Ձեր վստահելի աղբյուրը

«Վեդու ջրամբարի կառուցման արդյունքում 6 հազար հեկտար հողատարածքում անխափան ոռոգում կլինի, որի 3500  հեկտարը մեխանիկական եղանակից կանցնի ինքնահոսի,  գործող պոմպակայաններից 11-ը կանջատվեն ամբողջությամբ, 4-ը կաշխատեն մասնակի»,- այսօր Վեդու ջրամբարի հիմնարկեքի արարողությունից առաջ լրագրողների հետ զրույցում ասաց Ջրային տնտեսության պետական կոմիտեի նախագահ Արսեն Հարությունյանը։

Նա տեղեկացրեց, որ շուրջ 1200 հեկտար նոր ոռոգելի հողատարածքներ կլինեն, էլէկտրաէներգիան կտնտեսվի տարեկան մոտ 19 մլն կիլովատ ժամ, կորուստները համակարգում կկրճատվեն մոտ 20-25 տոկոսով։

Վեդու ջրամբարի ընդհանուր ծավալը կազմելու է 29,4 մլն խորանարդ մետր, իսկ ջրատվությունը՝ 32,3 մլն խորանարդ մետր: Ջրամբարը կլցվի Վեդի և Խոսրով գետերի հեղեղային (ազատ) հոսքերով՝ ոռոգման շրջանից դուրս: Վեդու ջրամբարի համար նախատեսվում է կառուցել երկու պատվար, թասի մակերեսը 120 հեկտար է:
Փոխվարչապետ, միջազգային տնտեսական ինտեգրման և բարեփոխումների նախարար Վաչե Գաբրիելյանը նշեց, որ կառավարության ծրագրում ջրամբարաշինությունը որպես էական և կարևոր ուղղություն է ընդգրկված։

Նրա խոսքով՝ Վեդու ջրամբարից բացի կառուցվում է նաև Կապսի և Մաստարայի ջրամբարները, որոնցով էապես մեծացնելու են ջրի քանակը՝ մոտ միլիոն խորանարդ մետրով:

«Այս ջրամբարները կառուցելով մենք էական քայլ ենք անելու, որպեսզի ավելացնենք այդ թվում ինքնաշխատ կերպով ոռոգվող հողերի քանակը: Մենք ունենալու ենք ոռոգման հետևանքով շուրջ 320 հեկտար հողի ավելացում, որի 75 տոկոսը մեխանիկական կերպով»,-ասաց նա:

Վաչե Գաբրիելյանը նշեց, որ ջրամբարի համար ծախսելու են ընդհանուր առմամբ 90 միլիոն եվրո, որից Ֆրանսիական զարգացման գործակալությունը տրամադրել է 75 միլիոն եվրոն, իսկ 15 միլիոն եվրոն էլ՝ ՀՀ կառավարության համաֆինանսավորմամբ:

«Արդեն չորրորդ տարուց սկսած մեր նախանշված եկամուտները և օգհուտները լինելու են շուրջ ինը միլիոն եվրոյի չափով, որից շուրջ երեք միլիոնը լինելու է միայն էլեկտրականության գումարների խնայման տեսակետից: Մնացած օգուտները մենք ենթադրում ենք ստանալ ավելի բարձրարժեք մշակաբույսերի ոռոգմամբ, նաև ջրի ավելի մեծ օգտագործումով և ավելի մեծ տարածքներում՝ գյուղատնտեսության մշակմամբ»,- հավելեց փոխվարչապետը։