Եթե ես չգիտեմ, վստահ եմ՝ 100 հազարավոր քաղաքացիներ նույնպես չգիտեն. Մարուքյան
Ազգային ժողովում այսօր քննարկման է դրվել «Ինտերնետով հրապարակային և անհատական ծանուցման մասին» Հայաստանի Հանրապետության օրենքում լրացում և փոփոխություն կատարելու մասին օրենքի նախագիծը։
Հարակից զեկուցող Պետաիրավական և մարդու իրավունքների պաշտպանության հարցերի մշտական հանձնաժողովի անդամ Էդմոն Մարուքյանը նշեց, որ այս օրինագծով կառավարությունն առաջարկում է եղած ծանուցման համակարգին ավելացնել նաև ինտերնետային ծանուցման տարբերակը։
Մարուքյանը մանրամասնեց՝ նախատեսում է, որ իշխանությունները կարող են այս կամ այն փաստաթղթերը, այդ թվում՝ դատական ծանուցումները, ուղարկել քաղաքացու էլեկտրոնային փոստին։ Եթե քաղաքացին այն չի կարդում, ծանուցումը կուղարկվի սովորական նամակով։
«Հանձնաժողովում մանրամասն քննարկել ենք նախագիծը և ունենք մեկ մտահոգություն։ Բանավոր կերպով առաջարկություն ենք արել և հիմա կառավարության հետ կա քննարկում, որոշակի համաձայնություն կարող է լինել։ Մեր մտահոգությունը հետևյալն է՝ ՀՀ-ում այս օրենքի վերաբերյալ պետք է իրականացվեն ծանուցման աշխատանքներ։ Պետք է իրազեկվեն քաղաքացիներն այն մասին, որ դուք ունեք էլեկտրոնային պաշտոնական հասցեներ, որոնց վրա այսուհետ ստանալու եք ծանուցումներ։ Դրանք կարող են լինել ձեր կողմից թույլ տված վարչական իրավախախտումների վերաբերյալ կամ պետական մարմինների հետ ձեր իրավահարաբերությունների վերաբերյալ, և դուք պետք է այդ էլեկտրոնային փոստային հասցեները ստուգեք։ Օրինակ ես չգիտեի, որ անհատական քարտի հիմքով ունեի նաև էլհասցե և պետք է հասցեն ստուգեմ։ Այդ տեղեկությունը եթե ես չգիտեմ, վստահ եմ՝ 100 հազարավոր ՀՀ քաղաքացիներ նույնպես չգիտեն»,-ասաց հարակից զեկուցողը։
Նաև ասաց, որ հանձնաժողովը միաձայն առաջարկությամբ է հանդես եկել, որպեսզի օրենքի ընդունման ժամկետն ավելի ուշ ուժի մեջ մտնի, իսկ մինչ այդ պահը արդարադատության նախարարությունը իրականացնի ծանուցման աշխատանքները։
«Ելք» դաշինքից պատգամավոր Արտակ Զեյնալյանն էլ նշեց, որ քաղաքացիների հետ շփման համար իշխանություններն ուզում են էլեկտրոնային փոստից օգտվել, սակայն քաղաքացիներին արգելում են նույնն անել. «Եթե ինչ-որ մեկն ուզենա էլեկտրոնային փոստով որևէ պետհաստատություն փաստաթուղթ ուղարկել, նրան դա թույլ չեն տա։ Պետք է անձամբ ներկայանա։ Դուք անհավասար պայմաններ ենք ստեղծում, ինչը ճիշտ չէ»։
Խորհրդարանում քննարկման դրվեց նաև «Անշարժ գույքի գնահատման գործունեության մասին» Հայաստանի Հանրապետության օրենքում փոփոխություններ կատարելու մասին օրինագիծը։
Հիմնական զեկուցող «ՀՀ օրենսդրական կարգավորման ազգային կենտրոն» հիմնադրամի տնօրեն Արմեն Եղիազարյանը ներկայացրեց՝ առաջարկվում է անշարժ գույքի գնահատողի որակավորումը դարձնել անժամկետ. «Այս պահին անշարժ գույքի գնահատման համար մարդ պետք է որակավորված լինի, քննություն հանձնի ու այդ որակավորումն աշխատում է 3 տարի, որից հետո նորից քննություն է հանձնում։ Առաջարկում ենք մեկ անգամ տալ այդ որակավորումը»։
«Ելք» խմբակցության պատգամավոր Մանե Թանդիլյանը հարց ուղղեց. «Հասկանում եմ, երբ որ անժամկետ ենք տալիս ոլորտում շարունակաբար այդ գործունեությամբ զբաղվողներին, իսկ երբ որ դադարեցնում են գործունեությունը երկար տարիներ, հետո նորից են սկսում, չե՞ք կարծում, որ որակական հետընթաց կլինի»։
Եղիազարյանը պատասխանեց. «Եթե մարդը դրա որակավորումն ունի, ապա հնարավոր է անժամկետ էլ տալ, ինչպես բժիշկների պարագայում»։
Լրահոս
Տեսանյութեր
«Տավուշը հանուն հայրենիքի» շարժման անդամները քայլերթով գալու են Երևան. Բագրատ Սրբազան