Ձեր վստահելի աղբյուրը

Հայաստանի 1145 քաղաքացու շրջանում անցկացված հարցումների համաձայն՝ հարցվածների 98,5 տոկոսը տեղյակ է, որ ապրիլի 2-ին կայանալու են խորհրդարանական ընտրություններ:  Հարցման արդյունքները լրագրողներին ներկայացրեց հարցումն իրականացրած Gallup International Association-ի հայաստանյան ներկայացուցչության տնօրեն Արամ Նավասարդյանը:

Gallup International Association-ի հայաստանյան ներկայացուցչությունն իրականացրել է   հետազոտություն՝   «ԱԺ ընտրություններ -2017 (2-րդ փուլ) Քաղաքական Կուսակցությունները և Դաշինքների ցուցանիշներն առ մարտ 20-ն» թեմայով: Հետազոտությունն իրականացվել է մարտի 12-ից մարտի 19-ը Հայաստանի տարածքում:

Հարցվածների 46.6 տոկոսը հետևում է քաղաքական կուսակցությունների և կուսակցությունների դաշինքների կողմից իրականացվող քարոզարշավին:

Հարցին՝  «Որ քաղաքական կուսակցության կամ կուսակցությունների դաշինքի քարոզարշավն եք առավել շատ հանդիպել/տեսել», պատասխանել են՝ 73.7 տոկոս՝ «Ծառուկյան» դաշինք, 65.7 տոկոս՝ ՀՀԿ, 25.0 տոկոս՝ «Ելք», 19.1 տոկոս՝ «Օհանյան-Րաֆֆի‐Օսկանյան», 12.4-ական տոկոս՝ «Հայկական վերածնունդ», ՀՅԴ, 9.4 տոկոս՝ Կոմկուս, 7.7  տոկոս՝ «Ազատ դեմոկրատներ», 7.5 տոկոս՝ Կոնգրես-ՀԺԿ:

Հարցվածների 86.9 տոկոսը քարոզարշավին հանդիպել է հեռուստատեսությամբ, 18.8 տոկոսը՝ ֆեյսբուքում, 17.8 տոկոսը՝ բակերում, համայնքում հանդիպումների, նաև՝ բուկլետներ, պաստառներ, մամուլ, ռադիո, արտաքին գովազդ, կուսակցությունների կայքեր:

Հարցվածների 36.2 տոկոսը ծանոթ է քաղաքական ուժերի նախընտրական ծրագրերի հետ:

Հարցին՝  «Որ կուսակցության կամ կուսակցությունների դաշինքի նախընտրական ծրագրին եք ծանոթացել» պատասխանել են՝ 76.4 տոկոս՝ «Ծառուկյան» դաշինք, 65.1 տոկոս՝ ՀՀԿ, 23.1 տոկոս՝ «Ելք», 16.6 տոկոս՝ ՕՐՕ, 16.1 տոկոս՝ «Հայկական վերածնունդ», 13.5 տոկոս՝ ՀՅԴ, 10.8 տոկոս՝ Կոմկուս,  8.7 տոկոս՝ «Ազատ դեմոկրատներ»՝ 8.2 տոկոս՝ Կոնգրես-ՀԺԿ:

Հարցվածների 81.9 տոկոսը  ծանոթացել է  քաղաքական ուժերի նախընտրական ծրագրին հեռուստատեսության միջոցով, 30.6 տոկոսը՝ բուկլետների, 20.0 տոկոսը՝ ֆեյսբուքի, 16.9 տոկոսը՝ բակերում, համայնքում  հանդիպումների միջոցով, նաև՝ մամուլ, պաստառներ, արտաքին գովազդ, ռադիո, կուսակցությունների կայքեր:

Հարցվածների միայն 13.1 տոկոսն է մասնակցում քարոզարշավի ընթացքում կուսակցությունների և կուսակցությունների դաշինքների կողմից բակերում, համայնքներում իրականացվող հանդիպումներին:

Հարցին՝ «Որ կուսակցության կամ կուսակցությունների դաշինքի հանդիպումներին եք մասնակցել», պատասխանել են՝ 56.7 տոկոսը ՀՀԿ, 46.0 տոկոսը՝ «Ծառուկյան» դաշինք, 14.0 տոկոսը՝ «Ելք», 6.7 տոկոսը՝ «Հայկական վերածնունդ», 5.3 տոկոսը՝ ՕՐՕ, 4.7 տոկոսը՝ ՀՅԴ, 3.3 տոկոսը՝ Կոմկուս, 2.0-ական տոկոս՝ Կոնգրես-ՀԺԿ, «Ազատ դեմոկրատներ»:

«Չնայած նրան, որ «Ծառուկյան» դաշինքն ավելի լայնածավալ քարոզարշավ է իրականացնում,  ՀՀԿ-ի միջոցառումներին  մասնակցության ցուցանիշը մի փոքր ավելի բարձր է»,- ասաց Ա. Նավասարդյանը:

Հարցվածների 66.6 տոկոսը պատասխանել է, որ անպայման մասնակցելու է ընտրություններին, 26.1 տոկոսը՝ հավանաբար կմասնակցի:

«Տեսնում ենք, որ կա բավական մեծ մասնակցության ցանկություն, սակայն, մեր փորձից ելնելով, միայն այն մարդիկ, ովքեր ասել են, որ  անպայման մասնակցելու են, հիմնականում հենց նրանք են մասնակցում ընտրությանը, տատանվողներն   ինչ-ինչ պատճառներով կարող են չմասնակցել ընտրություններին: Ամեն դեպքում անգամ եթե 66-70 տոկոս  ցուցանիշ գրանցվի, բավականին բարձր ցուցանիշ է»,- նշեց նա:

Հարցին, թե «Ինչու եք քվեարկելու այս կամ այն կուսակցության օգտին», 27.5 տոկոսը պատասխանել է, որ այլընտրանք չունի, 6.1 տոկոսը՝ համակրում է կուսակցության լիդերին, 15.5 տոկոսը՝ գաղափարախոսության համար, 10.3 տոկոսը՝ ծանոթ է  նախընտրական ծրագրին, նաև՝ ունեն ծանոթներ այդ կուսակցությունում, ծանոթներն են խորհուրդ տվել, անդամակցում
են կուսակցությանը: