Պաշտոնյաները ֆեյսբուքում՝ այո՞, թե՞ ոչ
Ինչպես արդեն տեղեկացրել ենք, ԱԺ նախագահ Արա Բաբլոյանն օրեր առաջ գրանցվել է «Ֆեյսբուք» սոցիալական ցանցում: Այսօր նա կատարել է առաջին գրառումը՝ քաղաքացիներին խոստանալով հանրության հետ կապը պահպանելու այս հնարավորությունն օգտագործել հնարավորինս ակտիվ։
Սոցիալական ցանցերում սեփական էջ ունենալու, այն վարելու նրբությունների ու արդյունավետության շուրջ Panorama.am-ի թղթակիցը զրուցել է տեղեկատվական անվտանգության փորձագետ Սամվել Մարտիրոսյանի հետ։
Panorama.am-Ինչպե՞ս կգնահատեք պետական պաշտոնյաների կողմից վերջին տարիներին կիրառվող այս պրակտիկան։
Սամվել Մարտիրոսյան-Սկզբունքորեն սա շատ լավ բան է, որովհետև օգտատերերի հետ հետադարձ կապի հնարավորություն է տալիս։ Մյուս կողմից, շատ պաշտոնյաներ թեև սոցիալական ցանցերում էջեր ունեն, սակայն իրենք չեն վարում։ Սա ավելի շուտ ձևական բնույթ է կրում։ Շատ դեպքերում էլ սոցիալական ցանցերը ծառայում են պաշտոնական տեղեկատվության զետեղելու հարթակ։
Panorama.am- Ձեր դիտարկումներով, հայ պաշտոնյաներից ով է սոցցանցերում առավել ակտիվ։
Սամվել Մարտիրոսյան-Որպես կանոն, առավել ակտիվ են լինում պաշտոնյաների մամուլի քարտուղարները։ Սոցցանցերում զգալի ակտիվ են պատգամավորները, իսկ ահա գործադիր մարմնի անդամներն ամենապասիվն են։ Մանավանդ, երբ Արմեն Աշոտյանը լքեց գործադիրը՝ հաստատվելով օրենսդիր մարմնում, կառավարությունն այս առումով «որբացավ»։
Panorama.am- Որքա՞ն ժամանակ է, ըստ Ձեզ, պաշտոնյայից խլում սոցցանցերում լինելը, բոլոր գրառումներին ակտիվորեն հետևելն ու արձագանքելը։
Սամվել Մարտիրոսյան-Շատ բան կախված է անհատից, թե անձնական էջ վարելը նրանից որքան ջանք ու ժամանակ կպահանջի։ Հնարավոր է՝ մեկը ոգևորվի, բոլոր մեկնաբանությունները կարդա ու որոշի պատասխանել դրանց, մյուսը, հակառակը, ցանցերում քիչ ժամանակ անցկացնի։ Անվիճելի է, որ որքան բարձր պաշտոն է զբաղեցնում մարդը, այնքան անտեղյակ է շրջապատող իրականությունից։
Panorama.am-Արդյոք պաշտոնյայի մամուլի կենտրոնը բավական չէ՞ հասարակության հետ կապը պահպանելու ու մոնիտորինգի համար։
Սամվել Մարտիրոսյան-Սոցիալական ցանցերը յուրահատուկ շփման հնարավորություն են տալիս, որը չի կարող ապահովվել մամուլի կենտրոնների միջոցով։ Սոցցանցերում շփումներն ավելի հասարակ են, ոչ պաշտոնական և ամենակարևորը՝ երկկողմանի, հետադարձ կապ են ենթադրում։ Իսկ ահա մամուլի ներկայացուցիչների հետ հանդիպումներն անհայտ է՝ հասարակության շրջանում ինչ արձագանք են ստանում։
Հ.Գ.-Մնում է ցանկանալ, որ ՀՀ-ում պաշտոնյաները շատ գործ չունենան, որ արդյունավետ վարեն իրենց սոցցանցերը:
Հիշեցնենք ԿԳ նախկին նախարարի օրինակը, ով շատ ակտիվ էր սոցցանցերում, բայց, քաղաքացիների համոզմամբ՝ կրթության ոլորտը մնաց չլուծված խնդիրներով:
Հարակից հրապարակումներ`
Լրահոս
Տեսանյութեր
Հայաստանում շատ են աշխատում, քիչ վճարվում. Աշխատանքի օրը՝ աշխատավորների խնդիրների մասին
