Ձեր վստահելի աղբյուրը

«Հասկանալի է, որ այս հարցում գյուղատնտեսության, բնապահանության  խնդիրները շաղկապված են: Մի կողմից կա Սևանա լճի էկոհամարգի պահպանման խնդիր, մյուս կողմից ցանքատարածքների  ոռոգման անհրաժեշտություն»,- Ազգային ժողովի արտահերթ նիստում  «Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին» ՀՀ օրենքում լրացումներ կատարելու մասին» օրենսդրական նախագծի քննարկմանն ասաց «Ելք» խմբակցության անդամ Լենա Նազարյանը:

Նա նշեց, որ ոռոգման համակարգերի մաշվածության պատճառով տեղի են ունենում ջրի կորուստներ և որպեսզի կորուստները նվազեցվեն, համակարգերի վերանորոգման համար կառավարությունն ամեն տարի գումար է տրամադրում:

«Չնայած հատկացումներին՝ վերահսկիչ պալատի 2015 թվականի ոլորտին վերաբերող ընթացիկ հաշվետվության համաձայն, ջրի կուրուստների ցուցանիշը ոչ միայն չի նվազել, նաև աճել է: Նաև այստեղ ասվեց, որ 54-55 տոկոս ջրի կորուստ է լինում: Եթե դա իրոք այդպես է, ապա մեղավոր անձիք պետք է պատասխանատվության ենթարկվեն ոռոգման համակարգերի վերանորոգան համար հատկացված գումարների վատնման համար: Եթե հիմա հաշվարկենք Սևանա լճի 270 միլիոն խ/մ ջրառը, ապա ի՞նչ՝ 121- 148 միլիոն խ/մ ջուր կորելո՞ւ է:

Իրականում դժվար է պատկերացել, որ այդ քանակությամբ ջուր կարող է կորել կամ գոլորշիանալ: Մենք կարծում ենք, որ այստեղ կան կոռուպցիոն ռիսկեր: Ջրօգտագործման ընկերությունները հանրային ռեսուրսից անօրինական փող են աշխատում, մինչդեռ օրինագծում նշված է, որ կոռուպցիոն ռիսկեր նախագիծը չի պարունակում»,- ասաց Լ. Նազարյանը:

Նա իր ելույթի վերջում պատգամավորը նշեց. «Վերջին դիտարկումս վերաբերում է նախագծի հարակից զեկուցող բնապահպանության նախկին նախարար Արամ Հարությունյանին: Շորժա գյուղից դեպի Արտանիշ արգելոցը տանող ճանապարհին, լճի ափից մի քիչ հեռու, 2009 թվականից կառուցված է մի առանձնատուն, գյուղացիների վկայությամբ պատկանում է Արամ Հարությունյանին:

Բետոնե հիմքի վրա կառուցված շինությունը գտնվում է  1900 մետր բացարձակ նիշի վրա, մինչդեռ 1903 մետրն այն նիշն է ցամքի վրա, որից դեպի ջուրը տանող տարածքը պետք է ազատ լինի ջրի տակ անցնելու համար: Այս կառուցապատումը ժամանակին օրենքի կոպիտ խախտում էր: Հիմա պարզ է, որ Սևանա լճի ջրառի վերաբերյալ հարակից զեկուցողի ներկայացրած ցանկացած տվյալ հավատ չի ներշնչում: Մարդիկ չեն դադարում խոսել, որ ջրառի նպատակը մնում է ափամերձ տարածքներում անօրինական շինությունների պահպանումը: Իրավունք ունեն այդպես մտածելու: Այս նախագիծը կոռուպցիայի, հանրային ռեսուրսի վատնման և անպատասխանատու կառավարման ևս մեկ օրինակ է, հետևանք»:

Իր ամփոփիչ ելույթում հիմնական զեկուցող ՀՀԿ խմբակցության անդամ Արամ Հարությունյաննարձագանեց. «Անդրադառնամ Շորժայում իմ ունեցած շինության վերաբերյալ մտքին, որը բնութագրվեց որպես առանձնատուն: Այն հիմնականում իրենից ներկայացում է մետաղական, թեթև կոնստրուկցիա տեղափոխման հնարավորությամբ, որին լճի բարձրացման վտանգ չի սպառնում: Լինելով ոչ հիմնական կառույց՝ անհրաժեշտության դեպքում կարող է տեղափոխվել ցանկացած նիշի»: