Ձեր վստահելի աղբյուրը

Խորհրդարանում քննարկման ներկայացվեց ԱԺ փոխխոսնակ Արփինե Հովհաննիսյանի ներկայացրած «Վարչական դատավարության օրենսգրքում փոփոխություն և լրացում կատարելու մասին» ՀՀ օրենքի նախագիծը:

Հեղինակը նշեց, որ օրինագծով առաջարկվում է հստակեցնել վարչական գործերով դատական նիստերի տեսալուսանկարահանումը և լրագրողներին թույլատրել լուսաբանել դատական նիստը՝ դատավարության մասնակից երկու կողմերի թույլտվությունն ունենալու դեպքում։

«Գործող օրենսգրքի 100-րդ հոդվածի համաձայն՝ դատական նիստի լուսաբանումը հնարավոր է դառնում, երբ կողմերից մեկը միջնորդում է լրագրողին թույլատրել լուսաբանել դատավարությունը։ Ստեղծվում էր իրավիճակ, երբ լրագրողը դատավարության մասնակիցներից մեկի կողմում էր հայտնվում, և կասկածի տակ էր դրվում նրա անաչառությունը։ Այս նախագծի ներկայացման ազդակները լրագրողական համայնքից են եկել», - ասաց Հովհաննիսյանը։

Նա հիշեցրեց, որ այսօր նման կարգավորում գործում է քաղաքացիական դատավարության օրենսգրքում և պրակտիկորեն կարող է կիրառվել նաև վարչական դատավարության դեպքում։

«Վարչական դատավարության դեպքում այս նախագծով առաջարկվում է վարչական մարմնի վրա դնել լրացուցիչ բեռ՝ վարչական դատարանը պետք է հիմնավորի, թե ինչու է անհամաձայնություն տալիս լուսաբանմանը, եթե դատավարության մասնակից ֆիզիկական կամ իրավաբանական անձը դրան համաձայն է, որովհետև վարչական մարմինը չի կարող ասել՝ ես մի փոքր նյարդային եմ, տրամադրությունս լավ չէ, անձնական կյանքիս վերաբերող հարց է, հետևաբար, ուզում եմ՝ լուսանկարահանում չլինի», - մանրամասնեց հեղինակը։

«Ծառուկյան» խմբակցության պատգամավոր Սերգեյ Բագրատյանը անհամաձայնություն հայտնեց առաջարկվող նախագծին՝ նշելով. «Եթե լրագրողի համար կողմերից մեկը միջնորդում է դատավորին, որպեսզի վերջինս թույլատրի լուսաբանել նիստը, դա դեռ չի նշանակում, որ լրագրողի տեսանկարահանումը կողմնակալ է։

Արփինե Հովհաննիսյանը արձագանքեց, որ քաղաքացու մոտ կարող է կասկած առաջանալ, թե ինչու է լրագրողը վարչական մարմնին դիմել, դրա համար էլ առաջարկվում է ունենալ երկու կողմերի թույլտվությունը. «Ամբողջ միջազգային պրակտիկան, ՀՀ գործող իրավակարգավորումները հենց այս տրամաբանության մեջ են: Միակ բացառությունը Վարչական դատավարության օրենսգիրքն է, որն իմ խորին համոզմամբ պրոբլեմ կարող էր առաջացնել։ Իրականում, եթե լրագրողական համայնքից չունենայի այդ ազդակը, այս նախագիծը չէր ներկայացվի խորհրդարանին»։

Այնուհետև Բագրատյանը շարունակեց. «Գործող օրենքը շատ ավելի լավն է, քան ձեր առաջարկած կարգավորումը»։

Արփինե Հովհաննիսյանն արձագանքեց. «Գործող կարգավորումն եթե ավելի լավն է, դուք կքվեարկեք այս օրինագծին դեմ»։