Ձեր վստահելի աղբյուրը

«Յուրաքանչյուր ոք իրավունք ունի անհատապես և այլ անձանց հետ միասին պետական և տեղական ինքնակառավարման մարմիններին ներկայացել հանրագիր և ստանալ պատշաճ պատասխան»,- այսօր խորհրդարանում «Հանրագրերի մասին» օրենքի նախագծի քննարկման ժամանակ հայտարարեց հիմնական զեկուցող, ՀՀ արդարադատության նախարարի առաջին տեղակալ Արթուր Հովհաննիսյանը՝ նշելով, որ հանրագիր ներկայացնելու իրավունքը նորություն չէ, միջազգային պրակտիկայում կիրառվում է:

«Հանրագիրը կարևոր քաղաքական իրավունք է, որը հանրությանը թույլ է տալիս պարտադրել պետական և տեղական ինքնակառավարման մարմիններին գրություն ուղարկել, նրանց գործունեության թերությունների մասին տեղեկություն տալ և բարելավմանն ուղղված հասարակական կարծիքներ ընդգրկել, որից հետո էլ պաշտոնատար անձը միջոցներ կձեռնարկի հասարակական պահանջները բավարարելու ուղղությամբ»,- ասաց փոխնախարարը։

Նրա խոսքով՝ հանրագրով ապահովվում է անմիջական կապը հանրության և պետական ու տեղական մարմինների միջև։

«Նախատեսել ենք հանրագրի ներկայացման մի քանի տեսակներ՝ գրավոր, առձեռն կամ նույնիսկ էլեկտրոնային եղանակով: Նախատեսվել է կոլեկտիվ հանրագրի գաղափարը, անձինք էլեկտրոնային հարթակում հանրագիր են ներկայացնում, և այլ անձինք մեկ ամսում կարող են միանալ այդ հանրագրին»,- ասաց նա։

Հիմնական զեկուցողին դիմելով՝ Հանրապետական խմբակցության պատգամավոր Շուշան Սարդարյանն ասաց. «Փաստորեն նախագիծը փոխարինելու է գալիս «Քաղաքացիների դիմումների, ընդունելության և բողոքների մասին» օրենքին և գործելու է հիմնականում առաջարկությունների մասով, որոնք էլ բացառապես վերաբերելու են շահերի իրականացմանը, պաշտոնյաների գործունեությանը նպաստելուն, նրանց թերությունները մատնանշելուն և այլն:  Եթե գործելու է միայն առաջարկությունների մասով և դուրս է գալիս քաղաքացուն ընդունելու պրակտիկան, մնացած մասով քաղաքացին որտե՞ղ պետք է դիմի: Գիտենք, որ քաղաքացիները տարաբնույթ հարցեր են բարձրացնում: Այդ դեպքում քաղաքացին ո՞ւմ դուռը պետք է թակի»։

Հովհաննիսյանը պատասխանեց, որ պատգամավորի նշած օրենքը ուժը կորցրած է ճանաչվում, բայց ամեն ինչ կանոնակարգված է վարչարարության տեսքով:

«Հանրային նշանակության ցանկացած հարց արդեն համարվում է հանրագիր: Այս փոփոխություններով չենք վերացնում քաղաքացիների ընդունելությունները: Ընդունելությունները չեն կազմակերպվում միայն առաջարկություն կամ հանրագրեր ներկայացնելու համար: Եթե անձը գալիս է պետական մարմնի մոտ, չգիտի՝ իր ուզածը անձնական է, հանրագիր է, դատական է կամ վարչական գործ է, նա ընդամենն իր պրոբլեմը ներկայացնում է, իսկ պետական մարմին էլ ուղղորդում է, այս կամ այն ճանապարհն ընտրել»,-նշեց փոխնախարարը։

Մտքերի փոխանակման ժամանակ ԱԺ փոխնախագահ Արփինե Հովհաննիսյանը նշեց, որ գաղափարական տեսանկյունից օրինագծին կողմ է, նկատի ունենալով այն հանգամանքը, որ օրինագիծը բխում է Սահմանադրությունից։

Պատգամավորը նշեց, որ չնայած սրան, նախագծում դրույթներ կան, որոնք մտորումների առիթ են տալիս։