ՅՈՒՆԻՍԵՖ. Նիգերիայում, Սոմալիում, Հարավային Սուդանում և Եմենում երեխաներին օգնելու համար 255 մլն ԱՄՆ դոլար է հարկավոր
Հարավային Սուդանում սովի մասին հայտարարելուց ավելի քան մեկ ամիս անց, ՅՈՒՆԻՍԵՖ-ը մտահոգություն է հնչեցրել, որ ժամանակն արդեն սուղ է ավելի քան մեկ միլիոն երեխաների համար, ում կյանքը վտանգի տակ է Նիգերիայում, Սոմալիում, Հարավային Սուդանում և Յեմենում տիրող երաշտի և զինված հակամարտությունների պատճառով:
«Երեխաները չեն կարող սպասել սովի մասին մեկ այլ հայտարարության, որպեսզի մենք քայլեր ձեռնարկենք։ Մենք 2011թ.-ին, Սոմալիայի օրինակից սովորեցինք, որ մինչ սովի մասին հայտարարության տարածումը, անհայտ թվով երեխաներ արդեն հեռացել էին կյանքից: Դա այլևս չպետք է կրկնվի»,-ՅՈՒՆԻՍԵՖ-ի հայաստանյան գրասենյակի փոխանցմամբ՝ այս մասին նշել է ՅՈՒՆԻՍԵՖ-ի Արտակարգ իրավիճակների ծրագրերի տնօրեն Մանուել Ֆոնտենը։
ՅՈՒՆԻՍԵՖ-ի տվյալներով՝ այդ չորս երկրներում մոտ 22 միլիոն երեխա գտնվում է սոված, հիվանդ, տեղահանված և դպրոցից դուրս մնացած վիճակում: Ավելին, մոտ 1.4 միլիոն երեխաների կյանքն այս տարի մահվան ռիսկի տակ է թերսնուցման պատճառով:
ՅՈՒՆԻՍԵՖ-ին հարկավոր է մոտ 255 միլիոն ԱՄՆ դոլար այս երեխաներին տրամադրելու սնունդ, ջուր, ինչպես նաև առողջապահության, կրթության և պաշտպանության ծառայություններ գալիք ամիսների ընթացքում:
Ֆինանսավորման մեծ մասը, մոտ 81 միլիոն ԱՄՆ դոլար, կտրամադրվի սնուցման ծրագրերին, որպեսզի երեխաները սնուցման վիճակի գնահատում անցնեն և, ըստ անհրաժեշտության, ստանան հատուկ թերապևտիկ սնունդ:
Լրացուցիչ 53 միլիոն ԱՄՆ ղոլար կհատկացվի առողջապահության ծրագրերին, ներառյալ պատվաստումների իրականացմանը: Փորլուծային վտանգավոր հիվանդությունների կանխարգելման նպատակով մոտ 47 միլիոն ԱՄՆ դոլար կտրամադրվի մաքուր ջրի և հիգիենայի-սանիտարիայի պայմանների պահպանման ծրագրերի իրականացմանը:
Մնացած ֆինանսական միջոցները կուղղվեն հակամարտությունների և տեղահանության հետևանքով տուժված երեխաների պաշտպանությանն ու կրթության ծառայություններին: Առավել խոցելի ընտանիքներին կառաջարկվի սոցիալական աջակցություն նպաստների տեսքով:
Լրահոս
Տեսանյութեր
«Ձեր սիրելի Ալիևը «Նոլդու Փաշինյան» երգը միացրած Արցախով պտտվում է». Բագրատ Սրբազանը՝ իշխանությանը