ՌԴ մուտքի արգելանքի համար ձեզ դիմողներին ուղարկեք մեզ մոտ. Եգանյանը՝ Փաշինյանին
Ազգային ժողովի այսօրվա նիստում «Ելք» խմբակցության պատգամավոր Նիկոլ Փաշինայնը հարց ուղղեց ՀՀ տարածքային կառավարման և զարգացման նախարարության միգրացիոն պետական ծառայության պետ Գագիկ Եգանյանին՝ թե Ռուսաստանից դեպորտի ենթարկված քաղաքացիների ի՞նչ մասշտաբի հետ գործ ունենք և որքանո՞վ է այդ գործընթացը համապատասխանում ԵԱՏՄ շրջանակներում գործող իրավակարգավորումներին։
Փաշինյանը հիշեցրեց, որ խոսքն այն մարդկանց մասին է, ովքեր երկար ժամանակ ՌԴ-ում են բնակվում, գալիս են Հայաստան և հետ գնալիս պարզում են, որ իրենց մուտքի ճանապարհը ՌԴ փակ է։
Մինչ հարցին պատասխանելը, Եգանյանը ճշգրտում մտցրեց, որ այս դեպքում գործ ունեն ոչ թե դեպորտի հետ, այլ մուտքի արգելանքի, քանի որ դեպորտն ուրիշ վարչական վարույթ և ուրիշ պրոցես է. «Խոսքը վերաբերում է այն անձանց, որոնք կամա-ակամա մեծ կամ փոքր խախտումներ են թույլ տվել գտնվելով ՌԴ-ում։ Ռուսաստանը և պրակտիկայում, և օրենսդրորեն բավականին պատժամիջոցներ է սահմանել, որը գործում է, երբ որ անձը դուրս է գալիս ՌԴ տարածքից։ Սա միայն ՀՀ քաղաքացիների համար չէ, այլ բոլոր օտարերկրացիների»:
Ինչ վերաբերում է այդ քաղաքացիներին օգնելուն Եգանյանն ասաց, որ իրենք նախկին ֆեդերալ միգրացիոն ծառայության հետ ունեցած համագործակցության շրջանականերում մեխանիզմ են սահմանել, որով քաղաքացին դիմում է իրենց ծառայությանը, իրենք էլ միջնորդագրով դիմում են ՌԴ համապատասխան ծառայությանը՝ խնդրելով պատժամիջոցները մեղմել կամ վերացնել։
«Մինչև հիմա մեր ծառայության միջոցով ուղարկել են 15 հազարի հասնող դիմումներ, որոնցից 6 հազարի դեպքում մեր խնդրանքը բավարարվել է։ Մենք խնդրել ենք նաև Ռուսաստանում գտնվողների համար, որոնք ունեն խնդիր և վախենում են դուրս գալ, եթե նրանց խախտումները համապատասխանում են իրենց հոդվածի կետերին՝ դրանց նույնպես մեղմ վերաբերվել։ 22 հազար անձի պատժաչափն էլ այս պարագայում է վերացվել»,- հայտնեց Եգանյանը։
Անդրադառնալով հարցին, թե ինչ ազդեցություն ունի ԵԱՏՄ-ն նա պատասխանեց. «ԵԱՏՄ-ն անկանոն միգրացիայի հարցերի հետ կապված չունի որոշակի համակարգումներ, այն աշխատանքային միգրացիային է վերաբերում, իսկ միգրացիոն օրենսդրությունը պետք է հարգվի օտարերկրացիների կողմից»։
Փաշինյանն արձագանքեց, որ օգնության համար իրենց ևս քաղաքացիներ են դիմել։
«Ովքեր ձեզ դիմում են ուղղարոդեք մեր ծառայություն, քանի որ նրանք պետք է անձամբ իրենց ձեռքով դիմում ներկայացնեն ռուսական պաշտոնյաներին»,- ասաց միգրացիոն պետական ծառայության պետը։