Ձեր վստահելի աղբյուրը

Wikipedia բաց ինտերնետ-հանրագիտարանի հիմնադիր Ջիմի Ուեյլսի նոր նախագծի նպատակը պայքարելն է ոչ հավաստի և կեղծ նորությունների դեմ:

«ՏԱՍՍ»-ը գրում է, որ հիմնական ուշադրությունը կհատկացվի հրապարակվող փաստերի ստուգմանը և աղբյուրների վերաբերյալ տեղեկատվության հավաքմանը։

«Wikitribune-ը նորություններ է մարդկանցից մարդկանց համար։ Առաջին անգամ պրոֆեսիոնալ լրագրողները և սովորական քաղաքացիները կկարողանան աշխատել միասին հավասարը հավասարի հետ, իրադարձությունների մասին գրել այն պահին, երբ դրանք տեղի են ունենում, դրանք խմբագրել առցանց ռեժիմով՝ մի ամբողջ միության աջակցությամբ, որը կզբաղվի փաստերի ստուգմամբ և վերաստուգմամբ»,- The Guardian-ը մեջբերել է  Ուեյլսի խոսքը:

Նա հայտել է, որ կայքն իր սեփական նախագիծն է և կապված չէ Wikipedia-ի և Wikimedia հիմնադրամի հետ և կտեղադրի լրատվական նյութեր, ինչպես նաև տարբեր հարցազրույցների վերծանումներ:

Հրապարակումից առաջ լրագրողները պարտավոր կլինեն ներկայացնել տեղեկատվության աղբյուրը, ինչպես նաև գրառումները (այդ թվում ձայնագրությունները), որոնց հիման վրա նրանք ստեղծում են իրենց նյութերը։