Արևելքում բնակվողներն ավելի արագ են ընդունում նոր տեխնոլոգիաներն Արևմուտքում բնակվողների համեմատ. զեկույց
Ասիայում և Մերձավոր Արևելքում բնակվող մարդիկ ավելի արագ են ընդունում նոր տեխնոլոգիաները դրանց հանդեպ ունեցած ավելի մեծ վստահության և լավատեսության շնորհիվ՝ արևմուտքում բնակվող մարդկանց համեմատ: HSBC-ի՝ «Վստահությունը տեխնոլոգիաների հանդեպ» նոր զեկույցը ներկայացնում է 11 երկրում ավելի քան 12,000 մարդկանց շրջանում անցկացված հետազոտության արդյունքը, որի համաձայն նոր տեխնոլոգիաների հանդեպ վստահությունը և դրանց ընդունումը մեծապես տարբերվում է ողջ աշխարհում: HSBC-ի՝ «Վստահությունը տեխնոլոգիաների հանդեպ» նոր զեկույցը տարածել է HSBC Հայաստանի հասարակայնության հետ կապերի բաժինը:
Նոր տեխնոլոգիաներ և սովորույթներ
Զեկույցի համաձայն՝ հարցման մասնակիցների 80%-ը կարծում է, որ տեխնոլոգիական լուծումներն ավելի են հեշտացնում իրենց կյանքը, իսկ գրեթե երեք քառորդը՝ 70%-ը, տվյալների անվտանգությունը վստահում է փորձված միջոցներին՝ գաղտնաբառերին:
Հետազոտությունը պարզել է, որ մարդիկ վստահում են դրամական ռեսուրսների կառավարման փորձված միջոցներին, որոնցից ամենատարածվածներն են՝
1. օնլայն բանկինգը բանկի կայքի միջոցով (67%),
2. բանկոմատները (55%),
3. այցելություններ մասնաճյուղեր (41%):
Հետազոտության համաձայն, մարդիկ կարծում են, որ անձնական տվյալների անվտանգության ապահովումը բանկի կողմից նույնքան կարևոր է, որքան ֆինանսական միջոցների անվտանգությունը (87%): Այնուամենայնիվ, մարդիկ վստահում են փորձված միջոցների՝ իրենց ինքնությունը հաստատելով գաղտնաբառերի միջոցով (70%). նրանցից միայն յուրաքանչյուր հինգերորդն է (21%) օգտվում մատնահետքի նույնականացման տեխնոլոգիական լուծումներից, և ընդամենը 6%-ն է օգտվում ձայնային ճանաչման տարբերակից, անկախ անվտանգության ապահովման մակարդակից:
Դրամական միջոցների կառավարման տեսակետից Չինաստանի (48%) և Հնդկաստանի (50%) բնակիչներն առավել հավանական է, որ կհամաձայնեն այն տեսակետի հետ, որ համակարգիչներն արդեն կարող են տրամադրել առավել ճշգրիտ խորհրդատվություն, քան մարդիկ, մինչդեռ Կանադայում և Միացյալ Թագավորությունում մարդկանց ընդամենը 18% և 21%-ն է համաձայն այս տեսակետի հետ: Սմարթֆոններով կամ պլանշետային համակարգիչներով օնլայն բանկինգն ամենաքիչ տարածվածն է Գերմանիայում, որտեղ հարցվողների ընդամենը 4%-ն է այն համարում բանկինգի իրենց նախընտրած տարբերակը՝ համեմատած ՄԱԷ-ի և Հոնկոնգի հետ (15% և 9%):
Մյուս կողմից, Չինաստանում և Գերմանիայում մարդկանց 50%-ը մինչ օրս ունի ֆաքս, իսկ Հնդկաստանի բնակիչների 39%-ը դեռևս ունի փեյջեր, ինչը հետազոտությանը մասնակցած երկրներում ամենամեծ տոկոսն է կազմում:
Հայաստանում վեբ և մոբայլ հաղորդակցության լայն հասանելիությունը խթանում է նորարարական տեխնոլոգիաների օգտագործումն ու դիվերսիֆիկացիան: 2015 թ-ի վերջի դրությամբ բջջային բաժանորդների թիվը 3.4 մլն էր, իսկ ինտերնետի հասանելիությամբ բաժանորդների թիվը` 2.1 մլն:
Միտումներ և հեռանկարներ
Տեխնոլոգիական լուծումները ներթափանցում են բոլոր ոլորտներ, և բանկային ոլորտը բացառություն չէ, թեև այս միտումներն աշխարհագրական տեսանկյունից ոչ հավասարապես են զարգանում:
HSBC-ի հետազոտության համաձայն, արևելքում լայն տարածում ունեցող մատնահետքի նույնականացման տեխնոլոգիայի արագ ընդունումը փաստում է զարգացման տարբեր հեռանկարների մասին: Մատնահետքի նույնականացման տեխնոլոգիան ամենաարագ կերպով ընդունվել է Չինաստանում (40%) և Հնդկաստանում (31%), իսկ ՄԱԷ-ն հետազոտությանը մասնակցած երկրների երրորդ տեղում է (25%): Մինչդեռ, Ֆրանսիայում ու Գերմանիայում մարդկանց ընդամենը 9%-ը, իսկ Կանադայում բնակիչների 14%-ն է օգտվում մատնահետքի նույնականացման տեխնոլոգիայից:
Հարցվողների 72%-ը կարևորում է բանկի աշխատակիցների անհատական խորհրդատվությունը լավագույն տարբերակի ընտրության հարցում: Հետազոտությանը մասնակցած երկրներում բանկային ծառայությունների նկատմամբ հիմնական ակնկալիքները երեքն են նոր տեխնոլոգիաները ներկայացնելիս՝
• վստահ լինել, որ հաճախորդները գիտեն՝ ում կարող են դիմել աջակցության համար տեխնոլոգիական լուծումների հետ որևէ խնդիր ունենալու դեպքում (74%),
• խորհրդատվություն տրամադրել հաճախորդներին այն մասին, թե ինչպես նոր տեխնոլոգիան կբավարարի իրենց պահանջները (65%),
• առցանց ապահովել խորհրդատվություն և տեղեկատվություն (57%):
Հայաստանում հեռահաղորդակցության և տեղեկատվական տեխնոլոգիաների ոլորտում եկամտի զգալի աճ է գրանցվել. 2017թ-ի դրությամբ եկամուտը կազմում է 60,572.9 մլն դրամ՝ 2016թ-ին 52,997.2 դրամի համեմատ՝ արտացոլելով ոլորտի զարգացման ներուժը: Ոլորտային զարգացումից բացի՝ կառավարության աջակցությամբ զարգանում է նաև էլեկտրոնային կառավարման ոլորտը՝ ապահովելով տեղեկատվության և տվյալների կառավարման հասանելիություն այնպիսի կայքերի միջոցով, ինչպիսիք են e-register.am, www.e-gov.am, www.e-cadastre.am:
Այս միտումները դրական հեռանկարներ են ապահովում Հայաստանում նոր տեխնոլոգիաների օգտագործման վերաբերյալ բազմաթիվ ոլորտներում՝ ներառյալ բանկային ոլորտը:
HSBC Հայաստանի բանկային մանրածախ ծառայությունների և հարստության կառավարման գծով ղեկավար Միհրան Մուրադյանը մեկնաբանության համաձայն, HSBC-ի զեկույցի համաձայն՝ ավելի շատ սպառողներ հատկապես արևելքի երկրներում վստահում և օգտվում են տեխնոլոգիաներից իրենց տվյալների ու ֆինանսական միջոցների կառավարման համար. «Տեխնոլոգիաներն առավել տարածում են գտնում մեր առօրյա կյանքում՝ վերափոխելով տարբեր ոլորտներ, այդ թվում նաև բանկային ոլորտը: Ներկայումս ականատես ենք լինում, թե ինչպես է այս միտումը տարածում գտնում նաև Հայաստանում»:
Լրահոս
Տեսանյութեր
«Տավուշը հանուն հայրենիքի» շարժման անդամները քայլերթով գալու են Երևան. Բագրատ Սրբազան