Ձեր վստահելի աղբյուրը

«Իրազեկ և պաշտպանված սպառող» ՀԿ նախագահ Բաբկեն Պիպոյանի համար անհասականալի է՝ ինչպես է հայաստանյան իրացման ցանցում հայտնվել մանկական սննդամթերք, որը գրանցված չէ ԵԱՏՄ միասնական ռեեստրում:

Խոսքը լեհական արտադրության NUTRICIA Nutrilon ProNutra+ ապրանքանիշի մանկական սննդամթերքի մասին է, որի հայերեն մակնշման հետ կապված խնդիրներ էին հայտնաբերել քաղաքացիները:

Սպառողների շահերի պաշտպանությամբ զբաղվող ՀԿ ներկայացուցիչը զարմանալի է համարում մակնշման հետ կապված խնդիրը:

«Մանկական կերն այն ապրանքը չէ, որ ներկրումից հետո կարող էր այլ նպատակով օգտագործվել: Բնականաբար նախատեսված էր իրացման համար: Այս պարագայում հարց է առաջանում՝ ինչո՞ւ սահմանին մակնշումը չի ստուգվել և ինչպե՞ս առանց հայերեն մակնշման այն ներկրվել»,-Panorama.am-ի հետ զրույցում ասաց Բ. Պիպոյանը:

Կազմակերպության ղեկավարը չի բացառում, որ միասնական ռեեստրում չգրանցված ապրանքի ներկրվել է ապօրինի ճանապարհով: ԵԱՏՄ միասնական ռեեստրում չգրանցված ապրանք չեն կարող ներկրել միության անդամ երկրներից որևէ մեկը:

«Երրորդ երկրից ներկվող ապրանքն անպայման պետք է գրանցված լինի միասնական ռեեստրում: Այս ապրանքը, գրանցված չլինելով հանդերձ, մուտք է գործել Հայաստանի Հանրապետության տարածք, ինչը օրենքի կոպիտ խախտում է»,-ասաց ՀԿ նախագահը:

Նա  համարում է, որ նման ապրանքի ներկրման հնարավորության պատճառները պետք է պարզեն իրավապահ կառույցները:

«Ես հորդորում եմ, բոլոր այն մարդիկ, ովքեր վաղը կամ մյուս օրը պատրաստվում են ընդգրկվել կոռուպցիայի դեմ պայքարի հանձնաժողովում, առաջին լուրջ քննությունը հանձնեն և պարզեն, այստեղ կա՞ն կոռուպցիոն ռիսկեր, թե՞ ոչ: Եվ ընդհանրապես նման դեպքերում կոռուպցիոն երևույթներն ընդունելո՞ւ են, թե՞ ոչ, որովհետև փաստացի ունենք մի իրավիճակ, երբ ներմուծման ոչ ենթակա ապրանքը ներմուծվել է»,-հարցեր բարձրաձայնեց ՀԿ նախագահը:
Անդրադառնալով մանկական սնունդի անվտանգությանը, Պիպոյանը նշեց, որ այն փորձաքննության չեն ենթարկել, դրա մասին ոչինչ ասել չի կարող:

«Եթե անգամ աշխարհի բոլոր փորձաքննություններով պարզվեր, որ այս ապրանքն անվտանգ է, բայց վերջինս գրանցված չէ ռեեստրում, ապա դրա ներկրումը հանրապետության տարածք, արգելվում է»,-ասաց նա, ընդգծելով, որ նույն ընկերության այլ արտադրատեսակներ ռեեստրում գրանցված են, սակայն Հայաստանում վաճառվող այս մեկը՝ ոչ:

Ավելի վաղ ՍԱՊԾ-ն հայտնել էր՝  իրացման կետերում առկա՝ NUTRICIA Nutrilon ProNutra+ ապրանքանիշի մանկական սննդամթերքը թեև տարայի վրա ունի հայերեն մակնշում, սակայն որոշ տեղեկություններ ամբողջական են ռուսերեն տարբերակում և հայերեն ներդիրի մեջ:

Հղում կատարելով «Սննդամթերքի մակնշման մասին» Մաքսային Միության  022/2011 տեխնիկական կանոնակարգի պահանջներին՝ ՍԱՊԾ մասնագետները տնտեսվարողին ներկայացրել  են սպառողական տարայի կամ պիտակի վրա հայերեն մակնշման համար անհաժեշտ տեղեկատվությունը  (արտադրանքի անվանումը, արտադրման օրը, պիտանիության ժամկետը, պահման պայմանները) և ժամանակ տվել հայերեն մակնշումն ամբողջացնելու համար:

«Սլավ գրուպ» ՓԲԸ-ի կողմից ներմուծված NUTRICIA Nutrilon ProNutra+ մանկական սննդամթերքն արտադրվել է լեհական «Օպոլե» գործարանում՝ Նիդերլանդների պատվերով և նիդերլանդական տեխնոլոգիայով. տարայի վրա այդ մասին նշված է: