Ձեր վստահելի աղբյուրը

ՀՀ գյուղատնտեսության նախարարությունը կիրականացնի նոր ծրագիր, որը վերաբերում է մթերման դիմաց մատչելի վարկեր տրամադրելուն: Ինչպես այսօր լրագրողների հետ հանդիպման ժամանակ ասաց ՀՀ գյուղատնտեսության նախարար Իգնատի Առաքելյանը, լինում են ձեռնարկություններ, որոնց ֆինանսական միջոցները չեն ներում, որպեսզի մթերումներից հետո անմիջապես վճարեն գյուղացիական տնտեսությունների գումարները, ուստի նախատեսում են առաջին անգամ նմանատիպ ծրագիր իրականացնել:

«Այն մեզ համար ամենակարևոր խնդիրներից մեկն է, քանի որ գյուղացին աշխատանքները կատարելու համար վարկ է վերցնում, և նրան հարկավոր է բերքը հանձնելուց հետո ժամանակին վարկը ստանալ»,- նշեց նախարարը:

Ըստ Իգնատի Առաքելյանի՝ պիլոտային ծրագիրը կիրականացնեն փոքր գումարի սահմաններում, և օգոստոսին արդեն մոտ 2.5 մլրդ դրամի չափով վարկեր կտրամադրեն:

«Նախ կտեսնենք, թե ինչպիսին է ծրագրի պահանջարկը: Պայմանն այն է, որ գումարը հատկացվելու է անմիջապես գյուղացիական տնտեսություններին: Մթերող ընկերությունը լինելու է վարկառուն, սակայն վարկի գումարը տրամադրվելու  է գյուղացիներին՝ համաձայն նրանց հետ կնքված մթերման պայմանագրերի»,- ընդգծեց նախարարը:

Իգնատի Առաքելյանը նշեց նաև, որ նախօրոք կգնահատեն ընկերությունների վարկունակությունը և կընտրեն այն բանկերը, որոնք կտրամադրեն մատչելի վարկեր, որն էլ կսուբսիդավորի պետությունը:

Գյուղատնտեսության նախարարը հայտնեց, որ  կա ևս մեկ ծրագիր, որը նույնպես վերաբերում է գյուղացիական տնտեսություններին մատչելի տոկոսադրույքով վարկեր տրամադրելուն:  Այն կիրականացվի օգոստոսից կամ սեպտեմբերից:

Մասնավորապես, ծրագրով նախատեսվում է վարկի տրամադրման նվազագույն շեմը դարձնել 3 մլն դրամը, իսկ առավելագույնը` 10 մլն դրամը:

«Նախկինում տարեկան շուրջ 15 մլրդ դրամ էր տրամադրվում վարկային ծրագրի իրականացման համար, և այդ պատճառով բանկը տրամադրում էր փոքր ծավալով, որպեսզի ավելի շատ շահառուներ լինեին: Հիմա փորձելու ենք նվազագույն շեմը դարձնել 3 մլն դրամը: Մենք կներառենք մի բաղադրիչ, ըստ որի փոքր և միջին տնտեսությունները պետք է ներկայացնեն իրենց ծրագրերը»,-ասաց նախարարը` հավելելով, որ անհրաժեշտության դեպքում կկազմակերպեն վերապատրաստում կամ ուսուցանում` ներգրավելով մասնավոր ընկերություններին դասընթացների կազմակերպման համար: