Ձեր վստահելի աղբյուրը

«Մենք ցանկանում ենք չինական ծրագրեր, լուրջ ներդրումներ բերել Հայաստան, որպեսզի արտադրությունը զարգացնենք, արտահանումը մեծացնենք»,-«Մեդիա Կենտրոն»-ի «Նախընտրական պայքար. ի՞նչ լուծումներ են առաջարկում քաղաքական ուժերը Արմավիրի մարզի խնդիրների համար» թեմայով քննարկման ժամանակ հայտարարեց «Հայկական վերածնունդ» կուսակցության ներկայացուցիչ  Գառնիկ Ղազարյանը:

Նա նշեց, որ արդեն ունեն պայմանավորվածություններ չինական մի քանի կազմակերպությունների հետ, դրանց ձեռքբերմանը նպաստել են իր որդիները, ովքեր սովորում են Չինաստանում:

«Չինացի գործարարները մտածում են ռիսկի գործոն կա՝ Հայաստանը պատերազմական վիճակում գտնվող երկիր է, փակ սահմաններ ունի: Բայց մենք ամեն ինչ անելու ենք, որ ներդրումները լինեն: Խոսքը 650 մլն դոլարի ներդրումների մասին է, որոնց մեծ մասը պետք է կատարվեն Արմավիրի մարզում»,-ասաց Ղազարյանը:

Կուսակցության ներկայացուցիչն այս ներդրումային ծրագրերն իրականանալու  համար կարևորում է իրենց քաղաքական ուժի հաջողությունը խորհրդարանական ընտրություններում, քանի որ ներդրողները ցանկանում են լուրջ գործընկերներ ունենալ:

Ղազարյանն ասաց, քարոզարշավի շրջանակում եղել է մարզի գրեթե բոլոր գյուղերում, խնդիրները շատ են՝ ոռոգման ջուրը, արտագաղթը, ճանապարհների վիճակը, գործազրկությունը, սոցիալական ծանր վիճակը:

Քննարկման մասնակից «ԵԼՔ» դաշինքի անդամ Շանթ Գրիգորյանը նախ դժգոհեց, արմավիրցիները պատռում են ընդդիմադիր ուժերի պաստառները, ինչը խանգարում է իրենց ձայնն ավելի լսելի դարձնելուն:

Ինչ վերաբերում է մարզի խնդիրներին ու դրանց լուծման վերաբերյալ ծրագրերին, Գրիգորյանն ընդգծեց, որ Արարատի ու Արմավիրի մարզերն առանցքային նշանակություն ունեն գյուղատնտեսության ոլորտի զարգացման համար:

«Մեր հողային ֆոնդերը հիմնականում գտնվում են այս երկու մարզերում: Այսօր մենք լուրջ խնդիր ունենք հողային ֆոնդի հետ՝ դրանք անփութորեն շահագործվել են, անհրաժեշտ աշխատանքներ չեն իրականացվել, քանի որ դա պահանջում է լուրջ ֆինանսական միջոցներ: Հողերի գրեթե 25 տոկոսն աղակալած է և պիտանի չէ մշակության համար, մոտավորապես 45 տոկոսը չի մշակվում»,-ասաց պատգամավորության թեկնածուն:

Նրա խոսքով, տարեցտարի վիճակն ավելի է վատանում, բայց դաշինքն առաջարկում է և պատկերացնում է խնդրի լուծման որոշակի ելքեր:

«Դրանք հիմնված են բարձր տեխնոլոգիաների կիրառման վրա: Մենք այս պարագայում հակված ենք ջերմոցային տնտեսությունների զարգացմանը, ցանցային տեխնոլոգիաների ներմուծմանը ու էկոլոգիապես մաքուր պարարտանյութերի արտադրության հիմնմանը»,-ասաց նա:

Հայաստանի Հանրապետական կուսակցության Ռազմիկ Մարգարյանը նկատեց, որ մարզում հրատապ լուծման կարիք ունի ոռոգման ջրի խնդիրը:

«Դրա հետևանքով մի շարք այլ խնդիրներ են ի հայտ եկել»,-ասաց նա:

ՀՀԿ-ականի խոսքով, կուսակցությունն այսօր խնդիր է դրել գյուղատնտեսական մթերքների վերամշակում իրականացնել, արդեն կան որոշակի շարժեր ու ծրագրեր:

«Ես օրինակ, կշեշտեի մի կարևոր ներդման մասին: Շուրջ 20 մլն դրամի ներդրում է կատարվելու բամբակի արտադրության գործարան հիմնելու համար, դրան կից անասունների կերի բազա է ստեղծվելու»,-ասաց նա՝ ավելացնելով, որ ծրագրերը շատ են: