Կրճատվող ուսուցիչներին կտրամադրենք փոխհատուցում. նախարար
Դպրոցների օպտիմալացման ժամանակ կրճատումների թիվը չի կարող ավելի լինել, քան մի քանի հարյուր մարդ` ամբողջ հանրապետությունում»,- այս մասին ասաց ՀՀ Կրթության և գիտության նախարար Լևոն Մկրտչյանը՝ պատասխանելով լրագրողների հարցին՝ թե օպտիմալացման դեպքում 8-9 հազար ուսուցիչ կկրճատվի։
«Մենք ունենք քաղաքային դպրոցների հիմնախնդիր և դրանցում ունենք 30 տոկոս գերբեռնված և այդքան էլ թերբեռնված դպրոցներ: Մեր ամբողջ կրթական քաղաքականությունը հանգում է նրան, որ դպրոցը սկսի աշխատել մինչև ժամը 3-4-ը: Այսինքն` եթե մենք սկսենք մտածել` ինչպես անել, որ երկրորդ հերթը բեռնաթափելու ձևով վերաբեռնավորենք մեր մյուս դպրոցները` չեմ կարծում, որ այդտեղ ուսուցիչների շատ մեծ կրճատումների խնդիր կլինի: Խոսքը գնում է ավելի հավասարաչափ բաշխելու և դպրոցների զարգացման` ավելի համալիր ծրագիր ունենալու մասին»,-նշեց կրթության գերատեսչության ղեկավարը։
Նրա խոսքով, կլինեն փակվող դպրոցներ, օրինակ, եթե Երևան քաղաքում ունենք դպրոց, որն ունի 40 աշակերտ, իսկ 500-600 մետրի վրա մեկ այլ դպրոց կա, ապա դպրոցներից մեկը կփակվի, ուսուցիչների խնդիրն էլ կկարգավորվի. «Եթե չկարողանանք նրանց աշխատանքով ապահովել, պետք է տրամադրենք փոխհատուցում: Եթե փակվող դպրոցներ լինեն, սա կարևոր պայմաններից մեկը կլինի։ Մենք հիմա մշակում ենք դպրոցական համակարգի զարգացման համալիր ծրագիրը, որի նպատակակետը պետք է լինի, այն որ մեր հիմնական դպրոցները ծանրաբեռնված լինեն 300 աշակերտի շրջագծով։ Այդ դեպքում դպրոցը լիարժեք կաշխատի։ Դրան հասնելու ինչ ճանապարհ ունենք` յուրաքանչյուր դպրոց պետք է հասկանա` ինչպես պետք է ինքն իր հզորություններն ուժեղացնի, որ տարիների ընթացքում ինքն իրեն հասնի դրան: Այն դպրոցները, որոնք գերբեռնված են, նույնպես որակի անկում ունեն, սակայն այստեղ էլ առկա է հետևյալը` դպրոցն անուն ունի և ծնողն ուզում է, որ երեխան հենց այդ դպրոցում սովորի: Այս դեպքում մենք կարող ենք լրացուցիչ կորպուսներ տրամադրել դպրոցին»:
Լևոն Մկրտչյանը հավելեց, որ օպտիմալացման ժամանակ առաջինը փոքրաթիվ աշակերտներ ունեցող դպրոցների խնդիրը պետք է լուծել, բայց, միաժամանակ, պետք է հաշվի առնեն նաև տարածքային առանձնահատկությունները` կարողանալով երեխայի կրթությունն ապահովել հենց իր բնակավայրում:
Ինչ վերաբերում է ավագ դպրոցներին՝ նա նշեց, որ խոսքը կարող է գնալ 150 աշակերտ ունենալու մասին։
Հարակից հրապարակումներ`
- Այդ երեխաները մեղավոր չեն, որ իրենք ծնվել են մի տեղ, որտեղ 8 աշակերտ կա. Լևոն Մկրտչյանը՝ դպրոցների օպտիմալացման մասին
- Մասնագետները՝ դպրոցների օպտիմալացման հետևանքների մասին
- «Երբ մարդու ականջը հիվանդ է լինում, մարդուն չեն վերացնում, այլ տեղային բուժում են անում»
- «Գյուղը պահողը դպրոցն է». մտավորականներն օպտիմալացման մասին
- Վարչապետ. Դպրոցներում բացառել երկրորդ հերթը
Լրահոս
Տեսանյութեր
Հայաստանում փոքրահասակ բնակչության շրջանում բավականին տարածված է գժախոտով թունավորումը. Ռ. Աբովյան