Աշոտ Ահարոնյանն ՕՐՕ-ի հայտարարություններն անհեթեթ է որակում
Ոստիկանության հասարակայնության հետ կապերի և լրատվության վարչության պետ Աշոտ Ահարոնյանը ֆեյսբուքյան իր էջում արձագանքել է ՕՐՕ դաշինքի հայտարարություններին: Ահարոնյանը գրել է.
«ՕՐՕ դաշինքի նախընտրական շտաբը հայտարարություններ է տարածում, որ մարզերից իրենց ահազանգում են, թե իբր ոստիկանությունը խոչընդոտում է դաշինքի համակիրներին՝ գալու մայրաքաղաք՝ հանրահավաքի: Հայտարարում ենք, որ ՕՐՕ դաշինքի այս պնդումներն էլ չեն համապատասխանում իրականությանը: Ոստիկանությունը ուղևորափոխադրումներով չի զբաղվում: Կոչ ենք անում դաշինքի ներկայացուցիչներին՝ անհեթեթ հայտարարություններով ոստիկանությանը չվերագրել գործողություններ, որոնք իրականացնելու գործառույթ, նպատակ և անհրաժեշտություն համակարգը չունի»:
Քիչ առաջ դաշինքը ևս մեկ հայտարարություն տարածեց, ըստ որի «ոստիկանությունը շարունակում է խոչընդոտել Օհանյան-Րաֆֆի-Օսկանյան դաշինքի համակիրների մասնակցությանը այսօրվա հանրահավաքին. այժմ էլ՝ Վանաձոր և Գյումրի»:
«Ժառանգություն կուսակցության Լոռու մարզի պատասխանատու Գառնիկ Սահակյանը ահազանգում է, որ Սպիտակ հասնելուն պես իրենց վարորդներին զանգահարել են Ոստիկանության լոռու մարզային վարչությունից և հրահանգել ետ վերադառնալ և չտեղափոխել մարդկանց Երևան: Այս պահին մեքենաները կանգնած են Սպիտակի մատույցներում, իսկ դեպքի կապակցությամբ դաշինքի շտաբը տեղեկացրել է ԵԱՀԿ դիտորդներին, որոնք շտապում են դեպքի վայր: Մեքենաները կանգնած են «Նա խոդու» ավտոլվացման կայանի մոտ:
Գյումրիում Երևան ուղևորվող ավտոբուսների վարորդներից ոստիկանները վերցրել են հեռախոսների համարները և գրանցել են մեքենաների պետհամարանիշները՝ նրանց վրա ճնշում գործադրելու ակնհայտը միտմամբ, ինչը, սակայն ազդեցություն չի ունեցել և Օհանյան-Րաֆֆի-Օսկանյան դաշինքի համակիրները այժմ ուղևորվում են դեպի Երևան»,-մասնավորապես ասված է հաղորդագրության մեջ: