Ձեր վստահելի աղբյուրը

«Առաջարկում ենք ևս երեք տարով երկարաձգել սահմանամերձ և հրետակոծված 25 համայնքում ընդգրկված 37 բնակավայրերի աջակցության ծրագիրը»,- այս մասին խորհրդարանում «Սահմանամերձ համայնքների սոցիալական աջակցության մասին» ՀՀ օրենքում փոփոխություն կատարելու մասին օրինագծի առաջին ընթերցմամբ քննարկման ժամանակ հայտարարեց հիմնական զեկուցող, ՀՀ տարածքային կառավարման և զարգացման նախարարի առաջին տեղակալ Վաչե Տերտերյանը։

Նա մանրամասնեց, որ նախատեսվում են սոցիալական օժանդակությամբ նախատեսվում է հաշվարկային տարում գումարային մինչև 360 խմ ծախսված բնական գազի սակագնի 50 տոկոսի չափով փոխհատուցում, մինչև 1440 կՎտ/ժ ծախսված էլեկտրաէներգիայի սակագնի 50 տոկոսի, բնական գազի սպառող չհանդիսացող, սակայն էլեկտրաէներգիայի սպառող համարվող ընտանիքների համար տրամադրվում է տարեկան մինչև 180 խմ  բնական գազի քանակության արժեքին համապատասխան լրացուցիչ գումարի չափով էլեկտրաէներգիայի սակագնի փոխհատուցում:

Հիմնական զեկուցողին հարց ուղղեց «Ելք» խմբակցության ղեկավար Նիկոլ Փաշինյանը. «Երեք տարի է այս օրենքը գործում է, դուք կարող եք ասել այս ընթացքում նշված օրենքի շահառու բնակավայրերում բնակչության թիվը ավելացե՞լ է, թե՞ պակասել»։

Փոխնախարարը պատասխանեց, որ իրենց հաշվարկները ցույց են տալիս` բաժանորդների թվով փոփոխություններ չկան, կամ եթե կան` էական չեն: «Իհարկե, բաժանորդները միշտ չէ, որ համընկնում են բնակչության թվի հետ, բայց ծավալների առումով էական շեղումներ չկան: Գումարը ծախսում ենք այնքան, որքան սահմանվել է, բայց տենդենցը կայուն է, տրամադրված գումարը 98 տոկոսի չափ ծախսվում է»։