Անկախությունը հայ ժողովրդի ամբարված երազանքի իրականացումն էր. Արամ Մանուկյան
«26 տարի առաջ սեպտեմբերի 21-ը մեր պատմության ամենաերջանիկ ու աստեղային օրն էր, չի եղել նման օր ու չի կարող լինել»,- այսօր լրագրողների հետ հանդիպմանն ասաց գերագույն խորհրդի պատգամավոր Արամ Մանուկյանը՝ վերհիշելով, թե ինչպիսի ոգևորությամբ է ընթերցել անկախության հռչակագրի տեքստը։
«Երկրի 95 տոկոսը միանգամից քվեարկում է անկախության համար՝ ծափ ու ծիծաղով, գառ մորթելով, բոլորը ուրախ էին, դրան ներկա էր 26 երկրի 116 դիտորդ ու բոլորն էլ արձանագրել էին միայն դրականը։ Մենք երիտասարդ էինք, հուզմունքը մեծ էր, ուզում եմ ձեզ հրապարակել այդ օրը իմ գրած տողերը. «Իմ ժողովուրդ, ես հպարտ եմ քեզնով, հանրաքվեի ժամանակ ի հայտ եկավ ինձ համար անհայտ մի նոր որակ, ես երևակայել անգամ չէի կարող այսպիսի համազգային ազատատատենչ ոգի։ Դու այսօր պատմություն ես կերտում, և ազատությունն ու անկախությունը պետք է հպարտ լինեն, որ ունեն քեզ նման տեր»»,- ներկայացրեց Մանուկյանը։
Նրա խոսքով՝ սա հայ ժողովրդի ամբարված երազանքի իրականացումն էր։
Իսկ ինչ վիճակում է այսօրվա մեր անկախությունը, ԳԽ պատգամավորն ասաց. «Այսօրվա կորուստները ակնհայտ ու համարյա անշրջելի են, որոնք քայքայում են մեր երկրի հիմքերը։ Դրանցից կառանձնացնեմ լեզուն ու կրթությունը։ Լեզուն ազգի արժանապատվության ամենակարևոր սյուներից մեկն է: Այսօր շատերը ծանոթ են մեջ գցում, որ իրենց երեխաները գնան ռուսական դպրոցներ, անգամ իմ ծանոթները, բարեկամներն են դիմել ինձ, որ միջնորդեմ՝ իրենց երեխաները գնան ռուսական դպրոց, սա խայտառակություն է։ Բոլոր այն երկրները, որոնք զարգացում են ապրել, շեշտը դրել են կրթության վրա: Ես ձեզ թվեր կներկայացնեմ, որոնք ողբ են, գույժ են։ Հայաստանում տասը տարի առաջ դպրոցն ավարտում էր 40 հազար, 2012 թ-ին այդ թիվը իջավ 36 հազարի, այս տարի՝ 19 հազարի։ Այս թվերին դուք նայեք անվտանգության աչքերով, թե դպրոցից քանի մայր ու քանի զինվոր է դուրս գալիս, սա դեմոգրաֆիկ աղետ է, ողբերգություն»։
Նրա կարծիքով՝ խայտառակ վիճակում են գտնվում նաև բուհերը. «Գիտությունով են զբաղվում բուհերը, բայց իրենք գիտական մոտեցումներով չեն ղեկավարվում, այլ միջակ բիզնեսի ղեկավարման մակարդակով։ Ոչնչանում է մեկ այլ անկախության սյուն՝ տեղական ինքնակառավարման համակարգը, աշխարհի բոլոր երկրները ուժեղ են, երբ ուժեղ է նրանց տեղական ինքնակառավարման համակարգը։ Այս համակարգի ոչնչացման արդյունքում նաև ոչնչանալու է կրթական համակարգը»։
Անդրադառնալով ձեռքբերումներին՝ Մանուկյանն ասաց. «Այսօր ունենք սերունդ, որը կոմպլեքսներով չի ապրում։ Առավելություն է, որ դուք բաց եք, որ կարող ենք բացել ցանկացած դուռ աշխարհում: Առավելություն է, որ կա ֆեյսբուք, ինտերնետ, բայց սրանք ճիշտ օգատգործել է պետք։ Այսօր խնդիրների օրակարգ չկա, խոսում են փողոցների անվանափոխումից, սալյուտը 12-ից հետո տալ-չտալուց, սրա՞նք են այսօրվա խնդիրները։ Լրագրողները պետք է պրպտեն իսկական խնդիրների օրակարգը, որը հայի համար պատմական է»։
ԳԽ պատգամավորը վերջում շեշտեց՝ ուժեղ են այն երկրները, որոնք ունեն շատ բարեկամներ և հիշեցրեց. «Ղարաբաղյան ազատագրական պատերազմի ժամանակ մենք հաղթել ենք նրա համար, որ մեծ տերությունների շահերը մեր երկրում համընկել են։ Մենք հաց ստացել ենք Ամերիկայից, վառելիք ստացել ենք արաբական երկրներից, զենք ստացել ենք Ռուսաստանից և որևէ մեկը Հայաստանին չի մեղադրել իր գործողությունների համար։ Մենք այսօր չունենք հզոր բարեկամ, ունենք միայն հզոր խանգարողներ»։
Լրահոս
Տեսանյութեր
Քաղաքացուն բերման ենթարկելիս Հայաստանի դրոշը ընկնում է ոստիկանի ոտքերի առաջ
