Քրեակատարողական հիմնարկում չգրված կանոնների հետ կապված հարցերի մասին լռում ենք. Իրավապաշտպան
«Քրեակատարողական համակարգում փոփոխություններ շատ անհրաժեշտ են: Այդ առումով կարևորում եմ, որ նախարարությունն ընդունում է համակարգում առկա խնդիրները, դրա համար այս ռազմավարությունն է առաջարկել»,- «Ի՞նչ բարեփոխումներ կբերի քրեակատարողական համակարգում 2018-2038 թթ. ռազմավարության ծրագիրը» թեմայով քննարկմանն ասաց ՀՔԱ Վանաձորի գրասենյակի ղեկավար Արթուր Սաքունցը:
Նա նշեց, որ հավակնոտ ծրագիր է, որովհետև բավական երկարաժամկետ է. «Մեր պետական կառավարման պրակտիկան հուշում է, երբ որ փոխվում են նախարարները, նաև փոխվում է որոշակի ակցենտ, առաջնահերթությունները: Հարց է առաջանում՝ արդյոք հաջորդ կառավարությունը, նախարարությունը հետամուտ է լինելու այդ ռազմավարության իրականացմանը»:
Ա. Սաքունցի խոսքով, թեև ռազմավարության մեջ կոռուպցիայի դեմ պայքարի ուղղությամբ աշխատանքների մասին խոսվում է, սակայն չկա կոռուպցիոն դրսևորումների վերաբերյալ վերլուծություն:
«Կա մի խնդիր, որի մասին լռում ենք՝ քրեակատարողական հիմնարկներում չգրված կանոնների, քրեական կանոնների հետ կապված հարցերն են: Հիմնական «ինստիտուտներից» մեկն է, որը որոշիչ դեր է խաղում, որը նույնիսկ արդեն գոյություն ունի «Արմավիր» քրեակատարողական հիմնարկում: Ռազմավարության մեջ չենք տեսնում, թե ինչպես է լուծվելու այս հարցը»,- ասաց Ա. Սաքունցը:
Քննարկմանը ներկա ՔԿՀ-ներում հասարակական վերահսկողություն իրականացնող հասարակական դիտորդների խմբի անդամ Ռոբերտ Ռևազյանի գնահատմամբ, ինքնին լավ է, որ մշակվում է երկարաժամկետ գործողությունների ծրագիր, քանի որ պետք է լինել հեռատես, իմանալ, թե ինչ են ակնկալում 10-20 տարի անց, սակայն ռազմավարության մեջ նշված չէ, թե կոնկրետ գործողությունը երբ պետք է սկսվի, երբ ավարտվի: Նա նշեց, որ ռազմավարության մեջ նշված չէ նաև, թե ինչպես պետք է պայքարել ՔԿՀ-ներում գոյություն ունեցող խտրական դրսևորումների դեմ:
«Ակնհայտ է, որ ՔԿՀ-ներում շերտավորումներ կան, խտրական դրսևորումներ: Ամենակարևոր խնդիրներից մեկն է: Դա նաև կրկնահանցագործությունների պատճառ է»,- ասաց նա:
Ռոբերտ Ռևազյանի խոսքով, այսօր ՔԿՀ-ներում մարտահրավեր է նաև բջջային հեռախոսները:
«Մեծ տարածվածություն ունի: Ձեռք են բերում նրանք, ովքեր որոշ չափով ֆինանսական միջոցներ ունեն, նաև հեղինակություն: Մենք առաջարկում ենք օրինականացնել բջջային հեռախոսներ: Այդպես հասանելի կլինի նաև այն մարդկանց, ովքեր ֆինանսական միջոցներ չունեն ՔԿՀ-ում բջջային հեռախոս ձեռք բերելու համար:
Օրիանականցնելու դեպքում մենք կարող ենք նաև որոշակի վերահսկողություն իրականացնել, գրանցել»,- նշեց նա:
Հարակից հրապարակումներ`
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ