Արփինե Հովհաննիսյանը արդարադատության փոխնախարարին. «Դուք Հայաստանում եք ապրում, լուսնից չեք իջել»
Ազգային ժողովի Պետական-իրավական և մարդու իրավունքների պաշտպանության հարցերի մշտական հանձնաժողովն այսօրվա նիստում քննարկման է դրել «Անհատական և կոլեկտիվ հանրագրերի մասին» օրենքի նախագիծը և կից ներկայացված փաթեթը։
Հիմնական զեկուցող ՀՀ արդարադատության փոխնախարար Արթուր Հովհաննիսյանն իր զեկույցում նշեց, որ օրինագծի փոփոխության անհրաժեշտությունը պայմանավորված է Սահմանադրության փոփոխությամբ:
«Սահմանադրության 53-րդ հոդվածում առաջին անգամ մանրամասն կարգավորվել է յուրաքանչյուր անձի անհատական կամ այլոց հետ հանրագիր ներկայացնելու իրավունքը։ Հանրագրերը կարևոր քաղաքական իրավունք է, որը հանրությանը թույլ են տալիս պարտադրել պետական և տեղական ինքնակառավարման մարմինների ու պաշտոնատար անձանց հաշվի առնել հասարակական կարծիքները և միջոցներ ձեռնարկել հասարակական պահանջները կիրառելու»,- ասաց փոխնախարարը։
Ինչ վերաբերում է ԱԺ-ին՝ նա նշեց, որ նախատեսել ենք, որ խորհրդարանում դրանք քննարկվել են համապատասխան մշտապես գործող հանձնաժողովներում, որոնք եզրակացություններ են կազմելու և դրանք ներկայացնելու են ԱԺ հաստատմանը։
Հանձնաժողովի անդամ Արփինե Հովհաննիսյանը նրան խնդրեց պարզաբանել. «Անձը հանրագրով ներկայացնելու է բացառապես հնարայի՞ն նշանակություն ունեցող հարց և չի՞ կարող անհատապես իրեն վերաբերող հարց ներկայացնել։ Եվ արդյո՞ք քաղաքացիները հանրագրերը բացառապես պետք է գրավոր ձևով ներկայացնեն, արդյոք բանավոր հանրագրի գաղափարը հանու՞մ եք, թե՞ ոչ»։
Արդարադատության փոխնախարարը պատասխանեց, քաղաքացիների ընդունելությունները չեն վերանում, ավելին՝ անհատական ընդունելությունները չեն էլ բխում այս օրենքից, և առանձին լիազորություններով են տրամադրված. «Կուսումնասիրվեն, եթե կա պետական մարմին, որի համար օրենքով սահմանված չէ, որ պետք է ընդունելություն իրականացնի, կհստակեցնենք: Բանավոր հանրագիրը հանել ենք, այստեղ այն լինելու է գրավոր փաստաթուղթ»։
Արփինե Հովհաննիսյանն արձագանքեց. «Գուցե լավ եք արել, որ հանել եք բանավոր հանրագիր կոչեցյալը, բայց անհատական ընդունելության հետ կապված ի՞նչ, բոլորս այս պահից սկսած ընդունում ենք, որ մեր հարգելի քաղաքացիները այլևս բացառապես գրավոր հանրագրերով են շփվելո՞ւ և գրավոր դիմումներ են ներկայացնելո՞ւ։ Դուք ակնարկեցիք, թե այլ իրավական ակտերում և նախարարության կանոնադրություններում քաղաքացիների անհատական ընդունելության հարցը կարգավորված է, բայց ես համարում եմ, որ չի կարելի օրենքի մակարդակից իջեցնել և թողնել կանոնադրությունների մակարդակին կամ պաշտոնատար անձի հայեցողությանը»։
Արփինե Հովհաննիսյանի խոսքով՝ չի կարելի ասել, որ ենթաօրենսդրական ակտի մակարդակով նրանց վրա դրված է պատասխանատվություն. «Ինձ համար հարց է ծագել քաղաքացիների ընդունելություն կազմակերպելո՞ւ եք, թե ոչ, նախարարությունում ինչպե՞ս էր լինում: Այս հարցը պետք է կարգավորել օրենքով, բերեք պարտականություն դարձրեք: Քաղաքացիների անհատական ընդունելությունը խնդիր է և ես այդ խնդիրը բարձրացնում եմ։ Մենք կարիք ունենք մեկ միասնական օրենքի»։
Փոխնախարարը պատասխանեց, որ ընդունելությունները չեն վերանում, դրանք առանձին լիազորություններ են, առանձին օրենքներով՝ համապատասխան պաշտոնատար անձանց տրամադրված։
Պատգամավորն արձագանքեց. «Ամեն մեկդ հիմա կգտնեք մի օրենք, որտեղ գրված է, որ քաղաքացուն պետք է ընդունեն, իմ ասածն այն է, որ դա պետք է լինի մեկ տեղ՝ հստակ բոլորի համար, ոչ թե ընկնենք Arlis-ով ման գանք։ Լսեք, դուք Հայաստանում եք ապրում ի վերջո, լուսնից չեք իջել, և ՀՀ քաղաքացիներին էլ մի դրեք շրջանակների մեջ, ու ասեք այսպես պետք է անեք»։
Հանձնաժողովի նախագահ Հրայր Թովմասյանն էլ նշեց. «Երբ առավոտյան գալիս ես աշխատանքի, մարդիկ կանգնած են, բարձրացնում ես աշխատասենյակ նրանց լսում ես, դա էլ է ընդունելություն, ոչ ոք չի ասել, որ միայն ընդունելությունների օրն ես կատարում ընդունելություն»։
Արփինե Հովհաննիսյանը հակադարձեց. «Բայց պատրավոր ես նաև ասել, որ դու ընդունելության օր ունես»։
Քաղաքացիների ընդունելության առաջարկությունը հանձնաժողովում դրվեց քվեարկության, որին հանձնաժողովի անդամները կողմ քվեարկեցին, և օրինագիծը ներկայացված փաթեթով դրական եզրակացություն ստացավ, որը կընդգրկվի առաջիկա քառօրյայի օրակարգ։
Լրահոս
Տեսանյութեր
Դատարանի դահլիճում Վ. Սաղաթելյանին ու Ն. Սամսոնյանին դիմավորեցին ծափահարություններով