Ձեր վստահելի աղբյուրը

«Քաղաքական փոքրամասնության նկատմամբ վերաբերմունքը պետք է փոխվի»,- այսօր ԱԺ-ում 2018 թվականի բյուջեի քննարկման ժամանակ ասաց «Ելք» խմբակցության պատգամավոր Արտակ Զեյնալյանն՝ անդրադառնալով ԱԺ փոխնախագահ Էդուարդ Շարմազանովի ելույթին։

Պատգամավորի խոսքով՝ քաղաքական փոքրամասնությունն այն չի, որ քննադատում է, իսկ քաղաքական մեծամասնությունն այն չի, որ փոքրամասնության առաջարկություններն անտեսում է, արհամարհում է կամ շրջանցում. «Մեր դիտարկումները, հարցադրումները կոչված են նրան, որ ՀՀ-ն զարգանա, ավելի հզոր և մեր ժողովուրդն ավելի հարուստ լինի։ Մենք ևս պատասխանատվություն ենք կրում և չենք  մտածում, որ քաղաքական մեծամասնության տապալումը մեզ ձեռնտու է։ Մեր նպատակը ՀՆԱ-ն կրկնապատկել, եռապատկելն է։ Ասում են, որ այս բյուջեն կապ ունի 5-ամյա ծրագրի հետ, մենք հանձնաժողովներում քննարկումների ժամանակ փորձել ենք հասկանալ՝ ինչով է կապված»։

Պատգամավորը նշեց, որ առողջապահության ոլորտին պետական բյուջեից 12 տոկոս ֆինանսավորում պետք է լինի, որպեսզի զարգանա այդ ոլորտը. «Ասում ենք անվտանգության ծախսերը պետք է ավելացնենք: Ոստիկանության ծախսերն ինչո՞ւ են ավելացվում, ինչո՞ւ ենք պահում աշխարհում ամենաշատ ոստիկանը մեկ շնչին ընկնող: Եթե մեր երկրում քաղաքացին իր երկրի տերը, այլ ոչ թե սպառողը, ապա նրանցից յուրաքանչյուրն անվտանգության համար պատասխանատու է լինելու: Արդարության ընկալման մակարդակն է պետք բարձրացնել, այլ ոչ թե ոստիկանական համակարգի ֆինանասավորումը»։

«Ելք» խմբակցության պատգամավոր Արամ Սարգսյանն էլ մինչ իր ելույթը շնորհավորեց Արցախի հերոս Ռոբերտ Աբաջյանի ծննդյան օրը. «Նա իր կյանքով պահեց մեր արժանապատվությունը, մնում է մենք էլ մեր աշխատանքով կարողանանք այն պահել»։

Ինչ վերաբերում է բյուջեի նախագծին, պատգամավորը ցանկացավ, որ խոսքն ընկալվի ոչ թե որպես ընդդիմադիրի, այլև մտահոգ մարդու խոսք։

«Բյուջեն պետք է ունենա Ա կետից Բ կետ տանող ճանապարհ: Բյուջեի այն նախագիծը, ինչը ներկայացվեց մեզ, անձամբ ինձ չի բավարարում, և պետք է ասեմ՝ մի շարք պատճառներով։ Հայաստանի թիվ մեկ ռեսուրսը մարդն է, ինչի մասին բազմաթիվ անգամ խոսել են նաև ՀՀԿ ներկայացուցիչները: Եղբայրս՝ Վազգենն ասում էր՝ փոքր երկրներն իրենց խնդիրները լուծելու համար պետք է համամարդկային խնդիր լուծեն: Մեր ժողովուրդը բազմիցս ապացուցել է, որ աշխարհին այնպիսի անհատներ է տվել, որոնք համամարդկային խնդիրներ են լուծել։ Հիմա ի՞նչ ենք անում՝ նման անհատներ ունենալով: Կրթության և գիտության զարգացնելու համար ընդամենը 1 մլրդ-ի չափ գումար ենք հատկացնում ու ուզում ենք կրթությունը զարգանա: Տարեկան 10-12 երեխա «Լույս» հիմնադրամով ուղարկում ենք արտերկիր սովորելու, որոնցից մեծ մասը հետ չի վերադառնում, վերադարձողնել է պարտավոր Հանրապետական դառնալ, սա՞ է մեր մոտեցումը»,-ասաց նա:

Պատգամավորի խոսքով՝ մեր տնտեսության մեջ սայլը տեղից կարող է շարժել արդյունաբերությունը, էներգետիկան, գյուղատնտեսությունը:

«Նյութական ռեսուրսներ ունեցող ճյուղը գունավոր մետալուրգիան է, այս ոլորտի առումով վաղուց ժամանակն է, որ ունենանք մետաղաձուլական գործարան: Մենք 150 հազար տոննայի չափ  գունավոր մեղատներ՝ որպես կոնցենտրատ արտահանում ենք հումքի տեսքով, երբ պատրաստը կարող ենք արտահանել։ 20-24 տոկոս կոնցենտրատ ենք հանում, եթե մետաղ դառնա, դրա հիման վրա կարող է զարգանալ կաբելի արտադրությունը, քիմիան, և դրան առնչվող այլ գործունություններ ծավալվեն»,-ասաց նա: