Աշխարհը դարձել է ավելի ցինիկ և Արցախյան խնդիրն ունիկալ չի դիտում. Արմեն Աշոտյան
Արցախյան հակամարտությունը եղել և մնում է Հայաստանի քաղաքական օրակարգի թիվ մեկ հարցը: Այսօր ԱԺ-ում լրագրողների հետ զրույցի ժամանակ այս մասին ասաց ՀՀ ազգային ժողովի արտաքին հարաբերությունների մշտական հանձնաժողովի նախագահ Արմեն Աշոտյանը:
Նրա խոսքով, եթե 88-ի փետրվարին Արցախյան շարժումն աշխարհում դիտվում էր որպես դեմոկրատական շարժում՝ ընդդեմ կոմունիստական ռեժիմի, ապա այժմ աշխարհը փոխվել է:
«Մենք արդար ենք, բայց այդ արդարությունը պետք է պարբերաբար ապացուցել և հիմնավորել: Չի կարելի մտածել, որ աշխարհը մեր խնդրի մասին գիտի ամբողջությամբ: Աշխարհն ունի իր սեփական, բազմաթիվ գլխացավերը, աշխարհում փոխվում են հարց լուծողների սերունդները, աշխարհը դարձել է ավելի ցինիկ: Հետևաբար, խորհրդարանական դիվանագիտությունն այս առումով պետք է նախաձեռնողական լինի»,- նշեց նա:
Ըստ Արմեն Աշոտյանի, շատ կարևոր է Արցախի միջազգային ճանաչումը տարբերակել միջազգայնացումից:
«Արցախի ճանաչման հարցը մեր ամենագլխավոր նպատակն է: Դրան հասնելու ամենալավ ճանապարհը կլիներ այն, որ բոլոր երկրները ճանաչեին Արցախը: Սակայն ստեղծված բանակցային ձևաչափն այդ գործընթացը դեռ չի հասունացրել: Ի՞նչ անել այս պահին. միջազգայնացնել Արցախը՝ ըստ ճյուղերի, ինստիտուտների, Արցախը ներառել տարաբնույթ միջազգային պետական-կառավարական կազմակերպությունների և ծրագրերի մեջ:
Միջազգայնացնելով Արցախը՝ մենք հեշտացնում ենք նրա հետագա ճանաչումը: Մենք պետք է կարողանանք սեկտորալության միջոցով Արցախը ներառել համաշխարհային նախագծերի ու գործընթացների մեջ»,- համոզմունք հայտնեց խորհրդարանականը:
Արմեն Աշոտյանը կարևորեց այն հանգամանք, որ 2014 թվականի ռուս-ուկրաինական հակամարտության համատեքստում հայկական կողմին հաջողվեց հաղթահարել Արցախի հետ կապված միջազգային ճգնաժամը:
«Այժմ առերեսվում ենք նոր խնդիրների՝ ի դեմս Կատալոնիայի հանրաքվեի և դրա հետևանքների: Ցավոք սրտի, Արցախյան խնդիրը միջազգային քաղաքականության մեջ ունիկալ չի դիտվում: Մեզ համար շատ կարևոր է ցույց տալ, որ Արցախի խնդիրը նման չէ որևէ այլ խնդրի: Այն աշխարհաքաղաքական կամ կրոնական խնդիր չէ: Այդ խնդրի տերը ղարաբաղցին է, խնդիրն ուրիշ տեր չունի»,- ամփոփեց ՀՀ ազգային ժողովի արտաքին հարաբերությունների մշտական հանձնաժողովի նախագահը:
Հարակից հրապարակումներ`
- Արցախի անկախությանն այլընտրանք չկա. Էդուարդ Շարմազանով
- ՀՀ ԱԺ-ի հետ համագործակցությունն Արցախի ԱԺ-ի համար ամենակայացածն ու արդյունավետն է. Ղուլյան
- Ադրբեջանը պետք է հրաժարվի Արցախն անգամ տեսականորեն իր կազմում պատկերացնելու մտքից. Բաբլոյան
Լրահոս
Տեսանյութեր
Պաշտոնական որոշում չկա. Բագրատ Սրբազանը՝ իրեն վարչապետի թեկնածու առաջադրելու մասին
