Վրացական 25 գյուղեր հայտնվել են ռուսների օկուպացված տարածքում. ՀՀ-ում Վրաստանի դեսպան
Հայաստանն ու Վրաստանը բարեկամական և գործընկերային հարաբերություններ ունեն: Երկու երկրների անցյալը, ներկան և ապագան սերտորեն կապված են իրար: Սրանով է պայմանավորված երկու երկրների հասարակությունների մեծ հետաքրքրությունը Հայաստանում և Վրաստանում գոյություն ունեցող գործընթացների նկատմամբ: Լրագրողների հետ այսօր կայացած հանդիպման ժամանակ այս մասին ասաց Հայաստանում Վրաստանի արտակարգ և լիազոր դեսպան Գեորգի Սագանելիձեն:
«Ես մտածում եմ, որ հայ հասարակության համար շատ կարևոր է՝ ինչ է կատարվում հարևան Վրաստանում: Այսօրվա մամուլի ասուլիսի թեման Վրաստանի օկուպացված երկու տարածաշրջաններում առկա իրավիճակն է: Արդեն ինը տարի է, ինչ Վրաստանի երկու տարածքներ՝ Աբխազիան և Ցխինվալին օկուպացված են Ռուսաստանի կողմից: Օկուպացված տարածքներում առկա դե ֆակտո հաստատությունները ինտեգրված են Ռուսաստանի քաղաքական, ռազմական, տնտեսական համակարգերին: Աբխազիայում ստեղծված է ռուս-աբխազական համատեղ ռազմական խումբ, իսկ Ցխինվալի տարածաշրջանի անօրինական զորամասներն ինտերգրված են Ռուսաստանի զինված ուժերին»,- նշեց վրացի դիվանագետը:
Գեորգի Սագանելիձեն ասաց՝ Ցխիվնալի տարածաշրջանում անցկացված հանրաքվեն միտված է տարածաշրջանի վերանվանմանը որպես Ալանիա, այն դեպքում, երբ սա Հյուսիսային Օսեթիայի պատմական անունն է: Եվ այս անունով վերանվանումը նպատակ ունի տարածաշրջանի՝ ՌԴ-ի հետ միացմանը:
«Ցխինվալիի դե ֆակտո իշխանության ներկայացուցիչները չեն թաքցնում և ասում են, որ ցանկանում են միանալ ՌԴ-ի հետ: Մենք տեղեկություն ունենք, որ Վրաստանի օկուպացված երկու տարածաշրջաններում Ռուսաստանը ցանկանում է կառավարել ամեն ինչ: Երկու տարածաշրջաններում կանգնած են հինգ-հինգ հազարական ռուս զինվոր-օկուպանտներ՝ ժամանակակից զենքերով՝ հակօդային համակարգեր, զրահամեքենաներ: Մենք մտածում ենք, որ այս մակարդակի միլիտարիզացիան շատ վնասակար է ոչ միայն Վրաստանի այլ նաև ամբողջ տարածաշրջանի համար: Շատերը չգիտեն, որ Թբիլիսիից Ցխինվալ ընդամենը քառասուն կիլոմետր է»,- ասաց դեսպանը:
Վրացի դիվանագետը նաև շեշտեց՝ ամեն տարի ՌԴ-ի օկուպացիոն զորքերը մտնում են Վրաստանի տարածք:
«Ռուսական ագրեսիայից հետո ռուս օկուպանտները քայլ առ քայլ մտնում են Վրաստանի հսկողության տակ գտնվող տարածքներ: Սահմանազատման աշխատանքների արդյունքում վրացական 25 գյուղեր հայտնվել են գրավման գոտում: 800 ընտանիք կորցրել է հողատարածքները և արոտավայրերը: Կան դեպքեր երբ գյուղի մի մասը Վրաստանի, մյուսը՝ օկուպացված տարածքում է: Կամ գյուղը վրացական, գյուղի գերեզմանատունը՝ ռուսական օկուպացիայի տարածքում»,- նշեց Գեորգի Սագանելիձեն:
Դեսպանը նաև ընդգծեց՝ ռուս զինվորականները տեղադրել են փշալարեր, և երբ վրացի ազգաբնակչությունը մոտենում է դրանց, մարդկանց ձերբակալում են, այնուհետ գլխագին պահանջում: Մասնավորապես, 2008 թվականից Ցխինվալի տարածաշրջանում սահմանը հատելու համար կալանավորվել է ավելի քան 1000 մարդ, Աբխազիայում՝ ավելի քան 1800 մարդ:
«Աբխազիայի վրաց բնակչությունը ստիպված է հրաժարվել քաղաքացիությունից և վերցնել աբխազական անձնագրեր, դա նրանց ստիպում են տեղական իշխանությունները: Բացի այդ, նրանց ստիպում են փոխել անուն-ազգանունները, դպրոցներում արգելված է վրացերենի ուսուցումը: Ընդհանուր առմամբ, Աբխազիայից փախստականների թիվը գերազանցում է 500 հազարը: Մենք համոզված ենք, որ խնդիրը պետք է կարգավորվի խաղաղ ճանապարհով, և համոզված ենք, որ միջազգային հանրության աջակցությամբ բոլոր խնդիրները կկարգավորվեն: Մենք ուզում ենք սերտ կապեր ունենալ օկուպացված տարածաշրջանների բնակչության հետ»,- ամփոփեց վրացի դիվանագետը:
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ