Ձեր վստահելի աղբյուրը

«Կարևոր է, որ այդպիսի օրենք գործի Հայաստանում, բայց կարծում եմ, որ այն չի լուծի մեծ խնդիրներ»,- այսօր «Հոդված 3» ակումբում «Ընտանեկան բռնության կանխարգելման օրինագիծն ԱԺ-ում հնարավո՞ր են արդյոք նոր փոփոխություններ» թեմայով քննարկման ժամանակ ասաց ՀՀ ԱԺ «Ելք» դաշինքի խմբակցության պատգամավոր Լենա Նազարյանը։

Նրա կարծիքով՝ օրենքի օգնության կդիմեն միայն այն դեպքերում և այն կանայք, ովքեր տարիներ շարունակ ենթարկվել են բռնության և վերջապես մի օր հույսը կորցնելով կթակեն օգնության դուռը, բայց շատերը երկար ժամանակ կշարունակեն լուռ համակերպվել և դիմանալ։

«Շատ բան պետք է փոխվի հասարակության մեջ, մշակութային մակարդակում, որ հնարավոր լինի այս տեսակ խնդիրներն արմատախիլ անել»,- նշեց պատգամավորը։

Քննարկմանը ներկա ԱԺ Հանրապետական խմբակցության պատգամավոր Կարինե Աճեմյանը հայտնեց, որ իրենց խմբակցությունում բուռն են եղել քննարկումները, և եղել են պատգամավորներ, որոնք ընդհանրապես դեմ էին այս օրինագծին։

«Ես ինքս կողմ եմ, որ օրինագիծն ընդունվի։ Սա ոչ միայն պարտավորություն է  մեր միջազգային  գործընկերների հանդեպ, այլև այն, որ առհասարակ բռնությունը, ագրեսիան ավելանում է ամբողջ աշխարհում ու նաև մեր երկրում, և ես կողմ եմ, որ իրականում գործի օրենքը, ինչը, կարծում եմ՝ կարող է արդյունավետ լինել»,- ասաց Աճեմյանը։

Հարցին, թե այս օրենքը լուրջ մեսիջ կդառնա՞ հասարակության համար, որ ընտանիքում բռնության հետ կապված խնդիրներն այսուհետ օրենքի և իրավապահների վերահսկողության տակ են իրավապաշտպան Զարուհի Հովհաննիսյանը պատասխանեց. «Ես հստակորեն կարող եմ ասել, որ այդ մեսիջը չի հնչել ամբողջ քննարկումների ժամանակահատվածում, ամբողջ ընթացքում խոսվում էր հայ ավանդական ընտանիքը պաշտպանել, պահպանելուց»։

Պատգամավոր Կարինե Աճեմյանը չհամաձայնվելով՝ նշեց. «Հստակ մեսիջ եղել է, չպետք է ծայրահեղացնել թեման։ Հստակ սահմանված են բոլոր պարտականությունները»։

Փաստաբանների պալատի իրավական հարցերով փորձագետ, փաստաբան Արտաշես Խալաթյանի խոսքով՝ այն բոլոր խութերը, վիճելի դրույթները, որոնք գոյություն ունեին օրինագծում, դրանք պահպանվել են։

«Մենք կրկին մնում ենք այն տեսակետին, որ այս օրենքի սոցիալական անհրաժեշտությունն այս իրավադրույթների պայմաններում  որևէ կերպ արդարածված չէ։ Ինձ համար որպես իրավաբան այսպիսի եզրահանգման տեղիք կա, որ այո, գոյություն ունի որոշակի պարտադրանք։ Եթե քառորդդարյա ժամանակահատվածում ՀՀ-ն «մի կերպ»  գոյատևել է առանց այս օրենքի, որևէ անհրաժեշտություն չկար այդպես արագ քննարկելու ու ընդունելու»,- ասաց փաստաբանը։

Հիշեցնենք, որ խորհրդարանն այսօր առաջին ընթերցմամբ ընդունել է «Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» օրենքի նախագիծը։ Օրինագծի երկրորդ ընթերցմամբ և ամբողջության ընդունելու հարցը կքննարկվի ԱԺ արտահերթ նիստում։