատվածի շահերից
- Panorama.am-ը՝ սպառողների շահերը լավագույնս լուսաբանած առցանց լրատվամիջոց
- Վարչապետ. «Ուղղակի դա շանտղություն է»