Ձեր վստահելի աղբյուրը

Ծխելու, ծխախոտի սպառման սահմանափակումների մասին օրինագիծը եթե իրավական ուժ ստանա, հնարավոր է Հայաստանում կրճատվեն թութունի ցանքատարածությունները:  Գյուղատնտեսության նախարարությունում նման մտավախություն չունեն:

Գարնանացանի աշխատանքներին ընդառաջ Panorama.am-ը այս ու այլ հարցերի մասին զրուցել է ԳՆ բուսաբուծության վարչության պետ  Ռուդիկ Նազարյանի հետ:

Հարց-Պարոն Նազարյան, հնարավո՞ր է հակածխախոտային օրենքը բացասաբար անդրադառնա թութունի արտադրության վրա:
Պատասխան-Հայաստանում ծխախոտի արտադրությամբ զբաղվում են հիմնականում մասնագիտացված ֆերմերային տնտեսությունները, որոնք տարիների ընթացքում ստեղծել են համապատասխան արտադրական միջոցներ, ինչպես մշակության (սածիլանոցներ), այնպես էլ բերքի նախնական վերամշակման (չորանոցներ)  համար: Այդպիսի տնտեսությունները կշարունակեն զբաղվել ծխախոտագործությամբ, իսկ հումքի սպառումը կկարգավորի շուկան:

Ստորև ներկայացվում են  ՀՀ ազգային վիճակագրական ծառայության կողմից հրապարակած ծխախոտի 2014-2016 թվականներին  ցանքատարածությունների, համախառն արտադրանքի և միջին բերքատվության ցուցանիշները.

Հարց-Գյուղատնտեսական աշխատանքները շուտով նոր թափ կստանան, ընդհանրապես ի՞նչ հետաքրքրիր մշակաբույսեր են նախատեսված աճեցնել այս տարի:
Պատասխան-Այս տարի նախատեսվում է ավելացնել հանրապետությունում հատիկաընդեղեն մշակաբույսերի (ոսպ, սիսեռ, ոլոռ) ցանքատարածությունները: Որպես բարձրարժեք և հեռանկարային մշակաբույսեր, տարեցտարի ավելացվում են նաև հնդկացորենի, բրոկկոլիի` կաղամբի նոր տեսակի ցանքատարածությունները:

Հարց-Հայաստանում  սոյա արտադրվո՞ւմ է:
Պատասխան-Սոյան Հայաստանում արտադրական նպատակով ներկայումս չի մշակվում: Կան որոշ ցանքեր, որոնք ունեն գիտափորձարարական նշանակություն: ՀՀ գյուղատնտեսության նախարարության «Երկրագործության գիտական կենտրոն» ՊՈԱԿ-ի կողմից բուծվել են սոյայի «Մենուա», «Միլենա», «Վաղահաս 1» սորտերը, որոնք անցել են  տնտեսական օգտակարության պետական սորտափորձարկում և գրանցված են սելեկցիոն նվաճումների պետական գրանցամատյանում: Այժմ  իրականացվում են այդ սորտերի սերմնանյութի բազմացման աշխատանքները: Միաժամանակ նախարարությունում քննարկվում են 2018 թվականի սոյայի ցանքատարածությունների ավելացման ուղիները:

Հարց-Աննախադեպ որևէ բան ակնկալվո՞ւմ է այս տարի:
Պատասխան-Հանրապետությունում բազմամյա տնկարկների կարկուտից արդյունավետ պաշտպանությունը, տնտեսավարողների եկամուտների պահպանումն ու այգեգործության արդյունավետության բարձրացումն ապահովելու համար իրականացվում է «Հայաստանի Հանրապետության գյուղատնտեսության ոլորտում հակակարկտային ցանցերի ներդրման համար տրամադրվող վարկերի տոկոսադրույքների սուբսիդավորման» ծրագիրը: Այն  2018 թվականից մեկնարկվել է և շարունակվելու է մինչև 2024 թվականը: Ծրագրի իրականացման համար 2018 թվականին պահանջվում է 700,6 մլն դրամ: Դրանով նախատեսվում են 350 հեկտար պտղատու և 1000 հեկտար խաղողի այգիների վրա կառուցել կարկտապաշտպան ցանցեր, որի նպատակով վերցրած վարկը տնտեսվարողին կտրամադրվի 2 տոկոսով, իսկ մյուս 10 տոկոսը կսուբսիդավորվի ծրագրի շրջանակներում:

Պտղաբուծության զարգացման, պտղի և հատապտղի արտադրության ծավալների ավելացման, ներմուծման փոխարինման և արտահանման ծավալների ավելացման համար մշակվել է «Հայաստանի Հանրապետությունում ժամանակակից տեխնոլոգիաներով մշակվող ինտենսիվ պտղատու այգիների հիմնման համար վարկային տոկոսադրույքների սուբսիդավորում»  ծրագիրը, որը մեկնարկվել է և կշարունակվի մինչև 2024 թվականը: Ծրագրով նախատեսվում է շուրջ 200 հա ինտենսիվ պտղատու այգիների և հատապտղանոցների հիմնման համար տրամադրվող վարկերի տոկոսադրույքի սուբսիդավորում: Ծրագրի իրականացման համար 2018-2024 թվականներին կհատկացվի 1,695,218,963 դրամ, որից 398,875,050-ը` 2018 թվականի համար: Վարկերը բանկերի կողմից հատկացվելու է 12 % տոկոսադրույքով, որից 7 %-ը կսուբսիդավորվի ծրագրի շրջանակներում:

Հայաստանում հացահատիկային և հատիկաընդեղեն որոշ մշակաբույսերի տեղական սերմնաբուծության ու սերմնարտադրության զարգացման ծրագիրն ուղղված է հզորացնելու ֆերմերային տնտեսությունների արտադրական կարողությունները և բարձրացնելու տեղական արտադրության սերմնանյութով ինքնաբավության մակարդակը: Այն նախատեսվում է իրականացնել է 2018 թվականի գարնանից մինչև 2019 թվականի դեկտեմբերի 10-ն ընկած ժամանակահատվածը: