Արմեն Սարգսյան. «Ես և իմ ընտանիքի անդամները «Լիդիան Արմենիա»-ի բաժնետեր չենք եղել և չենք լինելու»
Մեծ Բրիտանիայում ՀՀ արտակարգ և լիազոր դեսպան, Հանրապետական կուսակցության կողմից ՀՀ 4-րդ նախագահի պաշտոնին առաջադրված Արմեն Սարգսյանը Շանթ հեռուստաընկերության հետ զրույցում հերքել է մամուլի տեղեկություններն այն մասին, թե ինքը «Լիդիան Արմենիա» ընկերության հետ բիզնես կապեր ունի։
«Լիդիան»-ի պատմությունը հերթական սուտ լուրերից մեկն է։ Հաճույքով կհստակեցնեմ: Ես և իմ ընտանիքի որևէ անդամ երբեք այդ ընկերության բաժնետեր չենք եղել, չենք լինելու և չենք: Սա պարզ հստակ ձևակերպում է։ «Լիդիան» ընկերության կամ Ամուլսարի պատմության հետ վերջին անգամ շփվել եմ հինգ տարի առաջ: «Լիդիան»-ը Կանադայում գրանցված բաց, թափանցիկ աշխատող ընկերություն է: Կանադան՝ լինելով լավագույն տարածքներից մեկը, որտեղ լեռնաարդյունաբերությունը լավ կազմակերպված է, հստակ են բաժնետերերի անունները, կարող են «գուգլ» անել ու կտեսնեն՝ արդյոք ես կամ ինձ հետ կապված որևէ մեկը բաժնետեր եղել են, թե ոչ: Պատասխանը լինելու է՝ ոչ»,- ընդգծել է Արմեն Սարգսյանը։
Վերջինիս խոսքով, այդ ընկերության հետ իր հարաբերություններն ի պաշտոնե են զարգացել՝ որպես դեսպան իր աջակցությունն է ցուցաբերել, որ Հայաստանում ներդրումներ անեն։ Ավելին, Սարգսյանի խոսքով «Լիդիան Արմենիա»-ի բաժնետերերից մեկը՝ Ջոզեֆ Ուղուրլյանը, ծագումով հայ է և ներկայումս նա Արցախում ՀԷԿ է կառուցում։
«Իմ հարաբերությունը այդ ընկերության հետ եղել է շատ պարզ։ Եթե կա ընկերություն, որը Հայաստանում հետաքրքրված է ներդրում անելու, ես պատրաստ եմ աջակցել, խորհուրդ տալ, որ գան Հայաստան: Այդպես ստացվեց «Կոկա Կոլա»-ին կամ HSBC բանկին Հայաստան բերելը, որը ծանր աշխատանք էր և տարածաշրջանում Հայաստանը միակն էր, որտեղ եկավ այդ բանկը: Ես հպարտանում եմ այդ ամենով, որովհետև այդ բանկի՝ Հայաստան գալով բանկային համակարգում շատ բան փոխվեց, օրենքներ փոխվեցին: Եթե կա ընկերություն, որ պատրաստ է Հայաստանում ներդրում անել, ես միշտ պատրաստ եմ նրանց հետ հանդիպել, խորհուրդ տալ, աջակցել, որ գան: Այսպիսի օրինակներ շատ կան, բայց դա չի նշանակում, որ դրանցից յուրաքանչյուրի մեջ ես շահաբաժին ունեմ կամ ունեցել եմ: Չունեմ»,- նշել է Սարգսյանը։
Արմեն Սարգսյանը նշել է, որ ընկերության հետ անմիջական առնչություն ունեցել է զուտ այնքանով, որ կարճ ժամանակահատված եղել է խորհրդի կազմում, հետևաբար չէր էլ կարող բաժնետեր լինել։
«Այդ խորհուրդի անդամ ես եղել եմ ընդամենը երեք ամիս, որի ժողովներին նույնիսկ չեմ մասնակցել: Իմ կարծիքն առանձին շարադրել եմ ու հրաժարական տվել, դուրս եկել», - ասել է Արմեն Սարգսյանը։
Վերջինս միաժամանակ հավելել է, որ կա ևս մեկ հանգամանք, որը բացառում է իր՝ այդ ընկերության բաժնետեր լինելը:
«Նույն ընկերության բաժնետերեր են եղել Համաշխարհային բանկը և Եվրոպական բանկը: Այդ կազմակերպությունները չեն ներդնում ընկերությունների մեջ, որտեղ նախկին կամ ներկայումս գործող պետական ծառայող կա»,- ասել է նախագահի թեկնածու առաջադրված Արմեն Սարգսյանը։
Լրահոս
Տեսանյութեր
Փաշինյանն ընդամենը մի տհաճ խոչընդոտ է հայրենիք ունենալու ճանապարհին. Զոհված զինծառայողի մայր
