Այս անգամ կոալիցիա կազմելու խնդիր չի լինելու. Գագիկ Ծառուկյան
«Ժողովրդի պահանջը, դարդ ու ցավը մեկն է՝ աշխատանք են ուզում, թոշակների բարձրացում են ուզում, էդ բոլորին տեղյակ եմ, ծրագիրը կազմել ենք ու «Ծառուկյան» դաշինքի առաջնահերթություն համարվող 15 կետերն էլ վերաբերում են բոլորին՝ գյուղացուն, աշխատողին, ուսանողին»,- այս մասին այսօր Մասիսիում ներկայացնելով «Ծառուկյան» դաշինքի ծրագիրը՝ ասաց Գագիկ Ծառուկյանը:
Նրա խոսքերով՝ այս կետերը պետք է անհապաղ կյանքի կոչվեն, որպեսզի մարդիկ բարեկեցիկ կյանքով ապրեն:
Գագիկ Ծառուկյանն անդրադառնալով կուտակային կենսաթոշակային համակարգին՝ նշեց. «Պետական բյուջեից տարեկան 28 մլրդ դրամ հատկացվում է կուտակային համակարգին, որ 40 տարի հետո մարդիկ բարձր թոշակ ստանան, բայց մարդիկ հիմա չեն կարողանում ապրեն, ուր մնաց 40 տարի ապրի, որ մի հատ էլ մտածի բարձր թոշակի մասին, կամ այդ ժամանակ դրամն ի՞նչ կդառնա: Ես առաջարկում եմ սառեցնել կուտակային կենսաթոշակային համակարգի գործունեությունը»,- ասաց նա:
Դիմելով ներկաներին՝ Գագիկ Ծառուկյանն ասաց, որ պետք է հնարավորություն տալ իրենց, որպեսզի ապրիլի 2-ին կայանալիք խորհրդարանական ընտրությունների արդյունքներով ունենան 50+1 ձայն, որպեսզի պայման ու հնարավորություն ստեղծեն ժողովրդի համար:
Արտաշատ քաղաքում էլ նախընտրական հանդիպման ժամանակ «Ծառուկյան» դաշինքի ղեկավարն անդրադարձավ հետընտրական հնարավոր կոալիցիա կազմելուն:
«Եղեգնաձորում ինձ հարց են տալիս՝ եթե 50+1 չստանաք, ապա կոալիցիա կկազմե՞ք: Ասացի, որ եթե 50+1 չհավաքենք, ապա կորոշենք, բայց ո՞ւմ հետ՝ որոշողը ես եմ: Եթե 48 % ենք հավաքել, 50+1 ա պետք, կոալիցիա կկազմենք, բայց ես ասե՞լ եմ իշխանության հետ, ես ասել եմ, որ կորոշենք, թե ում հետ: Բայց գիտեմ, որ այս անգամ կոալիցիա կազմելու խնդիր չի լինելու՝ մենակ վերցնելու ենք, մենակ հաղթելու ենք, մեր բոլոր ծրագրերը իրականություն ենք դարձնելու: Իրենք փրփուրներից են կախվում, որ ինչ-որ տոկոս հավաքեն ու խորհրդարան մտնեն, մենք խորհրդարան մտնելու խնդիր չունենք, ես պարտք ունեմ իմ ժողովրդին: Պարտքը ոչ թե բարեգործությունն է, այլ պայման ու հնարավորություն ստեղծելն է ժողովրդի համար: Եթե մարդիկ կարողանան բարեկեցիկ կյանքով ապրեն, ուրեմն իմացեք, որ էս կյանքում ամենալավ գործը ես եմ արել»,- հայտարարեց Գագիկ Ծառուկյանը:
Լրահոս
Տեսանյութեր
«Ձեր սիրելի Ալիևը «Նոլդու Փաշինյան» երգը միացրած Արցախով պտտվում է». Բագրատ Սրբազանը՝ իշխանությանը