ՍԴ որոշման մեջ իմ հրաժարականի պահանջը չկար. Մամիկոն Ասլանյան

Քաղաքական 17:14 10/11/2017 Հայաստան

ՍԴ որոշման մեջ իմ հրաժարականի պահանջը չկար. Մամիկոն Ասլանյան

Վանաձորի քաղաքապետ Մամիկոն Ասլանյանն Սահմանադրական դատարանի՝ այսօր կայացրած որոշման մեջ իր հրաժարականի պահանջ չի տեսել: Panorama.am-ի հետ զրույցում Ասլանյանը նշեց, որ Սահմանադրական դատարանի որոշման ամբողջական տեքստին դեռ ծանոթ չէ, բայց հետևել է նիստի հեռարձակմանը:

«Նախ՝ ավագանու լիազորությունները դադարեցնելու մասով որ դիմել էին, Սահմանադրական դատարանն իրենց մերժեց, սկսենք այդտեղից. եթե խոսքը ավագանու լիազորությունների մասին է: Այսինքն՝ ավագանու լիազորությունների մասով որևէ փոփոխություն չմտցրեց: Երկրորդը՝ Սահմանադրական ճանաչվեց «Տեղական ինքնակառավարման մասին» օրենքի 64-րդ հոդվածի 3-րդ կետը՝ լիազորության մասով»,-ասաց Վանաձորի քաղաքապետը:

Ասլանյանն ընդգծեց՝ ՍԴ-ն ժամանակ տվեց, որ Ազգային ժողովն օրենքի մեջ հստակություն մտցնի, և դրան համապատասխան՝ Վանաձորի ավագանին իր որոշումներում փոփոխություններ կատարի:

«Այդքանն էր իմ լսած ՍԴ որոշումը, թե չէ էնտեղ հրաժարականի, նոր ընտրությունների մասին որևէ բան չկա»,- ասաց նա:

Ասլանյանը նշեց, որ ՍԴ որոշումը դեռ չի ստացել, որ կարողանա հասկանալ ու մեկնաբանություններ տալ, բայց ՍԴ սահմանած վերջնաժամկետից ելնելով՝ նկատեց, որ այս պահին՝ մինչև մարտի 31-ը, իրենց բոլոր որոշումները գործում են և իրավազոր են: Նա խոստացավ իր հստակ դիրքորոշումը հայտնել ՍԴ որոշմանն ամբողջությամբ ծանոթանալուց հետո:

Հիշեցնենք, որ ՍԴ-ն այսօր հակասահմանադրական ճանաչեց Վանաձորի ավագանու՝ քվորումի բացակայության պայմաններում ընդունված որոշումները: ՀՀ ԱԺ «Ելք» խմբակցության պատգամավոր Էդմոն Մարուքյանը կարծիք հայտնեց, որ Վանաձորի ավագանին պետք է լուծարվի, նոր ընտրություններ լինեն կամ Վանաձորի քաղաքապետը պետք է հրաժարական տա:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: