Հայաստանում այսուհետ բացառում եմ սահմանադրական ճգնաժամը. Գագիկ Հարությունյան
«Սահմանադրական ճգնաժամ եթե լինում է, այն նաև հաղթահարման հնարավորություն է ունենում»,- այսօր Երևանում մեկնարկած «Սահմանադրական դատարանների դերը Սահմանադրական կոնֆլիկտների հաղթահարման գործում» թեմայով 22-րդ միջազգային խորհրդաժողովի ընթացքում լրագրողների հետ զրույցում այս մասին նշեց ՀՀ Սահմանադրական դատարանի նախագահ Գագիկ Հարությունյանը։
«Հայաստանում այսուհետ բացառում եմ սահմանադրական ճգնաժամը, քանի որ նոր Սահմանադրությամբ սահմանված լիազորությունները հնարավորություն են տալիս ցանկացած սուբյեկտի դիմել Սահմանադրական դատարան և ստանալ լիարժեք պատասխան, այնպես որ ճգնաժամեր չեն լինելու»,- շեշտեց նա։
Ինչ վերաբերում է ՀՀ Ազգային ժողովի կոմղից ընդունած օրենքներին և դրանց հակասահմանադրական ճանաչվելուն, ՍԴ նախագահն հայտնեց, որ վերջին ութ տարիների վերլուծությամբ, ՀՀ ՍԴ-ն հակասահմանադրական է ճանաչել ավելի շատ օրենքներ, քան Ադրբեջանի, Վրաստանի, Լատվիայի, Լիտվիայի, Մոլդովայի ՍԴ-ները միասին վերցրած»։
«Օրենսդրությունը չի հասցնում համապատասխանեցվել տասը տարին մեկ փոփոխվող Սահմանադրությանը։ Հիմա ստեղծվեց խորհուրդ, որը պետք է օգնի այս օրենսդրական հայեցակարգերի փոփոխությունների այնպես արագ իրականացմանը, որ ներդաշնակ լինի Սահմանադրությանը։ Այս պարագայում արդեն ակտը ընդունող մարմինները ստիպված են լինելու գույքագրել իրենց ընդունած իրավական ակտերը և փոփոխությունները կատարել ժամանակին, որ ամեն ինչ չհասնի Սահմանադրական դատարան»,- մանրամասնեց ՍԴ նախագահը։
Եռօրյա խորհրդաժողովի կազմակերպիչներն են ՀՀ Սահմանադրական դատարանը, Վենետիկի հանձնաժողովը, «Սահմանադրական մշակույթ» միջազգային վերլուծական կենտրոնը։
Խորհրդաժողովի մասնակցում են ոլորտի մասնագետներ Գերմանիայից, Լատվիայից, Սերբիայից, Ղազախստանից, Ռուսաստանից, Ղրղզստանից, Չեռնոգորիայից։
Բացման խոսքում հատուկ կարևորելով այս ոլորտում միջազգային համագործակցության հաստատումը, Գագիկ Հարությունյանն ասաց. «Սա արդեն ավանդույթ դարձած 22-րդ խորհրդաժողովն է։ Վստահ եմ, որ երևանյան խորհրդաժողովներն իրենց հետքն են թողել սահմանադրական արդարադատության բազմաթիվ հիմնախնդիրների լուծման, օրենսդրական ու կառուցակարգային բարեփոխումների, մեր երկրներում սահմանադրական օրինականության հսատատման գործում»։
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ