Ձեր վստահելի աղբյուրը

ԱԺ պետաիրավական հարցերով մշտական հանձնաժողովում այսօր շարունակվեց «Ընտանեկան բռնության մասին» օրենքի նախագիծը։ 

ՀՀ արդարադատության նախարարի տեղակալ Վիգեն Քոչարյանը հայտնեց, որ պատգամավորների կողմից առաջին ընթերցմամբ ընդունված տարբերակը փոխելու վերաբերյալ նոր առաջարկներ չեն եղել:

Օրենքի նախագծին առաջինն  անդրադարձավ ԱԺ «Հայաստանի Հանրապետական կուսակցություն» խմբակցության պատգամավոր, Հայաստանի նախկին գլխավոր դատախազ Գևորգ Կոստանյանը: Նրա խոսքով, հարց է առաջանում, թե ինչպես է այս օրենքը կիրառվելու, ինչ հետևանքների է հանգեցնելու:

«Կա նման մտահոգություն, որոշ դեպքերում արդարացված մտահոգություն, նկատի ունենալով մեկ կարևոր հանգամանք՝ մեր երկրի պատմության ընթացքում Սահմանադրականի դատարանի կողմից հակասահմանադրական ճանաչված օրենքների 99 տոկոսը հակասահմանադրական է ճանաչվել ոչ թե նրա համար, որ օրենքը վատն է, այլ նրա համար, որ այն սխալ է կիրառվել: Այսինքն՝ հակասահմանադրական է ճանաչվել ոչ թե օրենքն ինքնին, այլ օրենքը, դրա իրավակիրառ պրակտիկայում տրված նշանակության արդյունքում: Օրենքը, ինչքան էլ որ էմոցիոնալ հարթության մեջ տարբեր մեկնաբանությունների տեղիք տա, լավ օրենք է, որովհետև կոչված է կանխարգելման, նախականխման գործընթացներին»,- ասաց նա։

Դիմելով արդարադատության փոխնախարարին՝ Գևորգ Կոստանյանը նշեց, որ իրենք պահանջատեր են լինելու օրենքի գործնական կիրառման խնդիրներին:

«Թեև մենք համաձայնություն տալիս ենք այս օրենքին, համաձայնություն տալիս ենք այս գաղափարախոսությանը, որ այն ներդրվի մեր իրավական համակարգի մեջ, մենք շատ հետևողական և պահանջատեր ենք լինելու այս օրենքի գործարկմանը, մեկնաբանությանը:

Մենք պետք է կարողանանք այս հասկացությունների ճշգրիտ կիրառումն ապահովել: Այս օրենքի սխալ կիրառման արդյունքում մենք լրջագույն խնդիրներ կարող ենք ունենալ, որովհետև ընտանիքը մեր հասարակության մեջ բացարձակ, անվերապահ արժեք է, և ցանկացած ոտնձգություն այդ արժեքին ցավոտ է լինելու մեզնից յուրաքանչյուրի համար»,- նկատեց Գևորգ Կոստանյանը:

Պատգամավորի խոսքով՝ օրենքի կիրառումը պետք է կանխատեսելի լինի ցանկացած քաղաքացու համար, այնինչ հասարակությունը մտահոգված է այս օրենքով, որովհետև չունի կանխատեսելիության զգացում։

ԱԺ պետաիրավական հարցերով մշտական հանձնաժողովի նախագահ Հրայր Թովմասյաննն իր հերթին նկատեց, որ եթե «Ընտանեկան բռնության կանխարգելման մասին» օրենքի կիրառման պրակտիկայում փորձ արվի ներխուժել ընտանիք, ապա ինքը լինելու է առաջիններից մեկը, ով օրենքի փոփոխություն է նախաձեռնելու:

«Հուսով եմ, որ նման մեխանիզմներ չեն լինելու: Այս օրենքի կիրառողները ևս հայ մարդիկ են՝ անկախ իրենց զբաղեցրած պաշտոնից, որոնց համար ընտանեկան արժեքները բարձրագույն արժեք են: Հուսովեմ՝ այս օրենքի պրակտիկ կիրառությունը շատ փոքր կլինի, և այն հիմնականում կունենա կանխարգելիչ գործառույթ»,- ասաց Հրայր Թովմասյանը՝ հորդորելով կողմ քվեարկել նախագծին:

«Ծառուկյան» խմբակցության պատգամավոր Գևորգ Պողոսյանն էլ նշեց.

«Մենք օրենքի կիրառման վրա հսկողություն իրականացնելու ուրիշ լծակ չունենք, քան փոփոխություններ ու լրացումներ կատարելը: Դուք գտնում եք, որ կիրառման հարցերում այս օրենքը հղի է խնդիրներ առաջացնելու հավանականությամբ, իմաստը ո՞րն է՝ ընդունել, հետո զբաղվել դա փոխելով: Ես չեմ փոխել իմ դիրքորոշումը: Խմբակցությունում ազատ քվեարկության է թողնված այս հարցը»,- ասաց նա:

Հրայր Թովմասյանը չհամաձայնեց վերջինիս հետ, ասաց, որ թե՛ իր, թե՛ Գևորգ Կոստանյանի խոսքում նման երանգ չկար: «Մենք չասացինք, որ նման երևույթներ կան: Մենք նման օրենք չենք ունեցել, մի շարք հասկացություններ նոր են և մենք ասում ենք, որ նման երևույթների առկայության պարագայում, (որի հավանականությունը բավական փոքր է), մեր գործիքակազմով մենք կարող ենք հասնել հնարավոր խնդիրների լուծմանը»,- շեշտեց Հրայր Թովմասյանը:

Գևորգ Կոստանյանն էլ նշեց. «Մեր խնդիրն այն է, որ քանի որ սա նոր ինստիտուտ է, որը ներդրվում է մեր երկրում, այն անվերապահորեն բերելու է տարբեր մեկնաբանությունների: Խնդիրն այն է, որ իրավակիրառ պրակտիկան պետք է բերենք միասնականության՝ դրան մաքսիմալ զերծ պահելով հնարավոր բացասական դրսևորումներից: Սովետական ժամանակից մինչ օրս մենք չենք ունեցել նման ինստիտուտ, մեր իրավակիրառ պրակտիկայում սա չի եղել, ուստի այն կարող է հանգեցնել որոշակի դժվարությունների։ Բայց չի նշանակում, որ մենք պետք է նման օրենք չունենանք: Եթե մի բան մեզ անհայտ է, չի նշանակում, որ պետք է անհայտ էլ մնա»:

Գևորգ Պետրոսյանը շեշտեց, որ ինքը օրենքին դեմ չէ, բայց դեմ է օրենքի այն հատվածին, որը երաշխավորում է թաղային ոստիկանների անհարկի միջամտությունը ընտանիքի գործերին:

«Օրենքը հո Աստվածաշունչ չէ, որ անվրեպ կիրառվի։ Եթե համակարծիք են շատերը, որ կիրառման ընթացքում պետք է հարուցեր խնդիրներ, դրանք վերացնենք, ոչ թե ընդունենք, հետո ընկնենք դրանք վերացնելու հետևից»,- ասաց «Ծառուկյան» խմբակցության ներկայացուցիչը:

ԱԺ փոխնախագահ Արփինե Հովհաննիսյանն էլ նկատեց, որ մտահոգությունները վերաբերում են ընտանիքներին միջամտելու դրույթին: Ըստ նրա՝ իր այդ մտահոգությունների զգալի մասը փարատվել է: «Նախագծում շատ փոփոպություններ են կատարվել»,- ասաց նա։