Արթուր Հովհաննիսյան. Հաճախ հանրությունը բախվում է տեսանկարահանող սարքերի խնդրի հետ
Անձնական տվյալների պաշտպանությունը պետք է լինի օրենքով սահմանված ամուր հիմքերի վրա: Այս մասին նշել է ՀՀ արդարադատության նախարարի ժամանակավոր պաշտոնակատար Արթուր Հովհաննիսյանը, ով մասնակցում էր «Անձնական տվյալների պաշտպանությունը և տեսահսկումը» թեմայով երկօրյա աշխատաժողովին:
ԱՆ հասարակայանության հետ կապերի վարչության հաղորդմամբ, միջոցառումը կազմակերպվել է ԱՆ Անձնական տվյալների պաշտպանության գործակալությունը, Եվրոպական հանձնաժողովի տեխնիկական օժանդակության և տեղեկատվության փոխանակման գործիք (ԹԱՅԵՔՍ) ծրագրի շրջանակում:
«Պատահական չէ, որ մեր պետությունն իր քաղաքականությունում ներդրել է անձնական տվյալների լիարժեք պաշտպանությունը: Մենք 2015 թվականին ընդունեցինք «Անձնական տվյալների պաշտպանության մասին» նոր օրենք, որը բավական ժամանակակից է, որտեղ հստակ և սպառիչ սահմանված են անձնական տվյալների պաշտպանության հիմքերը, բացի այդ նախատեսված են նաև այդ տվյալների մշակման օրինականության նկատմամբ հսկողություն իրականացնող մարմնի գործառույթները»,-ասել է Ա. Հովհաննիսյանը:
Նրա խոսքով, շատ հաճախ հանրությունը բախվում է տեսանկարահանող, լուսանկարահանող սարքերի խնդրի հետ, որոնք, առանց անձի թույլտվության, տեսանկարահանում են իրականացնում:
«Գործնականում կան խնդիրների, մեխանիզմների պակաս, ինչու չէ նաև փորձի պակաս, որոնք լուծելու համար մենք օգտվել ենք Եվրոպական միության աջակցությունից և հրավիրել միջազգային փորձագետների՝ իրենց փորձը մեզ ներկայացնելու համար»,-նշել է նախարարի ժամանակավոր պաշտոնակատարը:
ԱՆ անձնական տվյալների պաշտպանության գործակալության պետ Շուշան Դոյդոյանը նշել է, որ արդեն մշակվել և հանրությանն է ներկայացվել տեսահսկման մասին ուղեցույց, որտեղ ներառված են տեսահսկման հիմնական կանոններն ու սկզբունքները, ինչպես պետական, այնպես էլ մասնավոր հատվածներում:
Աշխատանքային հանդիպման ընթացքում ԵՄ 5 երկրների միջազգային փորձագետները կներկայացնեն իրենց երկրներում տեսահսկման կարգավորման իրավական ու պրակտիկ մեխանիզմները, կանդրադառնան ԵՄ իրավական դաշտին և եվրոպական երկրների համեմատական վերլուծությանը՝ տեսահսկման ոլորտում, ՀՀ օրենսդրությանը ԱՏՊ մասին, հանրային և մասնավոր տարածքներում տեսահսկմանը, տեսահսկման համակարգերի ընտրությանը, տեղադրմանը և կարգավորմանը, տեսագրությունների պահպանման ժամկետներին և այլն:
Միջոցառմանը մասնակցում են նաև ԵՄ հայաստանյան պատվիրակության համագործակցության բաժնի ղեկավար Հոա-Բին Աջեմյանը, պետական կառավարման մարմինների և շահագրգիռ հասարակական կազմակերպությունների շուրջ 50 ներկայացուցիչները:
Լրահոս
Տեսանյութեր
Հայաստանում փոքրահասակ բնակչության շրջանում բավականին տարածված է գժախոտով թունավորումը. Ռ. Աբովյան