Ձեր վստահելի աղբյուրը

Շենգավիթի դատարանում շարունակվում է ՊՊԾ գնդի գրավմանը մասնակցած խմբից  11 անդամի՝ Արամ Մանուկյանի, Հովհաննես Հարությունյանի, Թաթուլ Թամրազյանի, Արամ Հակոբյանի, Տիգրան Մանուկյանի, Արայիկ Հակոբյանի, Վարդան Գերավետյանի, Մարտիրոս Հակոբյանի, Սերգեյ Կյուրեղյան, Գևորկ Իրիցյանի, Թորոս  Թորոսյանի գործով դատավարությունը: Նախագահող դատավորն է Արթուր Օհանյանը:

Հիշեցնենք, որ ՊՊԾ գնդի գրավման գործը բաժանել երեք առանձին վարույթների:

Այսօրվա նիստում փաստաբան Դավիթ Գյուրջյանը հանդես եկավ միջնորդությամբ՝ նշելով, որ գործերի արհեստական անջատ քննությունն ակնհայտորեն առաջացնելու է դատավարական  բազմաթիվ խնդիրներ, որոնք լուրջ սպառնալիքներ են հանդիսանալու արդար դատաքննության իրավունքի ապահովման համար:

«Նույն փաստական հանգամանքների կապակցությամբ գործի արհեստական մասնատման և տարբեր դատարաններում զուգահեռ  քննության պարագայում անխուսափելիորեն  առաջանալու են ռիսկեր իրավական որոշակիության սկզբունքի ապահովման կապակցությամբ, արդար  դատաքննության, անկախ և անաչառ  դատարանի իրավունքի ապահովման հետ կապված»,- նշեց փաստաբանը՝ հավելելով, որ այս ամենից խուսափելու  համար միակ միջոցը երեք գործերը մեկ վարույթում միացնելն է:

Նա միջնորդեց երեք քրեական գործերը միացնել մեկ վարույթում: 

«Խնդրում եմ այս միջնորդությունը քննել առաջնահերթության կարգով, որովհետև դրա լուծման արդյունքում հնարավոր են փոփոխություններ»,- ասաց փաստաբանը: 

Գործով մյուս փաստաբանները նույնպես միացան միջնորդությանը՝ նշելով, որ որ գործերն անջատ վարույթներում մնալու հետևանքով իրենց  պաշտպանյալների  արդար դատաքննության իրավունքն է խախտվում, մասնավորապես  գործը ողջամիջ  ժամկետում քննության առնելու իրավունքը, իրենց ներկայությունն այս դատավարությանը այս պայմաներում՝ երեք մասերի բաժանված, ձևական բնույթ է կրում:

«Միանում եմ միջնորդությանը, գտնում եմ հիմնավոր է:  Այս պարագայում այնպես կստացվի, որ  դատավորներից մեկի կողմից կայացված  դատական ակտը պարտադիր է դառնալու այն դատավորի համար, ով չի հասցրել առաջինը կայացնել: Այսինքն մեր այս դատավարությունը  կդառնա զրոյին հավասար անկախ վկաների, տուժողների ցուցումունքներից, ապացույցների  հետազոտման կարգից»,- ասաց փաստաբան Տիգրան Հայրապետյանը:

Փաստաբան Լուսինե Սահակյանը միացավ ներկայացված միջնորդությանը. «Կարծում եմ՝ չկա իրավաբան, ով ծանոթ լինելով այս գործին գոնե մասնակի, կարող էր մտածել, որ այս գործը կարող է մասնատվել: Քրեական դատավարության օրենսգրքով  հստակ է՝ միայն այն դեպքում է թույլատրվում  անջատել գործերը, եթե այդ անջատումը չի կարող լրիվության, օբյեկտիվության վրա ազդել»: 

Նա նաև նշեց, որ այս գործը երեք մասի անջատումը պարալիզացրել է Հայաստանի ամբողջ դատական համակարգը, որովհետև դատավարություններն ընթանում են երեք տարբեր տեղերում,  այդ դատարաններում  մյուս դատական նիստերը տեղի չեն ունենում, իրենք՝ որպես  պաշտպաններ, չեն կարողանում գնալ իրենց մյուս դատավարություններին մասնակցել, դատավորները ստիպված են այդ գործերը նշանակել՝ համապատասխանեցնելով այս դատական գործի հետ:

«Բոլորս էլ հասկանում ենք, որ սա քաղաքական գործ է, քաղաքական դատավարություն է, դատական ակտը  վաղուց կայացված է, մենք ձև ենք թափում  հիմա այստեղ, բայց գոնե այդ ձև թափելն էլ Քրեական դատավարության օրենսգրքի նորմերին համապատասախան լինի»,- ասաց Լուսինե Սահակյանը:

Մեղադրող դատախազն ասաց, որ առարկում է այս միջնորդությունը, նշեց, որ քրեական գործերն  անջատելը որևէ կերպ չի խոչընդոտում, հակասում Քրեական դատավարության օրենսգրքին:

Դատավոր Արթուր Օհանյանը հայտարարեց, որ դատարանը քննարկելով միջնորդությունը, լսելով դատավարության մասնակիցների կարծիքները՝ որոշեց մերժել միջնորդությունը:

«Մենք իրավասու չենք մյուս դատարանի կողմից կայացած որոշումները քննարկել: Անջատման վերաբերյալ որոշումը կայացվել է այլ դատարանի կողմից»,- ասաց դատավորը՝ հավելելով, որ գործի անջատումը կոնկրետ իրենց գործի լրիվության, օբյեկտիվության վրա չի կարող ազդել: