Վարչապետը դժգոհեց համատիրությունների աշխատանքից
ՀՀ գործադիրի այսօրվա նիստում վարչապետ Կարեն Կարապետյանը բազմաբնակարան շենքերի կառավարման արդյունավետության վերաբերյալ հանձնարարական տվեց։ Նրա խոսքերով՝ բոլոր մարզեր այցերի ժամանակ այս հարցը հնչում է, ներկայումս հանրապետության շենքերի սեփականություն հանդիսացող գույքի շուրջ 67 տոկոսը կառավարվում է համապատասխան համատիրությունների կողմից, իսկ 33 տոկոսի մասով դրանք վերապահված են համայնքի ղեկավարներին:
«Մեր կողմից իրականացված ուսումնասիրությունների և համայնքների հնգամյա զարգացման ծրագրերի հետազոտությունների արդյունքում վերհանվել են մի շարք խնդիրներ բազմաբնակարան շենքերի բնակարանների ֆոնդի վերաբերյալ։ Հիմնական խնդիրը համապատասխան շենքերի համատիրությունների կողմից ոչ արդյունավետ կառավարումն է կամ առհասարակ դրա բացակայությունը: Ստեղծված իրավիճակը պայմանավորված է ինչպես գործնականում առկա ոչ արդյունավետ կառավարման, այնպես էլ օրենսդրական թերի կարգավորումներով»,- ասաց Կարեն Կարապետյանը:
Այդ իսկ պատճառով վարչապետը Երևանի քաղաքապետին, ՀՀ մարզպետներին հանձնարարեց համապատասխան համայնքների ղեկավարների հետ համատեղ երկամսյա ժամկետում ուսումնասիրել ու կառավարության աշխատակազմ ներկայացնել տեղեկատվություն բազմաբնակարանային շենքերի թվի, դրանց կառավարման ձևի, համատիրությունների, ինչպես նաև ընդհանուր սեփականություն հանդիսացող գույքի վերաբերյալ։
Քաղաքաշինության պետական կոմիտեի նախագահին էլ հանձնարարվեց մեկամսյա ժամկետում կառավարության աշխատակազմ ներկայացնել առաջարկություններ բազմաբնակարանային շենքերի կառավարման արդյունավետության բարձրացման, ինչպես նաև սեփականատեր-համայնք-պետություն, հնարավորության դեպքում ներդրող, համագործակցության շրջանակներում դրանց ընդհանուր բաժնային սեփականություն հանդիսացող գույքի վերանորոգման ու անվտանգ շահագործման մասով։
Վարչապետը Տարածքային կառավարման ու զարգացման, Արդարադատության նախարարներին, Քաղաքաշինության պետական կոմիտեի նախագահին ու Երևանի քաղաքապետին հանձնարարեց նախատեսված առաջարկությունները ստանալուն պես երկամսյա ժամկետում համատեղ քննարկել հանրապետության բազմաբնակարանային շենքերի կառավարման ոլորտում առկա խնդիրների լուծման տարբերակները և ներկայացնել համապատասխան առաջարկություն:
«Մենք կայացած համատիրություններ չունենք: Մենք պետությունով այս հանձնարարականի հիման վրա լայնամասշտաբ ծրագիր ենք անելու համայնքներում, որ մի անգամ բոլոր շենքերի խնդիրները լուծենք, հայտարարենք, որ վերջին անգամ ենք լուծում և այդ համատիրություններն այնպես կայացնենք, որ դրանից հետո էդ համատիրությունն աշխատի: Պետք է շատ համարձակ ռեֆորմների գնանք: Համատիրությունը կոլեկտիվ մի մարմին է, որտեղ ոչ մի պատասխանատվություն չկա և ոչ մի կառավարման որակ չկա: Դա ինչ-որ անհասկանալի մի բան է: Այդ իսկ պատճառով մենք պետք է համատիրության կառավարիչների այդ ինստիտուտը ստեղծենք, մեծացնենք, շատ համարձակ լինենք»,- ասաց Կարեն Կարապետյանը:
Լրահոս
Տեսանյութեր
«Ձեր սիրելի Ալիևը «Նոլդու Փաշինյան» երգը միացրած Արցախով պտտվում է». Բագրատ Սրբազանը՝ իշխանությանը
