Ձեր վստահելի աղբյուրը

ՌԴ նախագահի թեկնածու առաջադրված հեռուստահաղորդավար Քսենյա Սոբչակը ներկայացրել է նախընտրական ծրագիրը: Այն կոչվում է «123 դժվար քայլ»:

«Ռիա Նովոստի»  գործակալության հաղորդմամբ, նա այսօր մասնակցում է «Քաղաքացիական նախաձեռնություն» կուսակցության համագումարին: Հենց քաղաքական այս ուժն էլ նրան առաջադրելու է որպես նախագահի թեկնածու:

«Այսօր մեր երկրի կարևորագույն խնդիրը դարձել է իշխանությունների չփոխվելը»,-հայտարարել է նա ու նշել է, որ դա է  սոցիալական առաջընթացի դանդաղելու, միջազգային մեկուսացման, տնտեսական ճգնաժամի պատճառը:

Ծրագրում ներառված է 123 դրույթ երկրի ներքին, արտաքին, սոցիալական ու տնտեսական քաղաքականության վերաբերյալ:

Հիշեցնենք, որ Ռուսաստանի Կենտրոնական ընտրական հանձնաժողովը ստացել է 34 թեկնածուի աջակցության վերաբերյալ տվյալներ: Հանձնաժողովի նախագահ Եվգենիա Շևչենկոն հայտարարել է, որ 16 թեկնածուներ առաջադրված են կուսակցությունների կողմից,  18-ը ինքնաառաջադրված է:

Թեկնածու առաջադրելու իրավունք ունի 67 կուսակցություն: Օրենքի համաձայն, թեկնածուին գրանցելու համար ստորագրություններ ներկայացնելուց ազատված են խորհրդարանական կուսակցությունները: Մյուսները պետք է մինչև հունվարի 31-ը հավաքեն ու ԿԸՀ ներկայացնեն 100 հազար ընտրողի ստորագրություն, ինքնաառաջադրվածների պարագայում հարկավոր է 300 հազար ստորագրություն:

Դեկտեմբերի 18-ին պաշտոնապես մեկնարկել է քարոզարշավը: Կուսակցությունների կողմից առաջադրված թեկնածուները պետք է փաստաթղթերը ներկայացնեն ԿԸՀ ոչ ուշ քան հունվարի 12-ն է,  իսկ ինքնաառաջադրվածները՝ մինչև հունվարի 7-ը: Ռուսաստանի նախագահի ընտրությունները կկայանան մարտի 18-ին: