Ձեր վստահելի աղբյուրը

Ախալքալաքում՝ կենտրոնական հրապարակի դիմաց, Ազատության փողոցում  նախօրեին մոտ ժամը 13:00-ին տեղի է ունեցել միջադեպ պարեկային ոստիկանության և վարորդի միջև, ում ոստիկանները տուգանել են: jnews.ge-ն գրում է, որ միջադեպը մոտ մի ժամով կասեցրել է երթևեկությունը գլխավոր փողոցում: Ախալքալաքի կենտրոնական փողոցում հավաքվել էին ավելի քան 100 մարդ: Երիտասարդ տղան վիճում էր ոստիկանի հետ, քանի որ նա վերցրել էր իր փաստաթղթերը և տուգանել այն բանի համար, որ նա առանց ամրագոտու էր երթևեկում: Սակայն, ըստ ականատեսների, երբ պարեկային մեքենան կանգնեցրել է և ոստիկանը խնդրել է ցույց տալ փաստաթղթերը, այդ ժամանակ տղան հանել է ամրագոտին և դուրս եկել մեքենայից:

«Ցույց տվեք բոլորին, թե նրանք ինչպես են աշխատում Ախալքալաքում: Սա անօրինականություն է»,- ասել են հավաքված քաղաքացիները:

Վարորդները պնդում են, որ պարեկային ոստիկանները հաճախ պարզապես անտեղի տուգանում են, մյուսները ասում էին, որ նման դեպքեր տեղի են ունենում շատ հաճախ: Եվ որ վարորդները հոգնել են չվաստակած տույժեր վճարելուց: Վկաները պահանջել են ցույց տալ պարեկային անձնակազմի տեսանյութերը, ապացուցելու համար այս կամ այն կողմի ճշմարտացիությունը:

Այդ ընթացքում, ոստիկանությունը և վարորդի կողմ կանգնած բնակիչները համաձայնել են, որ տեսանյութը պետք է վերանայվի, և եթե պարեկային անձնակազմը ճիշտ չէ, ներողություն կխնդրի վարորդից, բայց եթե հակառակն է և վարորդը խախտել է օրենքը, նա պարտավոր է ներողություն խնդրել պարեկային անձնակազմից և վճարել 50 լարի, թեև օրենքով նախատեսում է 40 լարի նման խախտումների համար: Այնուհետև պարեկային մեքենան հեռացել է:

Ախալքալաքում նմանատիպ միջադեպերը վարորդների և պարեկայինների միջև գնալով ավելի շատ են տեղի ունենում: Վարորդները հաճախ վիճարկում են պարեկային ոստիկանությանը սահմանած տուգանքները դատարաններում: