Ձեր վստահելի աղբյուրը

«Դուք կրթության նախարարից, նախարարությունից լսե՞լ եք օպտիմիզացիայի, հազարավոր մասնագետների կրճատման մասին: Մենք այդպիսի խնդիր չենք դրել, նման բան չենք պատկերացնում»,-օպտիմալացման մասին հարց ուղղած պատգամավորին պատասխանելիս ասաց ԿԳ նախարար Լևոն Մկրտչյանը:

Նա ասաց, որ խոսքը վերաբերում է քաղաքային դպրոցներին. «Մենք ելնում ենք ոչ թե ֆինանսական միջոցներից կամ երեխաների թվի պակասից, այլ՝ կրթության որակից: Որպեսզի կրթության որակ լինի, անհրաժեշտ է, որ լիարժեք դասարան լինի»:

Նա օրինակ բերեց Կոնդի դպրոցը, որն ունի 620 աշակերտ. «Հիմա 60-ը բաժանեք 9-ի: Կրթության որակի խնդիր ունե՞նք, թե՞ չէ: Մենք նայել ենք, Երևանում նման խնդիր ունեն Կույրերի դպրոցը, Կոնդինը, Նորագյուղինը, և Գրբոյեդովի անվան դպրոցը»:

Մյուս դպրոցների համար դեռ հստակ ծրագիր չկա, մշակման փուլում է:

«Մինչև 2022 թիվը ցանկանում ենք հնարավորություն տալ, որ դպրոցներում աշակերտների թիվը հասնի 300-ի: Երևանում գերծանրաբեռնված դպրոցները կազմում են 30 քանի տոկոս, թերծանրաբեռնվածները՝ էլի 30 քանի տոկոս: Սրա մասին է խոսքը»,-հավելեց նախարարը:

Ինչ վերաբերում է գյուղական դպրոցներին, ապա Մկրտչյանի խոսքով, շուրջ 400 գյուղական դպրոց  100-ից քիչ աշակերտ ունի:

«Սա իսկապես լուրջ քննարկման հարց է: Մեկ աշակերտը 10 մլն դրամ է  նստում: Բայց խնդիրը նույնիսկ  այն չէ, որքան հարցը, թե ո՞նց որակ տանք: Այս խնդիրը դեռ քննարկման փուլում է»,-ասաց նա:

Լևոն Մկրտչյանը նշեց, որ ուսուցիչների համար ֆինանսների նախարարությունն օպտիմալ բյուջե է տալիս, սակայն դպրոցներում է  որոշվում դրույքաչափը:

«Դպրոցներում կես, քառորդ, 0.75 դրույքով աշխատում են: Այստեղ էլ որակի անկում ենք սկսում ունենալ, որովհետև ուսուցիչն աշխատում է կես դրույքով, որպեսզի երեխաներին տանի ռեպետիտորությամբ զբաղվի»,-ընդգծեց նա: