Ձեր վստահելի աղբյուրը

Արցախում  նոյեմբերի 21-ին ականի պայթյունից վիրավորում  ստացած Նարեկ Հովեյանն արդեն ապաքինվում է: Այս մասին Panorama.am-ի թղթակցի հետ զրույցում ասաց Նարեկի մայրը՝ Սեդա Ղարիբյանը:

Նրա խոսքով՝ որդին դեռ հոսպիտալի վերակենդանացման բաժանմունքում է, սակայն դրական  տեղաշարժ կա. «Պարանոցի շրջանում ստացած վերքերը գրեթե լավացել են: Հիմա ամենամեծ խնդիրը աչքերի հարցն է»:

Զինվորը գլխի շրջանում ստացած վնասվածքներից հիշողության հետ կապված խնդիրներ չունի: Տիկին Սեդան նշեց, որ Նարեկը ՊՆ կենտրոնական զինվորական հոսպիտալում ստանում է անհրաժեշտ բոլորը բուժումները, լիարժեք ոտքի կանգնելուց հետո նրան կտեղափոխեն Մալայանի անվան ակնաբուժական կենտրոն, որպեսզի հասկանան, թե ձախ աչքի վնասվածքն ինչ աստիճանի է: 

«Ձախ աչքով կարողանում է երբեմն ինչ-որ առարկաներ տեսնել կամ դրանց գույնը տարբերել, փոքր-ինչ դրական տեղաշարժ կա, բայց դեռ երկար ճանապարհ ունենք անցնելու»,- նշեց տիկին Սեդան:

Նրա խոսքով՝ որդին սկսել է նաև քայլել, թեև քիչ՝ օրվա մեջ 10-15 րոպե. «Դեռ թույլ է, չի կարողանում երկար ոտքի վրա կանգնած մնալ, մի քանի րոպե քայլելուց հետո իրեն վատ է զգում, գլխապտույտ է ունենում, բայց հույս ունեմ, որ կամաց-կամաց ավելի երկար կկարողանա ոտքի վրա կանգնած մնալ: Նարեկս սպորտով է զբաղվել, չի խմում, չի ծխում, ֆիզիկապես լավ վիճակում է և դա, ինչպես նաև իր դրական էմոցիաները երեխայիս օգնում են, որ շուտ վերականգնվի»:

Մայրն ասաց, որ որդին չի հուսահատվում, այլ հակառակը, իրեն հույս է տալիս, որ ամեն ինչ լավ է լինելու: «Աստված եմ կանչում, ամեն վայրկյան աղոթում եմ, որ  Նարեկիս աչքի տեսողությունը վերականգնվի: Իրեն ասում եմ, որ անպայման կտեսնի, ուղղակի ժամանակ է պետք»,- նշեց Սեդա Ղարիբյանը:

Նշենք, որ Նարեկ Հովեյանը նոյեմբերի 21-ին Արցախում ականապայթյունային վիրավորում է ստացել: Ականի պայթյունից 19-ամյա զինծառայողը հարված է ստացել ճակատային մասում, պարանոցի հատվածում, գլխին հեմատոմաներ են եղել: Վիրավորվելուց հետո նրան տեղափոխել են Ստեփանակերտի հոսպիտալ, որտեղ հեռացրել են մեկ աչքը։

Նարեկի ծառայակից ընկերները՝ Գեղամ Զաքարյանը, Սարգիս Աբրահամյանը և Սարգիս Մելիքյանը ականի պայթունից զոհվել են: