Ձեր վստահելի աղբյուրը

«Մենք մեր կարծիքը շատ հստակ ունենք, դա նույնիսկ քննարկման ենթակա հայտարարություն չէ, ամոթ էլ է այդ մասին քննարկում ծավալել, Հայաստանի Հանրապետության միակ պետական լեզուն հայերենն է, միակ պաշտոնական լեզուն մնալու է հայերենը»,- այս մասին այսօր ՀՀԿ գործադիր մարմնի նիստից հետո լրագրողների հետ զրույցում ասաց ԱԺ փոխնախագահ, ՀՀԿ խոսնակ Էդուարդ Շարմազանովը՝ անդրադառնալով ՌԴ պետդումայի խոսնակ Վյաչեսլավ Վոլոդինի առաջարկին՝ Հայաստանում ռուսական լեզվին պետական կարգավիճակ տալուն:

Ինչ վերաբերում է «Ելք» խմբակցության պատգամավոր Էդմոն Մարուքյանի՝ ԵԱՏՄ-ից դուրս գալու առաջարկությանը,  Էդուարդ Շարմազանովը նախ նշեց, թե իր համար նորություն չէ, որ «Ելք» դաշինքի որոշ գործիչներ, կոնկրետ, «Լուսավոր Հայաստանը» իր քաղաքական պլատֆորմում չեն ողջունում Հայաստանի՝ Եվրասիական տնտեսական միությանն  անդամակցումը։

«Հայաստանի անդամակցումը ԵԱՏՄ-ին միայն քաղաքական որոշում չէր, դա որոշում է, որն ամրագրված է հստակ տնտեսական հաշվարկներով: Եթե կան քաղաքական ուժեր, որոնք որ նման կոչեր են անում, ավելի լավ կլինի ոչ թե զգացմունքային, էմոցիոնալ հարթության վրա խոսեն, այլ  կոնկրետ այլընտրանք առաջարկեն»,- ընդգծեց ՀՀԿ խոսնակը:

Նրա խոսքերով՝  հստակ հաշվարկներ են արվել, թե ինչ կշահի գյուղացին, ներդրողը, զբոսաշրջությունը, տնտեսությունը ԵԱՏՄ-ին անդամակցելու դեպքում. «Մենք միացել ենք 170 միլիոնանոց շուկային, այս տարվա ընթացքում 23 տոկոսով ավելացել է արտահանումը, որի առյուծի բաժինն ընկնում է ԵԱՏՄ երկներին, 30 տոկսով ավելացել է զբոսաշրջիկների թիվը, որի մեծամասնությունը ԵԱՏՄ երկրներից է, Արցախում ավելացել զբոսաշրջիկների թիվը, որոնց մեծ մասը կրկին ԵԱՏՄ երկրներից են:  Այսինքն՝ մենք չպետք է անենք քաղաքական հայտարարություններ առանց լուրջ հիմնավորումների»:

Էդուարդ Շարմազանովը նշեց նաև, որ ԵԱՏՄ-ին անդամակցությունը դրական է, քանի որ սա նոր ներդրողներ ներգրավելու շատ լավ ակումբ է. «Մեկ այլ բան է, որ ներդրողը 3 միլիոնանոց շուկայում է, լրիվ այլ բան է, որ ներդրողը 170 միլիոնանոց շուկայում է: Իհարկե կան նաև խնդիրներ, իսկ ո՞ր միությունում խնդիրներ չկան, ԵՄ-ո՞ւմ, ՆԱՏՕ-ո՞ւմ չկան»:

ՀՀԿ խոսնակը նաև հիշեցրեց, որ  ԵԱՏՄ-ին անդամակցության օգտին միայն ՀՀԿ-ն չէ քվեարկել: «Սա եզակի հարցերից է, որ խորհրդարանական մեծամասնությունն է կողմ քվեարկել, ընդ որում՝ նաև ընդդիմադիր պատգամավորներից: ԵԱՏՄ-ից դուրս գալու կոչեր անողները գյուղացիներին հարցրե՞լ են, քաղաքացիներին հարցրե՞լ են, թե ինչքան վնասներ են նրանք կրելու: Բացի այդ, ԵԱՏՄ-ին անդամակցելով գազի գինը մի քանի անգամ նվազել է»,- ասաց Էդուարդ Շարմազանովը:

Ինչ վերաբերում է ՌԴ-ում գտնվող հայերի վարորդական իրավունքների չեղարկման հարցին, ՀՀԿ խոսնակն ասաց, որ այդ հարցը  բոլոր մակարդակներով բարձրացվել է, ԵԱՏՄ-ն նույնպես դիմել է ռուսական կողմին, որպեսզի բացառություն լինի Հայաստանի քաղաքացիների համար:

«Այո, բոլոր միություններում կան խնդիրներ, բայց դրանցով հանդերձ ԵԱՏՄ-ին անդամակցությունն այսօր այլընտրանք չունի: Այն խոսակցությունները, թե Հայաստանը պետք է դուրս գա Միությունից, դրանք չեն բխում մեր տնտեսական շահերից: Ի վերջո Հայաստանը  չի անդամակցել ԵԱՏՄ-ին որևէ պետությանը լավություն անելու համար, սա արել ենք՝ հաշվի առնելով մեր պետական շահը»,-ընդգծեց Էդուարդ Շարմազանովը: