Ձեր վստահելի աղբյուրը

«Նոյեմբերի 10-ին Սահմանադրական դատարանի որոշումը, ըստ էության, արձանագրեց, որ Վանաձորի ավագանու 2016 թվականի մարտից այս կողմ իրականացվող նիստերը հակասահմանադրական են, այսինքն՝ դե յուրե ավագանու նիստեր տեղի չեն ունեեցել: Ուստի Վանաձորի ավագանու լիազորությունները պետք է դադարեցվեն, ու արտահերթ ընտրություններ լինեն»: Այս մասին այսօր ԱԺ ճեպազրույցների ժամանակ ասաց  ԱԺ «Ելք» խմբակցության ղեկավար Նիկոլ Փաշինյանը:

Այսպիսով, ըստ պատգամավորի, ՍԴ-ն իր որոշմամբ արձանագրեց Վանաձորի ավագանու դե յուրե մահը: «Այն, ինչ տեղի է ունենում այսօր՝ հուշագրերի ստորագրման տեսքով, ըստ էության, դե յուրե դիակին վերակենդանացնելու փորձ է, ինչը  չի նշանակում, որ դիակը սկսեց վերակենդանանալ, դե յուրե գոյություն չունեցող մարմինը պետք է լուծարվի,  հենց սա է բխում Սահմանադրական դատարանի որոշումից»,- ընդգծեց Նիկոլ Փաշինյանը:

«Ելք» խմբակցության քարտուղար Գևորգ Գորգիսյանը նշեց, որ այսօր դիմելու են Կառավարություն՝ կյանքի կոչել Սահմանադրական դատարանի որոշումը Վանաձորի ավագանին լուծարելու համար, որպեսզի նոր ընտրություններ անցկացվեն:

Նիկոլ Փաշինյանը հավելեց, որ ՍԴ-ն իր որոշմամբ չեղյալ է համարել Վանաձորի ավագանում բոլոր որոշումները, որոնք այս ընթացքում կայացվել են. «Այսինքն՝ արձանագրել է , որ ավագանի գոյություն չունի: Ըստ էության, նիստեր չեն արվել, 15 հոգով հավաքվել են՝ ջան ասել, ջան լսել: Ուստի կառավարությունը պետք է ցույց տա, թե որքանով է հարգում ՍԴ-ի որոշումները»:

Անդրադառնալով «Հայկական վերածնունդի» և ՀՀԿ-ի միջև Վանաձորում կնքված հուշագրին՝ Ն. Փաշինյանը նշեց, թե  «Հայկական վերածնունդը» կարող է ասել՝ «պատրաստ ենք մահացած հիվանդի հետ ամուսնանալ և փորձել վերակենդանացնել»։ «Եթե Վանաձորի ավագանու «Հանրապետական» խմբակցությունը քնած դշխուհին է, «Հայկական վերածնունդն» էլ կարող է իր համբույրներով վերակենդանացնել, բայց տվյալ դեպքում քնած դշխուհու հետ գործ ունենալն ու նրան վերակենդանացնելը տրամաբանական չեն»,- նշեց նա:

Գևորգ Գորգիսյանն էլ հավելեց, որ ՀՎԿ-ի նման որոշումը սպասելի էր, անակնկալ չէր, որ նման բան կարող էր տեղի ունենալ: Ըստ նրա՝  ի վերջո հանրության համար բացահայտվեց, թե ովքեր են այն մարդիկ, որոնք դրժեցին իրենց խոստումը և քվեարկեցին Վանաձորի գործող քաղաքապետ Մամիկոն Ասլանյանի օգտին:

Նիկոլ Փաշինյանն էլ նկատեց, որ այսպիսով կարող են արձանագրել «Հայկական վերածննդի» քաղաքական մահը: «Իհարկե, մենք դա շուտվանից էինք արձանագրել, բայց ոմանք չէին խոստովանում, որ տրամադրությունները չընկներ,  բայց հիմա արձանագրում ենք, որ ՀՀ-ում այլևս նման քաղաքական ուժ գոյություն չունի, և կա դրա մասին հուշագիր»: