Ձեր վստահելի աղբյուրը

Գերմանական «Միխաիլ Զուկկով» հիմնադրամի ներկայացուցիչները Երևանում են՝ քննարկելու Կենսոլորտի պահպանավայրերի հայեցակարգն ու Հայաստանում դրա տեղայնացման հեռանկարները:

Նոյեմբերի 20-ին Երևանում մեկնարկած երկօրյա աշխատաժողովի բացմանը ՀՀ բնապահպանության նախարար Արծվիկ Մինասյանը նշեց, որ մեկնարկող ծրագրի հիմնական նպատակն է Հայաստանում իրականացնել հետազոտական աշխատանքներ, առանձնացնել տարածքներ, որոնք կարող են դիտվել որպես կենսոլորտային արգելավայր:

«Այս պահի դրությամբ մենք ակնկալում ենք, որ Հայաստանում առնվազն երկու այդպիսի տարածք հնարավոր է ունենալ, մասնավորապես, մեկը Սևանի տարածաշրջանն է՝ Գեղարքունիքի մարզում, երկրորդը՝ հարավային հատվածում: Սա նշանակում է, որ մենք, օրինակ, Սևան ազգային պարկի՝ Սևանին հարակից 30-ից ավելի համայնքների ներգրավվածությամբ կարող ենք ունենալ կենսոլորտային արգելավայր, որտեղ այս համայնքները կունենան ոչ միայն իրենց հստակ զարգացման ծրագրերը՝ աշխատատեղերով, զբաղվածությամբ, այլ նաև հենց այս գործունեությամբ կնպաստեն Սևանի հիմնախնդիրների առավել արդյունավետ լուծմանը, կենսապաշարների կայուն օգտագործմանը և Սևանա լճի էկոհամակարգի՝ շատ ավելի կայուն և առաջանցիկ բարելավմանը»,- ասաց նա:

Հարցին՝ ինչու՞ է իբրև ծրագրի իրականացման առաջին երկիր ընտրվել Հայաստանը, Մինասյանը պատասխանեց, որ պատճառներից մեկը Հայաստանի պատրաստակամությունն է՝ իրականացնել պահպանության քաղաքականություն, երկրորդը՝ Հայաստանում կենսաբազմազանության բավական հարուստ ռեսուրսների առկայությունը, ինչը նաև միջազգային համատեքստում համարվում է պահպանության ենթակա, և վերջապես, Հայաստանն իր այսօրվա պահպանության քաղաքականությամբ, նկատի առնելով պահպանվող տարածքների տեսակարար կշիռը, մոտ է միջազգային չափանիշներին, այս ամենից ելնելով էլ գերմանական այս հիմնադրամը նպատակ է դրել Հայաստանում իրականացնել նման հետազոտություն:

«Միխաիլ Զուկկով» հիմնադրամի ներկայացուցիչ Ուլի Գրաբները ներկայացրեց իրենց գործունեության հիմնական ոլորտները, նշեց, որ պատմական պատճառներով իրենք շարադրում են կենսոլորտի պահպանությունը, մշտապես ուշադրության կենտրոնում են պահել պահպանավայրերը:

«Մենք նաևւ մասնակից ենք ՅՈՒՆԵՍԿՕ-ի կենսոլորտի պահպանության ծրագրին: Մեր գործունեությունը մեկնարկել է մի ծրագրով, որ հենց այս խնդրին է առնչվում: Ես հուսով եմ, որ մեր քննարկումները կլինեն բաց և շիտակ, այս խնդիրը ներառում է ոչ միայն բնությունը, այլև մարդկանց: Ծրագիրը գործում է մի քանի երկրներում, Հայաստանն ակտիվորեն մասնակցում է այս ծրագրին: Մենք տարբեր թեմաներ ենք քննարկելու՝ աջակցելու Հայաստանի կառավարությանն այս խնդրում: Այս ուղղությամբ մենք լուրջ ջանքեր ենք գործադրելու»,- ասաց նա: