Պարտապանն այսուհետև կկարողանա արգելանքն այլ գույքի վրա տարածելու միջնորդություն ներկայացնել հարկադիր կատարողին
ՀՀ կառավարության այսօրվա նիստում հավանության արժանացավ «Դատական ակտերի հարկադիր կատարման մասին» և հարակից մի շարք օրենքներում փոփոխություններ և լրացումներ կատարելու մասին ՀՀ օրենքների նախագծերի վերաբերյալ օրենսդրական նախաձեռնությունը:
Ինչպես նշեց ՀՀ արդարադատության նախարար Դավիթ Հարությունյանը, նախագծերի ընդունման արդյունքում կբարձրանա ԴԱՀԿ-ի գործունեության արդյունավետությունը, ինչպես նաև գույքի հարկադիր իրացման կապակցությամբ հարկերի՝ պետբյուջե մուտքերի պատշաճ ապահովումը:
Ըստ նախարարի՝ այս որոշման ընդունումը կարևոր է `հատկապես բիզնես միջավայրի համար: Նա նշեց, որ վարչապետի հանձնարարականի հիման վրա է այն մշակվել, որպեսզի հարկադիր կատարողներն իրենց վարույթներն իրականացնեն ավելի օպտիմալ, հնարավորինս քիչ խանգարելով բիզնեսի իրականացմանը:
Առաջին կարևոր փոփոխությունն այն է, որ հարկադիր կատարողների համար որոշումների կայացման հստակ և միասնական ժամկետներ են սահմանվել: Այսինքն` օրենքով կային որոշակի որոշումներ կայացնելու վերաբերյալ ժամկետներ, իսկ որոշ որոշումների համար կային բացեր, հիմա այդ բացերը փակվել են:
«Երկրորդը՝ հայցի ապահովման միջոցն է, երբ անձը դիմում է դատարան որոշակի հայցապահանջով և պահանջում է, որպեսզի հայցի ապահովում իրականացվի` պատասխանող կողմի գույքի վրա դնելով արգելանք: Շատ հաճախ գույքի վերաբերյալ արգելանքը դրվում է հենց դրամական միջոցների վրա, ինչը նշանակում է, որ դատավարության ողջ ընթացքում պատասխանող կողմը զրկված է իր բնականոն բիզնեսն իրականացնելու հնարավորությունից: Հաշվի առնելով այդ հանգամանքը` առաջարկել ենք փոխել կարգը»,- նշեց Դավիթ Հարությունյանը:
Մասնավորապես, առաջարկվում է արգելանքն առաջին հերթին դնել այլ գույքերի վրա, օրինակ` անշարժ միջոցների վրա, և այդ արգելանքը ընդամենը կսահմանափակի օտարումը, բայց չի խանգարի բիզնեսին: Իսկ դրամական միջոցների վրա արգելանքը, ըստ նախարարի, պետք է դրվի միայն որպես վերջին միջոց, եթե այդ գույքերը բավարար չեն:
Նախագծում հաջորդ առաջարկությամբ պարտապանին հնարավորություն է տրվում՝ անգամ եթե դրամական միջոցների վրա արգելանք է դրվել, առաջարկել այլ գույք, որի վրա դրվի արգելանք:
«Հաջորդ կարևոր առաջարկությամբ, եթե առկա է գույք, որը կարող է ծածկել պահանջը, կատարողական գործողությունները պետք է ավարտվեն 15 օրյա ժամկետում` ի տարբերություն նախկին երկամսյա ժամկետի: Բացի այդ, սահմանվել են էլեկտրոնային աճուրդի անցկացման հստակ ժամկետներ»,- ասաց Դավիթ Հարությունյանը:
Նախարարը ներկայացրեց նաև նախկինում կիրառվող դրույթներից մեկը, որ եթե հարկադիր կատարողի գործողությունները վարչական դատարանում վիճարկվում էին, ապա, ըստ օրենքի, կատարողական վարույթը կասեցվում էր: Դա, ըստ նախարարի, շատերի մոտ առաջացնում էր գայթակղություն` բերել անհիմն պատճառաբանությամբ բողոք հարկադիր կատարողի գործողության հետ կապված, որպեսզի կասեցվի կատարողական վարույթը:
«Ահագնացող չափերի էր հասել նման անհիմն բողոքների թիվը, ինչի արդյունքում թե դատարաններն էին ծանրաբեռնում, թե կատարողական վարույթներն էին կանգնում: Հիմա այս դրույթը վերացվել է»,- նշեց Դավիթ Հարությունյանը՝ հավելելով, որ եթե իսկապես առերևույթ հիմնավորված է բողոքը, ապա նման դեպքում գործելու է հայցի ապահովման մեխանիզմ և դատարանն արդեն որոշում կկայացնի։
Վարչապետ Կարեն Կարապետյանն ասաց, որ շատ կարևոր փոփոխություն է: «Ես որքան հիշում եմ` բիզնեսը նաև բողոքում էր չափերի վերաբերյալ՝ պահանջի չափը այսքան է, մինչդեռ արգելք են դնում շատ ավելի մեծ գումարի վրա, մենք այս փաստաթղթով դրան անդրադառնո՞ւմ ենք, թե ոչ»,- հետարքրվեց վարչապետը, ինչին ի պատասխան Դավիթ Հարությունյանը նշեց, որ այդ հարցն իրականում արդեն լուծված է: