Ձեր վստահելի աղբյուրը

ԱՄՆ նախագահ Թրամփի կողմից Երուսաղեմն Իսրայելի մայրաքաղաք ճանաչելու հայտարարությունը տարածաշրջանում լարել է իրադրությունը։ Այս պարագայում Ռուսաստանը չպետք է զորքերը դուրս բերեր Սիրիայից, այլ հակառակը՝ պետք է դիրքերն ամրապնդեր։ Panorama.am-ի թղթակցի հետ զրույցում նման տեսակետ հայտնեց արաբագետ Արմեն Պետրոսյանը` միաժամանակ հավելելով, որ Թրամփի որոշումն ու ռուսասկան զորքերի դուրսբերման միջև որևէ տրամաբանական կապ լինել չի կարող։

«Թրամփի հայտարարությունից հետո ստեղծված իրավիճակը Ռուսաստանին մանևրերի նոր հնարավորություն է տալիս։ Առկա իրավիճակում, երբ արաբական երկրների հետ հարաբերությունների համատեքստում ԱՄՆ-ի դիրքերն ակնհայտորեն թուլանում են, հնարավորությունների լայն հեռանկար է բացվում ռուսական կողմի համար»,- նշեց մեր զրուցակիցը։

Արաբագետի խոսքով, Սիրիայից ռուսական զինուժի դուրսբերմամբ ազդարարվում է սիրիական հակամարտության նոր շրջափուլ՝ հակաահաբեկչական պայքարի ավարտ և նոր իրավիճակ, որի հիմնական նպատակը լինելու է Սիրիայի տարածքում իրավիճակի մեղմումը և քաղաքական գործընթացների խթանումը։

«Ռուսական կողմի ջանքերը հետագայում ուղղվելու են հենց այս նպատակին։ Սիրիայում ակտիվ պատերազմական գործողությունների բացակայության ֆոնին նման ռազմական ներկայացուցչություն պահելը Ռուսաստանի համար բավական լուրջ խնդիրներ կարող էր առաջացնել։ Սիրիայում ռուսական օդուժի նման քանակության անհրաժեշտություն այլևս չկար»,- տեսակետ հայտնեց  Արմեն Պետրոսյանը։

Արաբագետն ուշադրություն հրավիրեց այն հանգամանքի վրա, որ Ռուսաստանն, այնուամենայնիվ, Սիրիայից դուրս չի բերում ռազմական ողջ կոնտինգենտը՝ պահպանելով մեկ ռազմաբազա և մեկ ծովային հենակետ։

Հիշեցնենք, որ Ռուսաստանի Դաշնության նախագահ Վլադիմիր Պուտինը դեկտեմբերի 11-ին,  հրաման էր ստորագրել՝ Սիրիայից ռուսական զորքերը դուրս բերելու մասին:

ՌԴ արտգործնախարար Սերգեյ Լավրովն էլ հայտարարել էր Սիրիայում «Իսլամական պետության» լիակատար ջախջախման մասին: