Արամ Մանուկյանի արձանի զոռով «ընտրության» տարօրինակ պատմությունը
Համացանցում լայնորեն քննարկվում է պետական, հասարակական գործիչ, Հայոց նորագույն պետականության հիմնադիր Արամ Մանուկյանի արձանի էսքիզը, որն ընտրվել է Երևանի ավագանու մրցութային հանձնաժողովի կողմից: Նշված նախագիծը հետո ներկայացվել է ավագանուն։
Երևանի ավագանու կրթության, մշակույթի և սոցիալական հարցերի մշտական հանձնաժողովի նախագահ, «Ելք» խմբակցության անդամ Արայիկ Հարությունյանը ֆեյսբուքյան իր էջում նշել է. «Ավագանու մշակույթի, կրթության և սոցիալական հարցերի մշտական հանձնաժողովը ձայների մեծամասնությամբ կողմ արտահայտվեց նախագծին։ Փետրվարի 13-ին որոշումը կքվեարկվի ավագանու նիստի ժամանակ։ Մրցութային հանձնաժողովում եղել են դաշնակցության հայտնի ներկայացուցիչներ։ Ահավոր չեմ հավանել, դեմ եմ քվեարկել։ Վայելեք»:
Panorama.am-ը դիմեց հանձնաժողովի անդամ, ճարտարապետ Անուշ Տեր-Մինասյանին, ով նույնպես դեմ է քվեարկել այս նախագծին: Նա ասաց, որ իրենք այս էսքիզը չեն էլ քննարկել:
«Մենք քննարկել ենք այլ էսքիզ, որը էլի շատ վատն էր: Երկուսն էլ շատ վատն էին, գուցե նա ավելի վատն էր, չգիտեմ, բայց համենայն դեպս, սա չէր, բոլորովին ուրիշ բան է սա, որ քննարկված չի: Այս մարդը չի մասնակցել առաջին փուլին, իսկ ընդհանրապես ընդունված է, որ եթե նոր մրցույթ չի հայտարարվում, առաջին փուլի հաղթողները մասնակցում են երկրորդ փուլին, և իրենցից մեկն է ընտրվում, բայց այս դեպքում այդ գործը ընդհանրապես չի մասնակցել, երկրորդ փուլում ուղղակի ինչ-որ նոր մարդկանց են մտցրել, պարզ չէ՝ ինչու»,- ասաց նա:
Տեր-Մինասյանը նշեց, որ հենց հանձնաժողովի նիստի ժամանակ էլ է արտահայտվել, ասել, որ դա խախտում էր, որ գործը լավը չէ, այն ընտրվել է՝ հիմնավորմամբ, թե նորարարական է, բայց ըստ ճարտարապետի՝ այն բացարձակ նորարարական չէ, պարզապես լավը չէ: «Զոռով անցկացրեցին, ոչ ոք չէր ասում՝ լավ աշխատանք է: Միակ բանը որ ասում էին՝ նորարարական է: Այնտեղ ոչ մի բան չկար, դեմքը քանդակած չէր, ասում էին՝ դե ոչինչ, կանի: Բայց ո՞նց եք հիմա նրա համար քվեարկում, եթե հետո պիտի անի: Նրան ժամանակ տվեցին, նախ՝ դա երկրորդ մրցանակ էր՝ խրախուսական, առաջին մրցանակ ոչ ոք չի ստացել, նրան տրվեց ժամանակ, ինքը լրիվ փոխեց: Դա ոչ ոք չի քննարկել, ոչ ոք չի տեսել հանձնաժողովի անդամներից, չգիտեմ՝ սա ինչ տարօրինակ պատմություն էր»,- ասաց նա:
Տեր-Մինասյանը նշեց՝ ասացին, որ արձանի համար քարերն էլ ինչ-որ շատ հեռու երկրից պիտի բերեն Հայաստան, որն արդեն ծիծաղելի է՝ ի՞նչ անհրաժեշտություն կա այդ գունավոր քարերը բերել Հայաստան: Ճարտարապետը նշեց, որ եթե մրցույթի առաջին փուլում նախասիրությունները լրիվ ուրիշ քանդակի էին տրված, քննարկում էին, կերպարի մասին էին խոսում, հանկարծ երկրորդ փուլում անցկացրեցին այս քանդակը, ու մեծամասնությունը կողմ քվեարկեց այս էսքիզին:
«Նայում ես, սարսափում, դա ի՞նչ է»,- նշեց նա:
Լրահոս
Տեսանյութեր
«Տավուշը հանուն հայրենիքի» շարժման անդամները քայլերթով գալու են Երևան. Բագրատ Սրբազան