Հայաստանին նվիրված Սբ. Ծննդյան բարեգործական ճաշկերույթ Ստոկհոլմում
Դեկտեմբերի 12-ին Ստոկհոլմի արքայական օպերայի շենքում տեղի ունեցավ Ստոկհոլմի Կանանց Միջազգային ակումբի ամենամյա Սբ. Ծննդյան բարեգործական ճաշկերույթը, որն այս տարի նվիրված էր Հայաստանին և կազմակերպվել էր ՀՀ դեսպանության հետ միասնաբար։
ՀՀ ԱԳՆ հաղորդմամբ, ցերեկույթին ներկա են եղել արքայադուստր Մարիա Բերնադոտը, Շվեդիայում հավատարմագրված կին դեսպաններ և դիվանագետներ, շվեդ ազնվականության և մտավորականության ներկայացուցիչներ։
Ստոկհոլմի Կանանց Միջազգային ակումբի անունից նախագահ Պիրյո Սոպի-Սանդելը շնորհակալություն է հայտնել ՀՀ դեսպան Արտակ Ապիտոնյանին և նրա տիկնոջն ամենամյա այս միջոցառումը հովանավորելու համար։
Միջոցառման ավելի քան 150 մասնակիցներ հնարավորություն են ունեցել ծանոթանալու Հայաստանի պատմությանն ու մշակույթին, տոնական հայկական զարդարանքներով սեղանների շուրջ համտեսել են հայկական քաղցրավենիքներ և գինի, ունկնդրել Կոմիտասի ստեղծագործությունները Շվեդիայում բնակվող հայ երաժիշտների «Հայկանի» տրիոյի կատարմամբ։
Մասնակիցներին բաժանվել է Հայաստանի և ամանորյա հայկական ավանդույթների մասին դեսպանության կողմից պատրաստված գրքույկ և հայկական զարդեր և քաղցրավենիք։
Բարեգործական աճուրդով վաճառված հայկական հուշանվերների, կոնյակների և գինիների ողջ հասույթը տրամադրվելու է «Արմենիան Լայթհաուս» բարեգործական հիմնադրամին, որը սոցիալական աջակցություն է ցուցաբերում նյութապես անապահով կամ լքված մայրերին։